撒母耳記上 第 14 章 - 台語漢字羅馬本

1

有一日，掃羅的子約拿單給抬伊的軍器的少年人講：「來，咱來去彼旁，到非利士人軍營遐。」總是伊無給老父講。

2

掃羅佇基比亞的極頭，坐佇米磯崙的石榴樹腳，隨伊的約略有六百人。

3

閣有亞希突的子亞希亞，帶以弗得。（是以迦博的兄，非尼哈的子，以利的孫，就是佇示羅做耶和華的祭司的。）百姓呣知約拿單去。

4

約拿單欲去非利士的軍營所欲過許個隘口的中間。此旁有石的山尖彼旁也有石的山尖：一個名播設，一個名西尼；

5

一個石的山尖佇北旁，及密抹相對，一個石的山尖佇南旁，及迦巴相對。

6

約拿單給抬伊的軍器的少年人講：「來，咱來去無受割禮的人的軍營遐，豈採耶和華欲替咱做代誌；因為耶和華的救人，無限定人的多少。」

7

抬伊的軍器者給伊講：「照你的心所愛的攏行伊。通進前去，我及你同心，欲隨你去。」

8

約拿單講：「咱欲經過到許個人遐，互看見咱。

9

若按呢給咱講：『恁徛，聽候阮到恁遐』，咱就定定徛，無上去遐。

10

若講：『恁上來阮遮』，咱就上去，因為耶和華將交佇咱的手，此個話通做咱的證據。」

11

二人就互非利士防守的兵看見。非利士人講：「希伯來人對所匿的洞出來！」

12

防守的兵給約拿單及抬伊的軍器的人講：「恁上來阮遮，阮有一項代誌欲報恁。」約拿單就給抬伊的家私者講：「你隨我上去，因為耶和華將交佇以色列人的手。」

13

約拿單就用手擒腳踜上去，抬伊的軍器的人隨伊。非利士人倒佇約拿單的面前，抬伊的軍器的人也隨伊的後面來。

14

約拿單及抬伊的軍器的人起頭所的約略二十人，攏是佇半畝園的犁溝。

15

對按呢佇營盤、佇田野、佇眾百姓的中間攏愕愕惙，防守的兵及搶劫的兵也攏愕愕惙，地也振動，致到愕愕惙到極。

16

佇便雅憫的基比亞，掃羅守望的兵看，看見非利士的眾軍兵四散，四界亂亂走。

17

掃羅就給隨伊的百姓講：「恁點算，看是誰對咱遮出去？」點算了，就知約拿單及抬伊的軍器的人無佇。

18

掃羅給亞希亞講：「你著帶上帝的約櫃來。」因為彼時上帝的約櫃佇以色列人的所在。

19

掃羅及祭司講話的時，非利士營中喊嘩的聲愈久愈大；掃羅就給祭司講：「免動你的手！」

20

掃羅及隨伊的百姓攏聚集，來到戰場，看見非利士人逐個用刀相剆，真大亂。

21

以前倚非利士人的希伯來人對四方隨到伊的營的，今也反轉來幫助隨掃羅及約拿單的以色列人。

22

許個匿佇以法蓮山地的以色列人聽見非利士人逃走，就出來倚的後面來交戰。

23

彼日，耶和華拯救以色列，直直戰到伯亞文。

24

彼日以色列人真困苦，因為掃羅向百姓咒誓講，無等到日暗，聽候我報我的對敵的冤讎的代先，食物的人著受咒詛。所以百姓無食甚麼。

25

眾百姓入樹林，看見有蜜佇地上。

26

百姓入樹林，看見有蜜滴，總是無人敢用手提入嘴，因為百姓驚許個咒誓的話。

27

約拿單無聽見老父向百姓咒誓，所以伸伊手裡的枴仔尾，托佇蜜房，伊的手越到嘴裡，目睭就金。

28

百姓中有一人給伊講：「你的老父向百姓嚴嚴咒誓講，今仔日食甚麼的，著受咒詛；百姓就真厭倦。」

29

約拿單講：「我的父害著此個地方。恁看，我試此一點仔蜜，目睭就金。

30

何況百姓今仔日若出在意思食所搶對敵的物，拍死非利士人豈無閣卡多嗎？」

31

彼日，拍非利士人，對密抹到亞雅崙。百姓真厭倦，

32

百姓就趕緊走去提所搶的羊、牛、牛仔子佇地裡，肉猶有血就食伊。

33

有人給掃羅講：「百姓得罪耶和華啦，因為食猶有血的肉。」伊講：「恁差謬啦，今著翱大塊石來我遮。」

34

掃羅閣講：「恁著四界行佇百姓的中間，給講，逐人牽的牛逐人牽的羊來我遮，佇遮來食；呣通食猶有血的肉來得罪耶和華。」彼暝，百姓逐人牽的牛去遐。

35

掃羅給耶和華起一座壇，這是伊頭一擺給耶和華起的壇。

36

掃羅講：「咱今著透暝落去非利士人，搶，到天光，無留一人。」百姓講：「你所看做好的就行伊！」祭司講：「咱著來遮親近上帝。」

37

掃羅問上帝講：「我著落去非利士人抑呣免？你欲將交互以色列的手嗎？」彼日上帝無應伊。

38

掃羅講：「恁百姓中的序大攏著上來遮，查明今仔日此個罪是在佇甚麼。

39

我指救以色列──永活的耶和華來講，雖然我的子約拿單，伊也著死。」總是百姓中無一人應伊。

40

伊就給以色列的眾人講：「恁徛此旁，我及我的子約拿單徛彼旁。」百姓對掃羅講：「你看做好的就行伊！」

41

掃羅給耶和華──以色列的上帝講：「求你指示實情。」對按呢拈著約拿單及掃羅；百姓攏無代誌。

42

掃羅講：「著佇我，及我的子約拿單的中間來拈鬮。」就拈著約拿單。

43

掃羅給約拿單講：「你給我講，你做甚麼事？」約拿單講：我實在用手裡的柺仔尾，搵一點仔蜜來試覓。按呢我著死啊？」

44

掃羅講：「約拿單啊，你的確著死！願上帝按呢行，也比按呢猶卡重。」

45

百姓給掃羅講：「約拿單已經行此個大的拯救佇以色列的，伊著死嗎？決斷呣通！阮指永遠的耶和華來講，伊一支頭毛也的確無磕落佇地裡，因為伊今仔日及上帝相及做代誌。」對按呢百姓救約拿單免死。

46

掃羅就上去，無追非利士人；非利士人也去伊本所在。

47

掃羅掌國的權柄治理以色列，去及四圍攏總的對敵交戰，就是攻擊摩押人、亞捫人、以東、及瑣巴諸個王，及非利士人。伊無論所去，攏卡贏。

48

掃羅奮勇攻擊亞瑪力人，救以色列脫離搶的人的手。

49

掃羅的子是約拿單、亦施韋、麥基舒亞。伊二個查某子的名：大的名叫米拉，細的名叫米甲。

50

掃羅的某，名叫亞希暖，是亞希瑪斯的查某子。伊的軍長名叫押尼珥，是尼珥的子；尼珥是掃羅的叔。

51

掃羅的老父基士，押尼珥的老父尼珥，就是亞別的子。

52

掃羅一生常常及非利士人大交戰。掃羅見若看見有能力的人抑是勇士，就招集來倚伊。