撒母耳記上 第 13 章 - 台語漢字羅馬本

1

掃羅抵仔坐位的年歲；做以色列王二年，

2

掃羅就為家己對以色列中揀三千人：二千跟隨掃羅佇密抹及伯特利山，一千跟隨約拿單佇便雅憫的基比亞；其餘的人伊差倒去逐人的布棚。

3

約拿單拍迦巴非利士人的軍營，非利士人聽見。掃羅就歕哨角佇全地，講，希伯來人著聽啊。

4

以色列眾人聽見掃羅拍非利士人的軍營，閣聽見以色列人互非利士人厭惡，百姓就跟隨掃羅聚集佇吉甲。

5

非利士人聚集欲及以色列人交戰，有車三萬張，馬兵六千，步兵親像海邊的沙許多，就上來佇伯亞文東勢的密抹紮營。

6

以色列人看見家己危急，因為百姓窘迫，就家己匿佇山洞、樹林、石穴險要的所在，及深坑。

7

也有希伯來人過約但，到迦得及基列地。掃羅猶久佇吉甲，百姓攏愕愕惙來跟隨伊。

8

掃羅照撒母耳所定著的日期聽候七日。撒母耳猶未來吉甲，百姓離開伊四散去。

9

掃羅講：「將燒祭及謝恩祭帶來我遮。」伊就獻燒祭。

10

伊獻燒祭抵仔明白，看啊，撒母耳到啦。掃羅出去迎接伊，欲給伊請安。

11

撒母耳講：「你做甚麼代啊？」掃羅講：「因為我看見百姓四散離開我，你也無照所定著的日期到，閣非利士人已經聚集佇密抹。

12

所以我講：非利士人欲到吉甲攻擊我，也我猶未求耶和華施恩，我就勉強獻燒祭。」

13

撒母耳對掃羅講：「你做戇事啦，因為你無遵守耶和華──你上帝所命令你的誡命。欲是有守，耶和華就堅固你的王位，佇以色列中到永遠。

14

今你的王位無久長。耶和華已經尋著合伊的心意的一人，閣耶和華也定著伊做伊的百姓的頭，因為你無遵守耶和華所命令你的。」

15

撒母耳就起來，對吉甲上去便雅憫的基比亞。掃羅點算隨伊的人，約略有六百人。

16

掃羅及伊的子約拿單，及隨的人，攏踮佇便雅憫的迦巴；總是非利士人紮營佇密抹。

17

有搶劫的對非利士的軍營中出來，分做三隊：一隊越對俄弗拉的路到書亞的地去，

18

閣一隊越對伯和崙的路去，閣一隊越對洗波音的山谷對面地界的路，向曠野去。

19

彼時，以色列全地無一個拍鐵師傅；因為非利士人講，驚了希伯來人製造劍及槍。

20

以色列人欲磨利伊的犁、耙、斧頭、鋤頭，逐人著落去非利士人遐。

21

若欲鑢鋤頭、犁、三齒的叉、斧頭，及趕牛的鐵刺，著一賓的工錢。

22

所以到交戰的日，隨掃羅及約拿單的人無一個手裡有劍有槍的，獨獨掃羅及伊的子約拿單有。

23

非利士防守的兵出去到密抹的隘口。