出埃及記 第 20 章 - 台語漢字羅馬本

1

上帝吩咐諸個一切的話講：

2

「我是耶和華──你的上帝，曾導你對埃及地，對做奴才的家出來的。

3

「我以外你呣通有別個上帝。

4

「呣通為著家己雕刻偶像，不論天頂、地上，及地下、水內所有的物攏呣通做的像。

5

呣通敬拜，也呣通服事，因為我耶和華──你的上帝，斷斷呣容允用別個上帝匹配我。怨恨我者，我歸咎伊的罪，對父到子，到三四代；

6

疼我、守我誡命者，我施恩互伊，直到千代。

7

「呣通濫糝稱耶和華──你的上帝的名；因為濫糝稱伊的名的人，耶和華的確無掠伊做無罪。

8

「著記得安息日，守伊做聖。

9

六日內應該著磨做你一切的工，

10

獨獨第七日就是向耶和華──你的上帝來守的安息。此日你及你的子、查某子、奴僕、女婢、精牲，以及踮佇你中間的出外人，一切的工攏呣通做；

11

因為六日內，耶和華創造天、地、海，及彼中間萬物，第七日就息，所以耶和華賜福佇安息日，設立伊做聖。

12

「著孝敬你的老父你的老母，互你的日子佇耶和華──你的上帝所賞賜你的地得著久長。

13

「呣通害死人。

14

「呣通行姦淫。

15

「呣通偷提。

16

「呣通做假的干證陷害你的厝邊。

17

「呣通貪你的厝邊的厝；也呣通貪你的厝邊的某、奴僕、女婢、牛、驢，以及你的厝邊一切所有的。」

18

眾百姓看見雷鳴，閃爁、哨角的聲、閣山頂出煙，百姓一下看見就愕愕惙，遠遠徛，

19

對摩西講：「求你及阮講，阮欲聽；呣通上帝及阮講，驚了阮會死。」

20

摩西對百姓講：「呣免驚；因為上帝降臨是欲試驗恁，閣互恁時常敬畏伊，免得恁犯罪。」

21

對按呢百姓遠遠徛；摩西就行近密雲到上帝的所在。

22

耶和華對摩西講：「你著按呢給以色列人講：『恁已經家己看見我對天頂及恁講話。

23

恁呣通做別個上帝匹配我，呣通為家己做銀的上帝、金的上帝。

24

你著給我起土壇，佇彼頂面獻你的燒祭及平安祭、及你的牛、你的羊。見若我互人記念我的名的所在，我欲到你遐賜福你。

25

你若用石頭給我起壇，呣通用過拍的石來起，因為若佇彼頂面動你的家私，就拍垃墋伊。

26

也呣通用崎仔層上我的壇，免得露現你的下體。』」