箴言 第 1 章

1

(THR) Í-sek-lia̍t ông Tāi-pı̍t ê kiáⁿ Só͘-lô-bûn ê chim-giân.

(BCL) 以色列王大衛的子所羅門的箴言：

2

(THR) Beh hō͘ lâng ōe hiáu-tit tì-hūi kap kà-sī, Bêng-pe̍k thong-ta̍t ê ōe;

(BCL) 欲互人會曉得智慧及教示，明白通達的話，

3

(THR) Hō͘ lâng siū kà-sī, ōe ēng tì-hūi pān tāi-chì, Ēng kong-gī, phòaⁿ-tòan, chèng-tı̍t;

(BCL) 互人受教示會用智慧辦代誌，用公義、判斷、正直，

4

(THR) Hō͘ gōng-tı̍t ê lâng ū lêng-khiàu, Hō͘ siàu-liân lâng ū tì-sek kap kè-e̍k;

(BCL) 互戇直的人有靈竅，互少年人有智識及計劃，

5

(THR) Hō͘ tì-hūi ê lâng thiaⁿ-kìⁿ, ke-thiⁿ ha̍k-būn; Hō͘ chhang-miâ ê lâng tit-tio̍h chin ê kiàn-sek;

(BCL) 互智慧的人聽見，加添學問，互聰明的人得著真的見識，

6

(THR) Hō͘ lâng bêng-pe̍k chim-giân kap só͘ chhut ê chhai.

(BCL) 互人明白箴言及所出的猜。

7

(THR) Kèng-ùi Iâ-hô-hoa sī tì-sek ê kun-pún; Gû-gōng ê lâng biáu-sī tì-hūi kap kà-sī.

(BCL) 敬畏耶和華是智識的根本；愚戇的人藐視智慧及教示。

8

(THR) Góa ê kiáⁿ, tio̍h thiaⁿ lí ê lāu-pē ê kàu-tok; M̄-thang khì-sak lí ê lāu-bú ê kà-sī.

(BCL) 我的子，著聽你的老父的教督，呣通棄拺你的老母的教示；

9

(THR) In-ūi che beh chòe lí thâu-khak-téng ê súi-bō, Lí ê ām-kún ê kim-liān.

(BCL) 因為這欲做你頭殼頂的娞帽，你的頷頸的金鍊。

10

(THR) Góa ê kiáⁿ, pháiⁿ-lâng nā ín-iú lí, Lí m̄-thang thàn i.

(BCL) 我的子，歹人若引誘你，你呣通趁伊。

11

(THR) In nā kóng, Lí kap góan khì, Lán lâi bih-teh thâi lâng, Bô in-toaⁿ tng-tán bô-chōe ê lâng,

(BCL) 若講：你及阮去，咱來匿人，無因端當等無罪的人；

12

(THR) Lán chhin-chhiūⁿ im-hú kā in o̍ah-o̍ah thun--lo̍h-khì: In chhin-chhiūⁿ hām-lo̍h khiⁿ ê lâng, hō͘ lán chòe chı̍t-ē thun--lo̍h-khì;

(BCL) 咱親像陰府，給活活吞落去；親像陷落坑的人，互咱做一下吞落去；

13

(THR) Lán beh tit-tio̍h ta̍k-iūⁿ ê pó-mı̍h, Ēng só͘ chhiúⁿ-ê, tún-móa lán ê chhù;

(BCL) 咱欲得著逐樣的寶物，用所搶的，囤滿咱的厝；

14

(THR) Lí lâi jı̍p góan ê tóng, Tāi-ke ū kong-kiōng ê gûn-tē.

(BCL) 你來入阮的黨，大家有公共的銀袋；

15

(THR) Góa ê kiáⁿ, bo̍h-tit kap in tâng kiâⁿ, Iok-sok lí ê kha bo̍h-tit ta̍h in ê lō͘.

(BCL) 我的子，莫得及同行，約束你的腳莫得踏的路。

16

(THR) In-ūi in ê kha cháu-khì kiâⁿ-pháiⁿ, In kóaⁿ-kín beh hō͘ lâng lâu-huih.

(BCL) 因為，的腳走去行歹；趕緊欲互人流血，

17

(THR) Siat lô-bāng hō͘ chiáu-á khòaⁿ-kìⁿ, Che sī khang-khang.

(BCL) 設羅網互鳥仔看見，這是空空。

18

(THR) Chiah ê lâng bih-teh sī lâu in ka-kī ê huih, Tng-tán sī hāi ka-kī ê sìⁿ-miā.

(BCL) 諸個人匿，是流家己的血；當等，是害家己的生命。

19

(THR) Kìⁿ-nā tham châi-lī--ê, in ê lō͘ sī án-ni, Chiū-sī chhiúⁿ-the̍h ka-kī ê sìⁿ-miā.

(BCL) 見若貪財利者，的路是按呢；就是搶提家己的生命。

20

(THR) Tì-hūi tī koe-lō͘ tōa-siaⁿ kiò, Tī khui-khoah ê só͘-chāi chhut i ê siaⁿ.

(BCL) 智慧佇街路大聲叫，佇開闊的所在出伊的聲，

21

(THR) Tī lāu-jia̍t ê koe-lō͘-thâu, tōa-siaⁿ kiò, Tī siâⁿ-mn̂g-kháu, tī siâⁿ-lāi, kóng-chhut i ê ōe;

(BCL) 佇鬧熱的街路頭大聲叫，佇城門口，佇城內講出伊的話，

22

(THR) Kóng, Gōng-tı̍t lâng ài gōng-tı̍t, Bú-bān lâng ài bú-bān, Gû-gōng lâng òan-hūn tì-sek, beh kàu sím-mı̍h sî ah?

(BCL) 講：戇直人愛戇直，侮慢人愛侮慢，愚戇人怨恨智識，欲到甚麼時啊？

23

(THR) Góa chek-pī lín, lín tio̍h o̍at-tńg; Khòaⁿ ah, góa beh ēng góa ê sîn kàng-lo̍h hō͘ lín, Ēng góa ê ōe chí-sī lín.

(BCL) 我責備恁，恁著越轉；看啊，我欲用我的神降落互恁，用我的話指示恁。

24

(THR) In-ūi góa bat kiò, lín m̄-thiaⁿ; Góa bat chhun-chhiú, bô lâng tì-ì;

(BCL) 因為我曾叫，恁呣聽；我曾伸手，無人致意；

25

(THR) Lín hóan-tńg khòaⁿ-khin góa it-chhè ê khòan-kài, M̄-khéng siū góa ê chek-pī.

(BCL) 恁反轉看輕我一切的勸戒，呣肯受我的責備。

26

(THR) Só͘-í lín tú-tio̍h hōan-lān, góa beh chhìn-chhiò, Lín tú-tio̍h kiaⁿ-hiâⁿ, góa beh lâng-gīn.

(BCL) 所以恁抵著患難，我欲凊笑；恁抵著驚惶，我欲弄哏。

27

(THR) Lín ê kiaⁿ-hiâⁿ chhin-chhiūⁿ kông-hong chhe-lâi, Lín ê chai-hō chhin-chhiūⁿ kńg-lê-hong sàu-lâi, Hōan-lān thòng-khó͘ lîm-kàu lín sin-chiūⁿ.

(BCL) 恁的驚惶，親像狂風吹來；恁的災禍，親像捲螺風掃來；患難痛苦臨到恁身上。

28

(THR) Hit-sî in beh kiû góa, góa m̄-thiaⁿ, Chhiat-chhiat chhē góa, chhē bōe tio̍h.

(BCL) 彼時，欲求我，我呣聽，切切尋我，尋著。

29

(THR) In-ūi in òan-hūn tì-sek, Bô hoaⁿ-hí kèng-ùi Iâ-hô-hoa.

(BCL) 因為，怨恨智識，無歡喜敬畏耶和華，

30

(THR) M̄-thiaⁿ góa ê khòan-kài, Biáu-sī góa ê chek-pī.

(BCL) 呣聽我的勸戒，藐視我的責備，

31

(THR) Só͘-í in beh chia̍h ka-kī kiâⁿ-chòe ê ké-chí, Hō͘ in tit-tio̍h só͘ kè-bô͘ kàu pá-ià.

(BCL) 所以欲食家己行做的果子，互得著所計謀到飽厭。

32

(THR) Gōng-tı̍t lâng ê pōe-biū beh hō͘ i tì-kàu sí, Gû-gōng lâng an-ia̍t, beh hō͘ i tì-kàu bia̍t-bô.

(BCL) 戇直人的悖謬，欲互伊致到死；愚戇人安逸，欲互伊致到滅無。

33

(THR) To̍k-to̍k thiaⁿ-thàn góa ê beh an-jiân khiā-khí; Beh hióng-siū an-chēng, bô kiaⁿ tú-tio̍h chai-ē.

(BCL) 獨獨聽趁我的，欲安然徛起，欲享受安靜，無驚抵著災禍。

Bible Color Mark

• 台語漢字羅馬本
• 巴克禮全羅