以賽亞書 第 12 章

1

(THR) Kàu hit-jı̍t, lí beh kóng, Iâ-hô-hoa ah, góa beh kám-siā Lí, in-ūi Lí sui-jiân bat siū-khì góa, taⁿ Lí ê siū-khì í-keng soah, Lí ia̍h an-ùi góa.

(BCL) 到彼日你欲講：耶和華啊，我欲感謝你！因為你雖然曾受氣我，今你的受氣已經息；你亦安慰我。

2

(THR) Khòaⁿ ah, Siōng-tè sī chín-kiù góa-ê; góa beh óa-khò I, ia̍h bô kiaⁿ; in-ūi Chú Iâ-hô-hoa sī góa ê khùi-la̍t, sī góa ê si-koa; I ia̍h chiâⁿ-chòe kiù-góa--ê.

(BCL) 看啊！上帝是拯救我者；我欲倚靠伊，亦無驚。因為主耶和華是我的氣力，是我的詩歌，伊亦成做救我者。

3

(THR) Lín beh tùi kiù-un ê chúi-chôaⁿ hoaⁿ-hí lâi chhiūⁿ chúi.

(BCL) 恁欲對救恩的水泉歡喜來汲水。

4

(THR) Tī hit-jı̍t lín beh kóng, Tio̍h kám-siā Iâ-hô-hoa, kiû-kiò I ê miâ, chiong I só͘-kiâⁿ--ê pò-iông tī lia̍t-pang-tiong, kóng-khí I ê miâ í-keng siū chun chòe-kôaiⁿ.

(BCL) 佇彼日，恁欲講：著感謝耶和華，求叫伊的名；將伊所行的報揚佇列邦中，講起伊的名已經受尊做高。

5

(THR) Lín tio̍h chhiùⁿ-koa o-ló Iâ-hô-hoa; in-ūi I só͘-kiâⁿ--ê chin hián-hek; gōan chit ê tāi-chì piàn-thôan tī thiⁿ-ē.

(BCL) 恁著唱歌謳咾耶和華，因為伊所行的真顯赫；願此個代誌遍傳佇天下。

6

(THR) Sek-an khiā-khí ê peh-sìⁿ ah, lín tio̍h chhut tōa hoaⁿ-hí ê siaⁿ, in-ūi Í-sek-lia̍t ê Sèng--ê tī lín ê tiong-kan chòe-tōa.

(BCL) 錫安徛起的百姓啊，恁著出大歡喜的聲，因為以色列的聖者佇恁的中間做大。

Bible Color Mark

• 台語漢字羅馬本
• 巴克禮全羅