創世記 第 14 章

1

(THR) Tng Àm-la̍h-hui chòe Sī-ná ông, A-lio̍k chòe Í-la̍h-sat ông, Ki-tāi-ló-má chòe Í-lân ông, Thê-ta̍t chòe Ko-ìn ông ê sî,

(BCL) 當暗拉非做示拿王，亞略做以拉撒王，基大老瑪做以攔王，提達做戈印王的時，

2

(THR) in lâi kong-kek Só͘-to-má ông Pí-la̍h, Gô-mô͘-la̍h ông Pí-sa, Ap-má ông Sī-la̍p, Sé-phian ông Sī-bí-pia̍t, í-kı̍p Pí-la̍h ông (Pí-la̍h chiū-sī Só-jíⁿ)

(BCL) 來攻擊所多瑪王比拉、蛾摩拉王比沙、押瑪王示納、洗扁王施米別，以及比拉王；比拉就是瑣珥。

3

(THR) In lóng chū-hōe tī Se-têng ê soaⁿ-kok; Se-têng soaⁿ-kok chiū-sī Iâm-hái.

(BCL) 攏聚會佇西訂的山谷；西訂山谷就是鹽海。

4

(THR) In ho̍k-sāi Ki-tāi-ló-má cha̍p-jī nî kú; kàu cha̍p-saⁿ-nî pōe-pōan.

(BCL) 服事基大老瑪十二年久，到十三年背叛。

5

(THR) Cha̍p-sì-nî Ki-tāi-ló-má, kap tâng hōe-bêng chiah ê ông, lóng lâi, tī A-te̍k-lu̍t-ka-lêng thâi-iâⁿ Lí-ho̍at-im lâng, tī Hâm So͘-se lâng, tī Sa-bî-ki-lia̍t-têng Í-bí lâng,

(BCL) 十四年，基大老瑪及同會盟諸個王攏來佇亞特律加寧，贏利乏音人，佇涵蘇西人，佇沙微基列亭以米人，

6

(THR) tī Hô-lī lâng ê Se-jíⁿ soaⁿ Hô-lī lâng, kàu kūn tī khòng-iá ê Í-le̍k-pa-lân.

(BCL) 佇何利人的西珥山何利人，到近佇曠野的伊勒巴蘭。

7

(THR) In tò-tńg kàu An-bı̍t-pa, chiū-sī Ka-te-su, kong-kek A-má-le̍k chôan-tōe, kap khiā-khí tī Hap-sé-sūn-tha-má ê A-mô͘-lī lâng.

(BCL) 倒轉到安密巴，就是加低斯，攻擊亞瑪力全地，及徛起佇哈洗遜他瑪的亞摩利人。

8

(THR) Tùi hit-tia̍p Só͘-to-má ông, Gô-mô͘-la̍h ông, Ap-má ông, Sé-phian ông, Pí-la̍h ông, (Pí-la̍h chiū-sī Só-jíⁿ), lóng chhut-lâi tī Se-têng ê soaⁿ-kok pâi-tīn, kap in kau-chiàn;

(BCL) 對彼霎所多瑪王、蛾摩拉王、押瑪王、洗扁王、比拉王（比拉就是瑣珥）攏出來，佇西訂的山谷排陣，及交戰，

9

(THR) chiū-sī kap Í-lân ông Ki-tāi-ló-má, Ko-ìn ông Thê-ta̍t, Sī-ná ông Àm-la̍h-hui, Í-la̍h-sat ông A-lio̍k kau-chiàn; sì ê ông tùi-te̍k gō͘ ê ông.

(BCL) 就是及以攔王基大老瑪、戈印王提達、示拿王暗拉非、以拉撒王亞略交戰；四個王對敵五個王。

10

(THR) Se-têng soaⁿ-kok lóng sī chio̍h-iû khiⁿ; Só͘-to-má Gô-mô͘-la̍h chiah ê ông tô-cháu, po̍ah tī-hia; kî-û-ê cháu chiūⁿ-soaⁿ.

(BCL) 西訂山谷攏是石油坑。所多瑪蛾摩拉諸個王逃走，跋佇遐，其餘的走上山。

11

(THR) In chiū chiong Só͘-to-má Gô-mô͘-la̍h ê châi-bu̍t, í-kı̍p in ê kan-niû lóng chhiúⁿ, chòe in khì.

(BCL) 就將所多瑪蛾摩拉的財物，以及的乾糧攏搶做去；

12

(THR) Koh chiong A-pek-lân ê tı̍t Lô-tek, kap i ê châi-bu̍t chhiúⁿ-khì; hit-sî Lô-tek tòa tī Só͘-to-má.

(BCL) 閣將亞伯蘭的姪羅得及伊的財物搶去。彼時羅得住佇所多瑪。

13

(THR) Ū chı̍t ê tô-cháu ê lâng lâi kā Hi-pek-lâi lâng A-pek-lân kóng; hit-sî A-pek-lân khiā-khí tī A-mô͘-lī lâng Bān-lī ê siōng-chhiū hit só͘-chāi, Bān-lī kap Í-sı̍t-kok kap A-nái lóng sī hiaⁿ-tī, ū kap A-pek-lân liân-bêng.

(BCL) 有一個逃走的人來給希伯來人亞伯蘭講；彼時亞伯蘭徛起佇亞摩利人幔利的橡樹彼所在。幔利及以實各及亞乃攏是兄弟，有及亞伯蘭聯盟。

14

(THR) A-pek-lân thiaⁿ-kìⁿ i ê tı̍t hō͘ lâng lia̍h-khì, chiū chhōa seng-ióng tī i ê ke-nı̍h cheng-liān ê chòng-teng, saⁿ-pah cha̍p-poeh lâng, tui-jip kàu Tàn.

(BCL) 亞伯蘭聽見伊的姪互人掠去，就導生養佇伊的家裡精練的壯丁三百十八人，追到但，

15

(THR) I kap i ê lô͘-po̍k thàu-mî pun-tūi, kong-kek-in; tui kàu Tāi-má-sek tò-pêng ê Hô-pa.

(BCL) 伊及伊的奴僕透暝分隊攻擊，追到大馬色倒旁的何巴，

16

(THR) Chiong it-chhè ê châi-bu̍t chhiúⁿ tò-tńg, liân i ê tı̍t-á Lô-tek kap i ê châi-bu̍t, í-kı̍p hū-lú peh-sìⁿ, ia̍h lóng chhiúⁿ tò-tńg.

(BCL) 將一切的財物搶倒轉，連伊的姪仔羅得及伊的財物，以及婦女、百姓亦攏搶倒轉。

17

(THR) A-pek-lân thâi-iâⁿ Ki-tāi-ló-má, í-kı̍p kap i chòe-tīn chiah ê ông, tò-lâi ê sî, Só͘-to-má ông chhut-lâi, kàu Sa-bí ê soaⁿ-kok, ngiâ-chih i; Sa-bí ê soaⁿ-kok chiū-sī Ông ê soaⁿ-kok.

(BCL) 亞伯蘭贏基大老瑪以及及伊做陣諸個王倒來的時，所多瑪王出來，到沙微的山谷迎接伊；沙微的山谷就是王的山谷。

18

(THR) Ia̍h ū Sat-léng ông Be̍k-ki-sé-tek tòa piáⁿ kap chiú chhut-lâi; i sī Chì-kôaiⁿ Siōng-tè ê chè-si;

(BCL) 亦有撒冷王麥基洗德帶餅及酒出來；伊是至高上帝的祭司。

19

(THR) chiok-hok i kóng, Gōan thiⁿ-tōe ê Chú, Chì-kôaiⁿ ê Siōng-tè sù-hok A-pek-lân.

(BCL) 祝福伊，講：「願天地的主、至高的上帝賜福亞伯蘭！

20

(THR) Chì-kôaiⁿ ê Siōng-tè chiong tùi-te̍k kau tī lí ê chhiú, eng-kai o-ló I. A-pek-lân chiong lóng-chóng só͘ tit-tio̍h-ê, cha̍p-hūn the̍h chı̍t-hūn hō͘ i.

(BCL) 至高的上帝將對敵交佇你的手，應該謳咾伊！」亞伯蘭將攏總所得著的十份提一份互伊。

21

(THR) Só͘-to-má ông kā A-pek-lân kóng, Chiong lâng kui góa; mı̍h lóng hō͘ lí.

(BCL) 所多瑪王給亞伯蘭講：「將人歸我，物攏互你！」

22

(THR) A-pek-lân kā Só͘-to-má ông kóng, Góa ū kí thiⁿ-tōe ê Chú Chì-kôaiⁿ ê Siōng-tè Iâ-hô-hoa lâi chiù-chōa,

(BCL) 亞伯蘭給所多瑪王講：「我有指天地的主──至高的上帝耶和華來咒誓：

23

(THR) hōan-nā lí ê mı̍h, chiū chı̍t tiâu sòaⁿ chı̍t tiâu ôe-tòa, góa lóng m̄-the̍h, bián-tit lí kóng, Góa hō͘ A-pek-lân hó-gia̍h;

(BCL) 凡若你的物，就一條線、一條鞋帶，我攏呣提，免得你講：『我互亞伯蘭好額！』

24

(THR) chí-ū siàu-liân lâng só͘ chia̍h ê, í-kı̍p kap góa tâng-kiâⁿ ê lâng A-nái, Í-sı̍t-kok, Bān-lī, só͘ èng-tit ê hūn-gia̍h, thang chhut-chāi in the̍h.

(BCL) 只有少年人所食的，以及及我同行的人亞乃、以實各、幔利所應得的份額，通出在提。」

Bible Color Mark

• 台語漢字羅馬本
• 巴克禮全羅