以賽亞書 第 11 章

1

(THR) Tùi Iâ-se ê chhiū-thâu beh hoat chı̍t ki íⁿ, tùi i ê kun só͘ siⁿ ê ki beh kiat ké-chí.

(BCL) 對耶西的樹頭欲發一支芛；對伊的根所生的枝欲結果子。

2

(THR) Iâ-hô-hoa ê sîn beh tiàm tī i, chiū-sī tì-hūi kap chhang-miâ ê sîn, kè-e̍k kap lêng-le̍k ê sîn, tì-sek kap kèng-ùi Iâ-hô-hoa ê sîn;

(BCL) 耶和華的神欲踮佇伊，就是智慧及聰明的神，計劃及能力的神，智識及敬畏耶和華的神。

3

(THR) i beh lia̍h kèng-ùi Iâ-hô-hoa chòe hoaⁿ-hí; i m̄-sī pîn ba̍k-chiu só͘ khòaⁿ-kìⁿ lâi sím-phòaⁿ, ia̍h m̄-sī pîn hī-khang só͘ thiaⁿ-kìⁿ lâi gí-tòan;

(BCL) 伊欲掠敬畏耶和華做歡喜；伊呣是憑目睭所看見來審判，亦呣是憑耳孔所聽見來擬斷；

4

(THR) i beh ēng kong-gī sím-phòaⁿ sòng-hiong lâng, ēng chèng-tı̍t gí-tòan sè-chiūⁿ khiam-pi ê lâng; ēng chhùi-tiong ê kóaiⁿ phah sè-kài, ēng chhùi-tûn ê khì thâi-sí pháiⁿ-lâng.

(BCL) 伊欲用公義審判喪鄉人，用正直擬斷世上謙卑的人，用嘴中的柺拍世界，用嘴唇的氣死歹人。

5

(THR) Kong-gī beh chòe i ê io-tòa, sìn-sı̍t beh chòe i ê seng-khu ê tòa.

(BCL) 公義欲做伊的腰帶；信實欲做伊的身軀的帶。

6

(THR) Chhâi-lông beh kap mî-iûⁿ-á saⁿ-kap tòa, pà kap soaⁿ-iûⁿ-kiáⁿ saⁿ-kap tó--teh; gû-á kap sòe-chiah sai kap pûi ê cheng-siⁿ, chòe sòe-hàn ê gín-ná beh khan in.

(BCL) 豺狼欲及綿羊仔相及住，豹及山羊子相及倒；牛仔及細隻獅及肥的精牲；最細漢的囝仔欲牽。

7

(THR) Gû kap hîm beh saⁿ-kap chia̍h, in ê kiáⁿ beh saⁿ-kap tó-teh; sai beh chia̍h chháu chhin-chhiūⁿ gû.

(BCL) 牛及熊欲相及食；的子欲相及倒；獅欲食草親像牛。

8

(THR) Chia̍h-lin ê gín-ná beh thit-thô tī ok-chôa ê khang-kháu; tn̄g-lin ê gín-ná beh hē chhiú tī to̍k-chôa ê hia̍t.

(BCL) 食奶的囝仔欲佇惡蛇的孔口；斷奶的囝仔欲下手佇毒蛇的穴。

9

(THR) Tī Góa ê sèng-soaⁿ ê piàn-tōe, tek-khak bô sún-siong bô hām-hāi; in-ūi jīn-bat Iâ-hô-hoa ê chai-bat beh chhiong-móa tōe-chiūⁿ, chhin-chhiūⁿ chúi im-móa tī iûⁿ-hái.

(BCL) 佇我的聖山的遍地，的確無損傷無陷害；因為認識耶和華的知識欲充滿地上，親像水淹滿佇洋海。

10

(THR) Kàu hit-jı̍t Iâ-se ê kun-thâu khiā chòe bān peh-sìⁿ ê tōa-kî, lia̍t-pang beh kui-óa I; I an-hioh ê só͘-chāi ū tōa êng-kng.

(BCL) 到彼日，耶西的根頭　做萬百姓的大旗；列邦欲歸倚伊，伊安息的所在有大榮光。

11

(THR) Tng hit-jı̍t Chú beh tē-jī pái chhun-chhiú kiù-sio̍k I ê peh-sìⁿ-tiong só͘ chhun--ê, tùi A-su̍t, Ai-kı̍p, Pa-thek-lô, Kó͘-sı̍t, Í-lân, Sī-ná, Hap-má, kap chèng hái-sū tò--lâi.

(BCL) 當彼日，主欲第二擺伸手救贖伊的百姓中所剩者，對亞述、埃及、巴忒羅、古實、以攔、示拿、哈瑪，及眾海嶼倒來。

12

(THR) I beh ǹg lia̍t-kok khiā tōa-kî, chio-chı̍p Í-sek-lia̍t siū kóaⁿ-sòaⁿ ê lâng, chū-chı̍p Iû-tāi sì-sòaⁿ ê lâng, tùi tōe ê sì-ke̍k lâi.

(BCL) 伊欲向列國　大旗，招集以色列受趕散的人，聚集猶大四散的人，對地的四極來。

13

(THR) Í-hoat-liân ê òan-tò͘ beh siau-bô, Iû-tāi ê tùi-te̍k beh tû-bia̍t; Í-hoat-liân bô beh òan-tò͘ Iû-tāi, Iû-tāi bô beh tùi-te̍k Í-hoat-liân.

(BCL) 以法蓮的怨妒欲消無；猶大的對敵欲除滅。以法蓮無欲怨妒猶大，猶大無欲對敵以法蓮。

14

(THR) In beh ǹg-sai pe--khì, phah tī Hui-lī-sū lâng ê keng-thâu-téng, saⁿ-kap chhiúⁿ tang-hng ê lâng; chhun-chhiú tī Í-tong kap Mô͘-ap; A-bûn cho̍k iā beh sūn-ho̍k in.

(BCL) 欲向西飛去，拍佇非利士人的肩頭頂，相及搶東方的人，伸手佇以東及摩押；亞捫族亦欲順服。

15

(THR) Iâ-hô-hoa beh hō͘ Ai-kı̍p hái ê káng ta--khì; ēng tōa-hong ia̍t I ê chhiú tī Tōa-hô ê téng-bīn, hō͘ hô pun-chòe chhit-tiâu, lâng thoa-ôe ōe--tit kè--khì.

(BCL) 耶和華欲互埃及海的港乾去，用大風拽伊的手佇大河的頂面，互河分做七條，人拖鞋會得過去。

16

(THR) Ūi-tio̍h I só͘ chhun ê peh-sìⁿ, chiū-sī tùi A-su̍t chhun tò-lâi--ê, beh ū chı̍t-tiâu tōa-lō͘ chhin-chhiūⁿ tong-jı̍t ūi-tio̍h Í-sek-lia̍t tùi Ai-kı̍p tōe chiūⁿ-lâi--ê chı̍t-iūⁿ.

(BCL) 為著伊所剩的百姓，就是對亞述剩倒來者，欲有一條大路，親像當日為著以色列對埃及地上來者一樣。

Bible Color Mark

• 台語漢字羅馬本
• 巴克禮全羅