約翰福音 第 8 章

1

(THR) Ta̍k lâng chiū tò-khì in tau; Iâ-so͘ khì Kaⁿ-ná soaⁿ.

(BCL) 逐人就倒去兜；耶穌去橄欖山，

2

(THR) . Thàu-chá koh kàu tī tiān-nı̍h, peh-sìⁿ lóng chiū-kūn I; I chiū chē-teh lâi kà-sī in.

(BCL) 透早閣到佇殿裡。百姓攏就近伊，伊就坐，來教示。

3

(THR) . Keng-ha̍k-sū kap Hoat-lī-sài lâng tòa chı̍t ê hū-jîn-lâng lâi, sī tī kiâⁿ kan-îm ê sî hō͘ lâng lia̍h-tio̍h-ê;

(BCL) 經學士及法利賽人帶一個婦仁人來，是佇行姦淫的時互人掠著的，已經互伊徛佇中央，

4

(THR) . í-keng hō͘ i khiā tī tiong-ng, in chiū tùi Iâ-so͘ kóng, Sian-siⁿ, chit ê hū-jîn-lâng sī tú-tú kiâⁿ kan-îm ê sî hō͘ lâng lia̍h-tio̍h.

(BCL) 就對耶穌講：「先生，此個婦仁人是抵抵行姦淫的時互人掠著。

5

(THR) . Mô͘-se tī lu̍t-hoat bēng-lēng góan ēng chio̍h-thâu tìm-sí chit hō ê hū-jîn-lâng, taⁿ lí kóng cháiⁿ-iūⁿ?

(BCL) 摩西佇律法命令阮用石頭擲死此號的婦仁人。今你講怎樣？」

6

(THR) . In kóng án-ni sī beh chhì Iâ-so͘, ài tit-tio̍h ū phāng thang kò I. Iâ-so͘ chiū àⁿ io, ēng chńg-thâu-á siá-jī tī thô͘-kha.

(BCL) 講按呢，是欲試耶穌，愛得著有縫通告伊。耶穌就俯腰，用指頭仔寫字佇土腳。

7

(THR) . In iû-gôan mn̄g I bô soah. Iâ-so͘ chiū thêng sin khí-lâi, tùi in kóng, Lín tiong-kan bô chōe ê lâng thang tāi-seng ēng chio̍h-thâu tìm i.

(BCL) 猶原問伊無息，耶穌就挺身起來，對講：「恁中間無罪的人，通代先用石頭擲伊。」

8

(THR) . Chiū koh àⁿ io, ēng chńg-thâu-á siá-jī tī thô͘-kha.

(BCL) 就閣俯腰，用指頭仔寫字佇土腳。

9

(THR) . In thiaⁿ-liáu, tùi lāu kàu siàu-liân, chı̍t-ê chı̍t-ê lóng chhut-khì; chí-ū Iâ-so͘ ka-kī tī-teh, hū-jîn-lâng iû-gôan khiā tī tiong-ng.

(BCL) 聽了，對老到少年，一個一個攏出去，只有耶穌家己佇，婦仁人猶原徛佇中央。

10

(THR) . Iâ-so͘ thêng sin khí-lâi kā i kóng, Hū-jîn-lâng ah, in tī tá-lo̍h? Bô lâng tēng lí ê chōe mah?

(BCL) 耶穌挺身起來，給伊講：「婦仁人啊，佇叨落？無人定你的罪嗎？」

11

(THR) . I kóng, Chú ah, bô. Iâ-so͘ kóng, Góa ia̍h bô tēng lí ê chōe; khì ah; taⁿ í-āu bo̍h-tit koh hōan-chōe.

(BCL) 伊講：「主啊，無。」耶穌講：「我亦無定你的罪。去啊，今以後莫得閣犯罪！」

12

(THR) . Iâ-so͘ koh kā chèng lâng kóng, Góa sī sè-kan ê kng; tè góa ê lâng bô kiâⁿ tī àm, hóan-tńg beh ū o̍ah-miā ê kng.

(BCL) 耶穌閣給眾人講：「我是世間的光。隨我的人，無行佇暗，反轉欲有活命的光。」

13

(THR) . Hoat-lī-sài lâng chiū kā I kóng, Lí ūi-tio̍h pún-sin chòe kan-chèng; lí ê kan-chèng m̄ sī chin.

(BCL) 法利賽人就給伊講：「你為著本身做干證，你的干證呣是真。」

14

(THR) . Iâ-so͘ ìn kóng, Góa sui-bóng ūi-tio̍h pún-sin chòe kan-chèng, góa ê kan-chèng ia̍h sī chin; in-ūi góa chai pún-sin tùi tá-lo̍h lâi, tùi tá-lo̍h khì; lín m̄ chai góa tùi tá-lo̍h lâi, tùi tá-lo̍h khì.

(BCL) 耶穌應講：「我雖罔為著本身做干證，我的干證亦是真；因為我知本身對叨落來，對叨落去；恁呣知我對叨落來，對叨落去。

15

(THR) . Lín chiàu jio̍k-thé gí-tòan lâng; góa bô gí-tòan lâng.

(BCL) 恁照肉體擬斷人，我無擬斷人。

16

(THR) . Góa chiū nā gí-tòan, góa ê gí-tòan sī chin; in-ūi góa m̄ sī ka-kī tī-teh, sī góa kap chhe góa ê Pē saⁿ-kap tī-teh.

(BCL) 我就若擬斷，我的擬斷是真；因為我呣是家己佇，是我及差我的父相及佇。

17

(THR) . Koh tī lín ê lu̍t-hoat ū kì-chài, Nn̄g lâng ê kan-chèng chiū-sī chin.

(BCL) 閣佇恁的律法有記載：『二人的干證就是真。』

18

(THR) . Góa sī ūi-tio̍h ka-kī chòe kan-chèng, chhe góa ê Pē ia̍h ūi-tio̍h góa kan-chèng.

(BCL) 我是為著家己做干證，差我的父亦為著我干證。」

19

(THR) . In chiū kā i kóng, Lí ê Pē tī tá-lo̍h? Iâ-so͘ ìn kóng, Lín m̄ bat góa, ia̍h m̄ bat góa ê Pē; lín nā bat góa, chiū ia̍h bat góa ê Pē.

(BCL) 就給伊講：「你的父佇叨落？」耶穌應講：「恁呣識我，亦呣識我的父；恁若識我，就亦識我的父。」

20

(THR) . Iâ-so͘ tī tiān-nı̍h kà-sī lâng, tī khò͘-pâng lāi kóng chiah ê ōe; ia̍h bô lâng lia̍h I, in-ūi I ê sî iáu-bē kàu.

(BCL) 耶穌佇殿裡教示人，佇庫房內講諸個話，亦無人掠伊，因為伊的時猶未到。

21

(THR) . Iâ-so͘ koh kā in kóng, Góa beh khì lah, lín beh chhē góa, ia̍h beh sí tī lín ê chōe; góa khì ê só͘-chāi, lín bōe-ōe kàu.

(BCL) 耶穌閣給講：「我欲去啦，恁欲尋我，亦欲死佇恁的罪。我去的所在，恁會到。」

22

(THR) . Iû-thài lâng chiū kóng, I kóng, Góa khì ê só͘-chāi, lín bōe-ōe kàu, kiám sī beh chū-chīn mah?

(BCL) 猶太人就講：「伊講『我去的所在，恁會到』，豈是欲自盡嗎？」

23

(THR) . Iâ-so͘ kā in kóng, Lín sī tùi ē-bīn, góa sī tùi téng-bīn; lín sī tùi chit sè-kan; góa m̄ sī tùi chit sè-kan.

(BCL) 耶穌給講：「恁是對下面，我是對頂面；恁是對此世間，我呣是對此世間。

24

(THR) . Só͘-í góa ū kā lín kóng, lín beh sí tī lín ê chōe; in-ūi lín nā m̄ sìn góa sī I, chiū lín beh sí tī lín ê chōe.

(BCL) 所以我有給恁講，恁欲死佇恁的罪。因為恁若呣信我是伊，就恁欲死佇恁的罪。」

25

(THR) . In chiū kā I kóng, Lí sī chī-chūi? Iâ-so͘ kā in kóng, Chiū-sī góa tùi khí-thâu só͘ kā lín kóng ê.

(BCL) 就給伊講：「你是是誰？」耶穌給講：「就是我對起頭所給恁講的。

26

(THR) . Góa ū chōe-chōe hāng beh gī-lūn lín, beh phòaⁿ-tòan lín; to̍k-to̍k chhe góa ê sī chin; góa só͘ tùi I thiaⁿ-kìⁿ ê, chiū thôan hō͘ sè-kan.

(BCL) 我有多多項欲議論恁，欲判斷恁；獨獨差我的是真，我所對伊聽見的，就傳互世間。」

27

(THR) . In m̄ chai I só͘ tùi in kóng ê sī chí Pē.

(BCL) 呣知伊所對講的是指父。

28

(THR) . Iâ-so͘ chiū kóng, Lín kú-khí Jîn-chú ê sî, chiū chai góa sī I, ia̍h góa só͘ kiâⁿ ê bô chı̍t hāng tùi ka-kī; sī chiàu Pē só͘ kà-sī góa ê, lâi kóng chiah-ê.

(BCL) 耶穌就講：「恁舉起人子的時，就知我是伊，亦我所行的無一項對家己。是照父所教示我的來講諸個。

29

(THR) . Chhe góa ê kap góa tī-teh; I bô pàng góa ka-kī tī-teh; in-ūi góa siông-siông kiâⁿ I só͘ hoaⁿ-hí ê.

(BCL) 差我的及我佇，伊無放我家己佇，因為我常常行伊所歡喜的。」

30

(THR) . Tng Iâ-so͘ kóng chiah ê ōe ê sî, chōe-chōe lâng sìn I.

(BCL) 當耶穌講諸個話的時，多多人信伊。

31

(THR) . Iâ-so͘ chiū tùi sìn I ê Iû-thài lâng kóng, Lín nā siông-siông tiàm tī góa ê tō-lí, chiū chin-chiàⁿ sī góa ê ha̍k-seng;

(BCL) 耶穌就對信伊的猶太人講：「恁若常常佇我的道理，就真正是我的學生；

32

(THR) . Lín beh bat chin-lí, ia̍h chin-lí beh hō͘ lín chū-iû.

(BCL) 恁欲識真理，亦真理欲互恁自由。」

33

(THR) . In ìn I kóng, Góan chiah-ê sī A-pek-la̍h-hán ê hō͘-è, chiông-lâi bē bat chòe lâng ê lô͘-châi; lí cháiⁿ-iūⁿ kóng, Lín beh tit-tio̍h chū-iû ah?

(BCL) 應伊講：「阮諸個是亞伯拉罕的後裔，從來未曾做人的奴才。你怎樣講『恁欲得著自由』啊？」

34

(THR) . Iâ-so͘ ìn kóng, Góa sı̍t-sı̍t kā lín kóng, Kìⁿ-nā hōan chōe ê, chiū-sī chōe ê lô͘-châi.

(BCL) 耶穌應講：「我實實給恁講，見若犯罪的就是罪的奴才。

35

(THR) . Lô͘-châi bô éng-éng tòa tī ke-lāi; kiáⁿ chiū éng-éng tòa.

(BCL) 奴才無永永住佇家內；子就永永住。

36

(THR) . Só͘-í Kiáⁿ nā hō͘ lín chū-iû, lín chiū chin-chiàⁿ chū-iû.

(BCL) 所以子若互恁自由，恁就真正自由。

37

(THR) . Góa chai lín sī A-pek-la̍h-hán ê hō͘-è; to̍k-to̍k lín ài beh thâi góa, in-ūi góa ê tō-lí bô chûn tī lín ê sim.

(BCL) 我知恁是亞伯拉罕的後裔，獨獨恁愛欲我，因為我的道理無存佇恁的心。

38

(THR) . Góa tùi góa ê Pē khòaⁿ-kìⁿ ê, góa chiū kóng i; lín tùi lín ê pē thiaⁿ-kìⁿ ê, lín chiū kiâⁿ i.

(BCL) 我對我的父看見的，我就講伊；恁對恁的父聽見的，恁就行伊。」

39

(THR) . In ìn I kóng, Góan ê pē chiū-sī A-pek-la̍h-hán. Iâ-so͘ kā in kóng, Lín nā sī A-pek-la̍h-hán ê kiáⁿ, chiū beh kiâⁿ A-pek-la̍h-hán ê só͘ kiâⁿ.

(BCL) 應伊講：「阮的父就是亞伯拉罕。」耶穌給講：「恁若是亞伯拉罕的子，就欲行亞伯拉罕的所行。

40

(THR) . Taⁿ góa sī chiong góa tùi Siōng-tè só͘ thiaⁿ ê chin-lí lâi kā lín kóng ê lâng, ia̍h lín ài beh thâi góa; che m̄ sī A-pek-la̍h-hán ê só͘ kiâⁿ.

(BCL) 今我是將我對上帝所聽的真理來給恁講的人，亦恁愛欲我，這呣是亞伯拉罕的所行。

41

(THR) . Lín sī kiâⁿ lín ê pē ê só͘ kiâⁿ. In kā I kóng, Góan m̄ sī tùi kan-îm lâi siⁿ; góan ū chı̍t ê Pē, chiū-sī Siōng-tè.

(BCL) 恁是行恁的父的所行。」給伊講：「阮呣是對姦淫來生；阮有一個父，就是上帝。」

42

(THR) . Iâ-so͘ kā in kóng, Nā sī Siōng-tè chòe lín ê Pē, lín chiū thiàⁿ góa; in-ūi góa sī tùi Siōng-tè chhut; ia̍h lâi kàu chia, m̄ sī chū-choan lâi, sī I chhe góa.

(BCL) 耶穌給講：「若是上帝做恁的父，恁就疼我；因為我是對上帝出，亦來到遮，呣是自專來，是伊差我。

43

(THR) . Lín bô bêng góa ê ōe sī cháiⁿ-iūⁿ? Sī in-ūi lín bōe-ōe thiaⁿ góa ê tō-lí.

(BCL) 恁無明我的話是怎樣？是因為恁會聽我的道理。

44

(THR) . Lín só͘ tùi i chhut ê pē, chiū-sī Mô͘-kúi; lín ê pē ê su-io̍k, lín ài beh kiâⁿ i. I tùi khí-thâu chòe thâi-lâng ê, bô khiā-tiâu tī chin-lí, in-ūi i lāi-bīn bô chin-lí. I kóng pe̍h-chha̍t ê sî, chiū-sī tùi ka-kī só͘ ū ê lâi kóng; in-ūi i sī pe̍h-chha̍t ê, ia̍h chòe pe̍h-chha̍t ê pē.

(BCL) 恁所對伊出的父就是魔鬼，恁的父的私慾恁愛欲行伊。伊對起頭做人的，無徛住佇真理，因為伊內面無真理。伊講白賊的時就是對家己所有的來講；因為伊是白賊的，亦做白賊的父。

45

(THR) . In-ūi góa kóng chin-lí, lín m̄ sìn góa.

(BCL) 因為我講真理，恁呣信我。

46

(THR) . Lín tiong-kan chī-chūi gí góa ū chōe? Góa nā kóng chin-lí, lín siáⁿ-sū m̄ sìn góa?

(BCL) 恁中間是誰擬我有罪？我若講真理，恁啥事呣信我？

47

(THR) . Tùi Siōng-tè chhut-ê thiaⁿ Siōng-tè ê ōe; lín só͘-í m̄ thiaⁿ, in-ūi lín m̄ sī tùi Siōng-tè chhut.

(BCL) 對上帝出的，聽上帝的話；恁所以呣聽，因為恁呣是對上帝出。」

48

(THR) . Iû-thài lâng ìn I kóng, Góan kóng lí sī Sat-má-lī-a lâng, koh hōan-tio̍h kúi, kiám bô chin tio̍h?

(BCL) 猶太人應伊講：「阮講你是撒瑪利亞人，閣患著鬼，豈無真著？」

49

(THR) . Iâ-so͘ ìn kóng, Góa m̄ sī hōan-tio̍h kúi; góa sī chun-kèng góa ê Pē, nā-sī lín bú-bān góa.

(BCL) 耶穌應講：「我呣是患著鬼；我是尊敬我的父，若是恁侮慢我。

50

(THR) . Góa bô kiû ka-kī ê êng-kng; ū chı̍t-ê teh thòe góa kiû koh sím-phòaⁿ ê.

(BCL) 我無求家己的榮光，有一個替我求閣審判的。

51

(THR) . Góa sı̍t-sı̍t kā lín kóng, Lâng nā siú góa ê tō-lí, chiū éng-óan bô kìⁿ-tio̍h sí.

(BCL) 我實實給恁講，人若守我的道理，就永遠無見著死。」

52

(THR) . Iû-thài lâng kā I kóng, Taⁿ góan chai lí sī hōan-tio̍h kúi. A-pek-la̍h-hán sí, chiah ê sian-ti ia̍h sí, nā-sī lí kóng, Lâng nā siú góa ê tō-lí, chiū éng-óan bô sí.

(BCL) 猶太人給伊講：「今阮知你是患著鬼。亞伯拉罕死，諸個先知亦死，若是你講：『人若守我的道理，就永遠無死。』

53

(THR) . Lí kiám pí góan ê chó͘ A-pek-la̍h-hán khah tōa mah? i í-keng sí, chiah ê sian-ti ia̍h sí, lí ka-kī sǹg chòe sím-mı̍h lâng ah?

(BCL) 你豈比阮的祖亞伯拉罕卡大嗎？伊已經死，諸個先知亦死，你家己算做甚麼人啊？」

54

(THR) . Iâ-so͘ ìn kóng, Góa nā êng-kng ka-kī, góa ê êng-kng chiū m̄ chiūⁿ-sǹg; êng-kng góa ê sī góa ê Pē; chiū-sī lín só͘ kóng chòe lín ê Siōng-tè ê.

(BCL) 耶穌應講：「我若榮光家己，我的榮光就呣上算；榮光我的是我的父，就是恁所講做恁的上帝者。

55

(THR) . Lín m̄ bat I; to̍k-to̍k góa bat I; góa nā kóng, M̄ bat I, chiū góa sī pe̍h-chha̍t chhin-chhiūⁿ lín; to̍k-to̍k góa bat I, ia̍h siú I ê tō-lí.

(BCL) 恁呣識伊；獨獨我識伊。我若講呣識伊，就我是白賊親像恁；獨獨我識伊，亦守伊的道理。

56

(THR) . Lín ê chó͘ A-pek-la̍h-hán ke̍k hoaⁿ-hí, sī beh khòaⁿ-kìⁿ góa ê jı̍t-chí; khòaⁿ-kìⁿ, chiū hoaⁿ-hí.

(BCL) 恁的祖亞伯拉罕極歡喜，是欲看見我的日子，看見就歡喜。」

57

(THR) . Iû-thài lâng chiū tùi I kóng, Lí bē chiūⁿ gō͘-cha̍p hè, kiám bat khòaⁿ-kìⁿ A-pek-la̍h-hán mah?

(BCL) 猶太人就對伊講：「你未上五十歲豈曾看見亞伯拉罕嗎？」

58

(THR) . Iâ-so͘ kā in kóng, Góa sı̍t-sı̍t kā lín kóng, Bē ū A-pek-la̍h-hán, góa chiū tī-teh.

(BCL) 耶穌給講：「我實實給恁講，未有亞伯拉罕我就佇。」

59

(THR) . In chiū the̍h chio̍h-thâu beh tìm I; nā-sī Iâ-so͘ ka-kī ún-ba̍t, tùi tiān-tn̂g chhut-khì.

(BCL) 就提石頭欲擲伊；若是耶穌家己隱密，對殿堂出去。

Bible Color Mark

• 台語漢字羅馬本
• 巴克禮全羅