詩篇 第 42 章 - 台語漢字羅馬本

1

〔可拉後裔教示的詩；交互樂官。〕上帝啊，我的心切切欣慕你，親像鹿切切欣慕溪水。

2

我的心嘴乾欣慕上帝，就是活的上帝；我啥時會到上帝面前來見伊啊？

3

我暝日用我的目屎準飯食；對我講無息：你的上帝佇叨落？

4

我早前及眾人做陣去，導到上帝的厝，用歡喜謳咾的聲，大家守節。我追念諸個事，我的心極其悲傷。

5

我的心啊，你啥事鬱悴？啥事佇我的內面著急？你著向望上帝，因為伊的面向我來拯救我；所以我猶久欲謳咾伊。

6

我的上帝啊，我的心佇我的內面鬱悴，所以我對約但的地及黑門，亦對米薩的山記念你。

7

你的瀑布出聲，就深淵及深淵相叫應；你的波浪你的大湧攏淹密我。

8

總是耶和華日時欲施出伊的慈愛；暝時，伊互我唱歌來求賞賜我活命的上帝。

9

我欲對上帝──我的石磐講：你啥事記得我？我啥事因為對敵的壓迫憂悶來行啊？

10

我的對敵譏刺我，親像拍碎我的骨頭，對我講無息：你的上帝佇叨落？

11

我的心啊，你啥事鬱悴？啥事佇我的內面著急？你著向望上帝，因為我猶久欲謳咾伊。伊是我的面的榮光，亦是我的上帝。