出埃及記 第 21 章 - 台語漢字羅馬本

1
「你佇百姓的面前所著立的法度是按呢:
2
你若買希伯來人做奴僕,伊欲服事你六年久;第七年伊通自由,白白出去。
3
伊若單身來就單身出去;伊若有某,伊的某就及伊出去。
4
伊的主人若給伊娶某,某給伊生子抑是查某子,某及子兒著歸主人,伊著單身出去。
5
設使奴僕明明講:『我疼我的主人及我的某、我的子兒,呣愛出去自由。』
6
伊的主人就著帶伊到官府遐,閣著導伊倚近門,抑是門豎,主人著用鑽仔鑽伊的耳仔,伊就永遠服事伊。
7
「人若賣查某子做女婢,伊無通親像奴僕按呢出去。
8
主人若定著收伊,後來看無中意,就著准伊贖身;主人已經騙伊,就無權通賣伊互外邦人。
9
主人若定著伊互家己的子,就著款待伊親像查某子。
10
若有閣娶一個,就伊的食、穿,及配合的事,猶原呣通減少。
11
若無對伊行此三項,伊就通白白出去,免用銀贖。」
12
「拍死人者,的確著互伊死。
13
人若呣是埋伏人,就是上帝交佇伊的手,我就給你設一個所在,伊通走去遐。
14
人若自專攻擊伊的厝邊,用詭譎的計謀,就若佇我的壇,亦著掠去互伊死。
15
「拍老父抑是老母者,的確著互伊死。
16
「拐人去賣者,抑是猶佇伊的手,的確著互伊死。
17
「咒詛老父抑是老母者,的確著互伊死。
18
「人若冤家,此個用石頭抑是拳頭拇拍彼個,猶無致到死,不過倒佇眠床,
19
若會閣起來倚柺仔出去,彼個拍伊的通算無罪;獨獨著賠伊做工的錢,也著給伊醫到攏好。
20
「人若用槌仔拍伊的奴僕抑是伊的女婢,致到連鞭死,伊的確著受刑罰。
21
若過一二日才死,就通免受刑罰,因為是伊的銀買的。
22
「人若相拍,傷害有娠孕的婦仁人,致到磕落娠,後來無別項的害,彼人著罰銀,照婦仁人的丈夫所定的,佇官府的面前互伊。
23
若有別項的傷害,就著用命賠命,
24
目睭賠目睭,嘴齒賠嘴齒,手賠手,
25
腳賠腳,燒賠燒,傷賠傷,拍賠拍。
26
「人若拍歹伊的奴僕抑是伊的女婢一蕊目睭,就著因為伊的目睭放伊去自由。
27
若拍落伊的奴僕抑是伊的女婢一支嘴齒,就著因為伊的嘴齒放伊去自由。」
28
「牛若觸死一個查甫人抑是一個婦仁人,著用石頭擲死彼隻牛,總是呣通食伊的肉;牛的主人算無罪。
29
設使彼隻牛平素會觸人,有人報伊的主人知,伊竟然無將牛關,致到觸死查甫人抑是婦仁人,就著用石頭擲死彼隻牛,牛的主人也著死。
30
若是擬定用銀贖生命,就著照所擬定的來贖伊的生命。
31
牛無論觸著人的子抑是查某子,著照此個例辦伊。
32
牛若觸著奴僕抑是女婢,著用銀三十舍客勒互的主人,也著用石頭擲死牛。
33
「人若掀開井,抑是掘井無蓋蓋,有牛抑是驢跋佇彼內面,
34
井的主人著賠,也著提銀互伊的主,死的精牲歸家己。
35
「此人的牛若觸著彼人的牛,致到死,著賣活的牛,價錢平分,死的牛也著平分。
36
人若知此隻牛平素會觸人,主人竟然無將牛關,伊就著用牛賠牛,死的牛歸家己。」

如需更多版本聖經,請到台灣聖經公會聖經網站瀏覽與查詢
台語漢字羅馬本聖經,部份字因為電腦編碼關係,需造字,無法正常顯示,您可使用「並排閱讀」功能,可同時顯示台語漢字羅馬本與巴克禮全羅,或點選連結:http://www.sl-pc.org.tw/bible/4_3,不便之處請包涵,上帝祝福您!