以賽亞書 第 12 章 - 台語漢字羅馬本

1

到彼日你欲講：耶和華啊，我欲感謝你！因為你雖然曾受氣我，今你的受氣已經息；你亦安慰我。

2

看啊！上帝是拯救我者；我欲倚靠伊，亦無驚。因為主耶和華是我的氣力，是我的詩歌，伊亦成做救我者。

3

恁欲對救恩的水泉歡喜來汲水。

4

佇彼日，恁欲講：著感謝耶和華，求叫伊的名；將伊所行的報揚佇列邦中，講起伊的名已經受尊做高。

5

恁著唱歌謳咾耶和華，因為伊所行的真顯赫；願此個代誌遍傳佇天下。

6

錫安徛起的百姓啊，恁著出大歡喜的聲，因為以色列的聖者佇恁的中間做大。