撒母耳記下 第 24 章 - 台語漢字羅馬本

1

耶和華閣受氣以色列人，激動大衛來害，就講著去算以色列及猶大人。

2

王吩咐及伊佇的軍長約押，講：「你今去遍行以色列眾支派，對但到別是巴，點算百姓，互我知百姓的數額。」

3

約押給王講：「無論百姓偌多，願耶和華──你的上帝加添百倍，閣互我的主我的王親目看見。總是我的主我的王啥事歡喜此個事啊？」

4

總是王的話贏過約押及許個軍長。約押及許個軍長就對王的面前出去，點算以色列的百姓。

5

過約但，紮營佇亞羅珥、佇迦得山谷中的城的正旁，及雅謝相近，

6

閣到基列及他停合示的地，閣到但雅安，踅到西頓，

7

閣到推羅堅固的城，及希未人以及迦南人一切的城，閣出去到猶大南方的別是巴。

8

遍行全地，歷過九月日閣二十日，就倒轉到耶路撒冷。

9

約押用算百姓的數額晉互王知；以色列人抬刀的勇士八十萬；猶大人有五十萬。

10

大衛算百姓的數額了後，心就家己責備，大衛給耶和華講：「我行此個事大大有犯罪。耶和華啊，求你除去你的奴僕的過失，因為我所行的真戇。」

11

大衛天光早起來的時，耶和華的話臨到先知迦得，就是大衛的先見者，講：

12

「你去給大衛講，耶和華按呢講：『今我用三項互你，你揀一項，我通行佇你。』」

13

迦得就來通知大衛，對伊講：「你愛你的地飢荒七年久嗎？抑是愛你的對敵追你，你逃走佇伊的面前三月日久啊？抑是愛瘟疫佇你的地三日久啊？今你著斟酌想看唧，我通用甚麼話回覆差我的。」

14

大衛給迦得講：「我真為難！咱寧可陷落佇耶和華的手，因為伊有豐盛的憐憫。我呣願陷落佇人的手。」

15

耶和華就降瘟疫互以色列，對清早到所定著的時；對但到別是巴，百姓間死七萬人。

16

當天使伸手佇耶路撒冷欲滅伊的時，耶和華就退悔降落此個災禍，就給滅百姓的天使講：「夠額啦！勼你的手！」彼時耶和華的使者佇耶布斯人亞勞拿的五榖場。

17

大衛看見拍百姓的天使，就給耶和華講：「看啊，犯罪的是我，悖逆的也是我；總是諸個歸群的羊有做甚麼啊？願你的手攻擊我及我父的家。」

18

彼日，迦得來見大衛，給伊講：「你上去，佇耶布斯人亞勞拿的五榖場給耶和華起一座壇。」

19

大衛照迦得的話上去，照耶和華的命令。

20

亞勞拿看，看見王及伊的人臣對面來，亞勞拿就出去，仆佇地裡拜王。

21

亞勞拿講：「我的主我的王來奴僕遮啥事？」大衛講：「我來欲買你此個五榖場，給耶和華起一座壇，互百姓間的瘟疫息。」

22

亞勞拿給大衛講：「我的主我的王，照你所看做好的提來獻伊。看啊，遮有牛通做燒祭，有拍五榖的器具及套牛的枷車通做柴。

23

王啊，亞勞拿用這一切送互王」；亞勞拿閣給王講：「願耶和華──你的上帝接納你。」

24

王給亞勞拿講：「呣通啊。我欲照價錢給你買；我呣肯用白白得著的物做燒祭獻互耶和華──我的上帝。」大衛就用五十舍客勒的銀買彼個五榖場及牛。

25

大衛佇遐給耶和華起一座壇，獻燒祭及謝恩祭。按呢，耶和華聽為地方所求的，瘟疫佇以色列中就息。