羅馬書 第 12 章

1

(THR) Hiaⁿ-tī ah, só͘-í góa in-ūi Siōng-tè ê lîn-bín khǹg lín hiàn ka-kī ê seng-khu chòe chè, sī o̍ah ê, sèng ê, Siōng-tè só͘ hoaⁿ-hí ê; che sī lín sîn-lêng ê ho̍k-sāi.

(BCL) 兄弟啊，所以我因為上帝的憐憫勸恁獻家己的身軀做祭，是活的，聖的，上帝所歡喜的；這是恁神靈的服事。

2

(THR) Bo̍h-tit kap chit sè-kan siāng khóan; tio̍h ēng sim-chì ōaⁿ sin lâi piàn-hòa ka-kī, hō͘ lín ōe bêng-pe̍k sím-mı̍h sī Siōng-tè siān-liông, thang hoaⁿ-hí, sûn-chôan ê chí-ì.

(BCL) 莫得及此世間像款，著用心志換新來變化家己，互恁會明白甚麼是上帝善良、通歡喜、純全的旨意。

3

(THR) In-ūi góa tùi só͘ hō͘ góa ê un kā lín tiong-kan ta̍k lâng kóng, lín só͘ siūⁿ lâi chhún-to̍k ka-kī, m̄ thang pôaⁿ-kè tī eng-kai siūⁿ ê; só͘ siūⁿ tio̍h an-hūn lâi siūⁿ, chiàu Siōng-tè só͘ siúⁿ-sù ta̍k lâng sìn ê hūn-liōng.

(BCL) 因為我對所互我的恩給恁中間逐人講，恁所想來忖　家己，呣通過佇應該想的；所想著安份來想，照上帝所賞賜逐人信的份量。

4

(THR) In-ūi chhin-chhiūⁿ lán chı̍t sin ū pah-thé, nā-sī pah-thé ê kong-iōng bô lóng saⁿ-tâng;

(BCL) 因為親像咱一身有百體，若是百體的功用無攏相同；

5

(THR) án-ni lán chōe-chōe lâng tiàm-tī Ki-tok chòe chı̍t sin, ta̍k ê saⁿ-kāng chòe thé.

(BCL) 按呢咱多多人佇基督做一身，逐個相共做體。

6

(THR) Lán chiàu só͘ hō͘ lán ê un, í-keng tit-tio̍h un-sù, kok bô saⁿ-tâng; he̍k-sī chòe sian-ti, chiū tio̍h chiàu sìn ê hūn-liōng lâi kóng;

(BCL) 咱照所互咱的恩，已經得著恩賜，各無相同。或是做先知，就著照信的份量來講，

7

(THR) he̍k-sī pān tāi-chì, tio̍h tì-ì tī pān tāi-chì;

(BCL) 或是辦代誌，著致意佇辦代誌；或是教示人的，著致意佇教示；

8

(THR) he̍k-sī kà-sī lâng ê, tio̍h tì-ì tī kà-sī; he̍k-sī khòan-bián ê, tio̍h tì-ì tī khòan-bián; chiu-chō͘ ê, tio̍h ēng sı̍t-sim; tī-lí ê, tio̍h ēng un-khûn; lîn-bín ê, tio̍h ēng hoaⁿ-hí.

(BCL) 或是勸勉的，著致意佇勸勉；賙助的，著用實心；治理的，著用殷勤；憐憫的，著用歡喜。

9

(THR) Thiàⁿ, tio̍h bô ké; òan-hūn pháiⁿ, chhin-kūn hó;

(BCL) 疼著無假；怨恨歹，親近好。

10

(THR) thiàⁿ hiaⁿ-tī, tio̍h saⁿ chhin-ài; kèng-tiōng lâng, tio̍h saⁿ chhui-chun;

(BCL) 疼兄弟，著相親愛；敬重人，著相推尊。

11

(THR) lūn un-khûn, m̄ thang pîn-tōaⁿ; lūn sim-chì, tio̍h jia̍t-jia̍t; lūn Chú, tio̍h ho̍k-sāi;

(BCL) 論殷勤，呣通貧憚。論心志著熱熱，論主著服事。

12

(THR) tī ǹg-bāng tio̍h hoaⁿ-hí; tī hōan-lān tio̍h thun-lún; tī kî-tó, tio̍h siông-siông;

(BCL) 佇向望著歡喜，佇患難著吞，佇祈禱著常常。

13

(THR) sèng-tô͘ só͘ khiàm-kheh ê, chiū kiong-kip i; chhut-gōa lâng, tio̍h tì-ì hó khóan-thāi in.

(BCL) 聖徒所欠缺的就供給伊；出外人著致意好款待。

14

(THR) Khún-tio̍k lín ê, tio̍h kā in chiok-hok; tio̍h chiok-hok, bo̍h-tit chiù-chó͘.

(BCL) 窘逐恁的，著給祝福；著祝福，莫得咒詛。

15

(THR) Kap hoaⁿ-hí ê lâng saⁿ-kap hoaⁿ-hí; kap thî-khàu ê lâng saⁿ-kap thî-khàu.

(BCL) 及歡喜的人相及歡喜；及啼哭的人相及啼哭。

16

(THR) Saⁿ khóan-thāi, tio̍h tâng chı̍t iūⁿ ê sim; sim-chì bo̍h-tit hò͘ⁿ-ko; tio̍h chhek-chiū pi-bî ê; bo̍h-tit lia̍h ka-kī chòe ū tì-sek.

(BCL) 相款待著同一樣的心；心志莫得好高，著促就卑微的；莫得掠家己做有智識。

17

(THR) Bo̍h-tit ēng pháiⁿ pò pháiⁿ; tī chèng lâng ê bīn-chêng, tio̍h tô͘-bô͘ chiah ê hó-sū.

(BCL) 莫得用歹報歹；佇眾人的面前著圖謀諸個好事。

18

(THR) Nā ōe tit thang kap chèng lâng hô, chiū tio̍h chīn-la̍t kap in hô.

(BCL) 若會得通及眾人和，就著盡力及和。

19

(THR) Só͘ thiàⁿ ê hiaⁿ-tī ah, bo̍h-tit ka-kī sin-oan, tio̍h lún-khì, khah hó; in-ūi ū kì-chài kóng, Chú kóng, Sin-oan chāi-tī góa, góa beh pò-èng i.

(BCL) 所疼的兄弟啊，莫得家己伸冤，著　氣卡好；因為有記載講：「主講：『伸冤在佇我，我欲報應伊。』

20

(THR) Nā sī lí ê tùi-te̍k iau, tio̍h hō͘ i chia̍h; chhùi-ta, tio̍h hō͘ i lim; in-ūi kiâⁿ án-ni sī chiong jia̍t-jia̍t ê hé-thòaⁿ thia̍p tī i ê thâu-khak téng.

(BCL) 若是你的對敵枵，著互伊食，嘴乾，著互伊飲；因為行按呢是將熱熱的火炭疊佇伊的頭殼頂。」

21

(THR) Bo̍h-tit hō͘ pháiⁿ khah-iâⁿ, tio̍h ēng hó khah-iâⁿ pháiⁿ.

(BCL) 莫得互歹卡贏，著用好卡贏歹。

Bible Color Mark

• 台語漢字羅馬本
• 巴克禮全羅