以西結書 第 48 章

1

(THR) Chi-phài ê miâ chiàu ē-tóe só͘ kì--ê; tùi ke̍k-pak ê kài tùi Hi-te̍k-lûn ê lō͘, kàu Hap-má chhut-jı̍p ê só͘-chāi, tī Tāi-má-sek kéng-kài Hap-sat-í-lân ǹg-pak kūn-óa Hap-má ê tōe, tùi-tang kàu sai; Tàn, chı̍t-hūn.

(BCL) 支派的名照下底所記的：對極北的界，對希特倫的路到哈馬出入的所在，佇大馬色境界哈薩以難。向北近倚哈馬的地對東到西，但一份。

2

(THR) Óa-kūn Tàn ê tōe-kài, tùi-tang kàu sai; A-siat, chı̍t-hūn.

(BCL) 倚近但的地界，對東到西，亞設一份。

3

(THR) Óa-kūn A-siat ê tōe-kài, tùi tang kàu sai; Ná-hut-tha-lī, chı̍t-hūn.

(BCL) 倚近亞設的地界，對東到西，拿弗他利一份。

4

(THR) Óa-kūn Ná-hut-tha-lī ê tōe-kài, tùi-tang kàu-sai; Má-ná-se, chı̍t-hūn.

(BCL) 倚近拿弗他利的地界，對東到西，瑪拿西一份。

5

(THR) Óa-kūn Má-ná-se ê tōe-kài, tùi-tang kàu-sai; Í-hoat-liân, chı̍t-hūn.

(BCL) 倚近瑪拿西的地界，對東到西，以法蓮一份。

6

(THR) Óa-kūn Í-hoat-liân ê tōe-kài, tùi-tang kàu sai; Liû-piān, chı̍t-hūn.

(BCL) 倚近以法蓮的地界，對東到西，流便一份。

7

(THR) Óa-kūn Liû-piān ê tōe-kài, tùi-tang kàu sai; Iû-tāi, chı̍t-hūn.

(BCL) 倚近流便的地界，對東到西，猶大一份。

8

(THR) Óa-kūn Iû-tāi ê tōe-kài, tùi-tang kàu sai, sī lín só͘ hiàn ê tōe, khoah nn̄g-bān gō͘-chheng ko-chhioh, tùi-tang kàu-sai, tn̂g kap hiah ê hūn ê chı̍t-ê saⁿ-tâng, sèng-só͘ tī hit tiong-kan.

(BCL) 倚近猶大的地界，對東到西，是恁所獻的地，闊二萬五千竿尺。對東到西，長及許個份的一個相同，聖所佇彼中間。

9

(THR) Lín só͘ hiàn hō͘ Iâ-hô-hoa ê tōe tio̍h tn̂g nn̄g-bān gō͘-chheng ko-chhioh, khoah chı̍t-bān.

(BCL) 恁所獻互耶和華的地著長二萬五千竿尺，闊一萬。

10

(THR) Só͘ hiàn ê sèng-tōe tio̍h kui hō͘ chè-si; pak--sì tn̂g nn̄g-bān gō͘-chheng, sai--sì khoah chı̍t-bān, tang--sì khoah chı̍t-bān, lâm--sì tn̂g nn̄g-bān gō͘-chheng; Iâ-hô-hoa ê sèng-só͘ tī hit tiong-ng.

(BCL) 所獻的聖地著歸互祭司，北勢長二萬五千，西勢闊一萬，東勢闊一萬，南勢長二萬五千。耶和華的聖所佇彼中央。

11

(THR) Tio̍h kui hō͘ Sat-tok ê kiáⁿ-sun-tiong chiâⁿ-chòe sèng ê chè-si, chiū-sī kò͘-siú Góa só͘ kau-tài--ê; tng Í-sek-lia̍t lâng kiâⁿ bê-lō͘ ê sî, in bô kiâⁿ bê-lō͘ chhin-chhiūⁿ Lī-bī lâng kiâⁿ bê-lō͘.

(BCL) 著歸互撒督的子孫中成做聖的祭司，就是顧守我所交代的。當以色列人行迷路的時，無行迷路親像利未人行迷路。

12

(THR) Chit-ê tio̍h kui hō͘ in, chiū-sī tùi só͘ hiàn ê chôan-tōe-tiong hiàn hō͘ in chòe chì-sèng--ê, óa-kūn Lī-bī lâng ê tōe-kài.

(BCL) 此個著歸互，就是對所獻的全地中獻互做至聖者。倚近利未人的地界。

13

(THR) Lī-bī lâng só͘ tit-tio̍h ê tōe tio̍h tn̂g nn̄g-bān gō͘-chheng, khoah chı̍t-bān, kap chè-si ê tōe-kài saⁿ-tâng; lóng-chóng tn̂g nn̄g-bān gō͘-chheng, khoah chı̍t-bān.

(BCL) 利未人所得著的地著長二萬五千，闊一萬，及祭司的地界相同，攏總長二萬五千，闊一萬。

14

(THR) Chit ê tōe m̄-thang bōe, m̄-thang tùi-ōaⁿ, khí-thâu-se̍k ê mı̍h m̄-thang kui hō͘ pa̍t-lâng; in-ūi sī kui tī Iâ-hô-hoa chòe-sèng--ê.

(BCL) 此個地呣通賣，呣通對換，起頭熟的物呣通歸互別人，因為是歸佇耶和華做聖者。

15

(THR) Só͘-chhun gō͘-chheng khoah ê tōe, sī tī hit ê nn̄g-bān gō͘-chheng ê thâu-chêng, tio̍h chòe pêng-siông ê lō͘-ēng, thang khí siâⁿ, khí chhù, chòe kau-iá ê tōe; siâⁿ tio̍h tī tiong-ng.

(BCL) 所剩五千闊的地，是佇彼個二萬五千的頭前，著做平常的路用，通起城起厝做郊野的地。城著佇中央。

16

(THR) I ê chhùn-chhioh chiū-sī án-ni; pak-bīn sì-chheng gō͘-pah, lâm-bīn sì-chheng gō͘-pah, tang-bīn sì-chheng gō͘-pah, sai-bīn sì-chheng gō͘-pah.

(BCL) 伊的寸尺就是按呢：北面四千五百，南面四千五百，東面四千五百，西面四千五百。

17

(THR) Siâⁿ tio̍h kau-iá; ǹg-pak nn̄g-pah gō͘-cha̍p, ǹg-lâm nn̄g-pah gō͘-cha̍p, ǹg-tang nn̄g-pah gō͘-cha̍p, ǹg-sai nn̄g-pah gō͘-cha̍p.

(BCL) 城著郊野，向北二百五十，向南二百五十，向東二百五十，向西二百五十。

18

(THR) Í-gōa só͘ chhun ê tn̂g kap só͘ hiàn ê sèng-tōe saⁿ-tâng, ǹg-tang chı̍t-bān, ǹg-sai chı̍t-bān; koh kap só͘ hiàn ê sèng-tōe saⁿ-tâng; kî-tiong só͘ chhut-sán beh hō͘ siâⁿ-lāi chòe-kang ê lâng chòe chia̍h-mı̍h.

(BCL) 以外所剩的，長及所獻的聖地相同，向東一萬，向西一萬，閣及所獻的聖地相同；其中所出產欲互城內做工的人做食物。

19

(THR) Tùi Í-sek-lia̍t chèng chi-phài ê tiong-kan tī siâⁿ-lāi chòe-kang--ê beh tī-hia chèng-choh.

(BCL) 對以色列眾支派的中間，佇城內做工者，欲佇遐種作。

20

(THR) Lín só͘ hiàn ê chôan-tōe, tn̂g nn̄g-bān gō͘-chheng, khoah nn̄g-bān gō͘-chheng; lín só͘ hiàn ê sèng-tōe kap sio̍k tī siâⁿ ê tōe sī sù-hong--ê.

(BCL) 恁所獻的全地：長二萬五千，闊二萬五千。恁所獻的聖地及屬佇城的地，是四方的。

21

(THR) Só͘ hiàn ê sèng-tōe í-kı̍p sio̍k tī siâⁿ ê tōe, siang-pêng chhun ê tōe tio̍h kui tī jîn-kun, só͘ hiàn ê tōe tī hit nn̄g-bān gō͘-chheng ê thâu-chêng kàu tang--sì ê kài, koh ǹg-sai tī hit nn̄g-bān gō͘-chheng ê thâu-chêng kàu sai--sì ê kài, kap hiah ê hūn ê tōe saⁿ-tâng, lóng kui tī jîn-kun; só͘ hiàn ê sèng-tōe kap tiān ê sèng-tōe lóng tī hit lāi-bīn.

(BCL) 所獻的聖地以及屬佇城的地，雙旁剩的地著歸佇人君。所獻的地佇彼二萬五千的頭前到東勢的界，閣向西佇彼二萬五千的，頭前到西勢的界，及許個份的地相同，攏歸佇人君。所獻的聖地及殿的聖地攏佇彼內面，

22

(THR) Koh tùi Lī-bī lâng ê gia̍p, tùi sio̍k tī siâⁿ ê gia̍p, sī sio̍k jîn-kun-ê ê tiong-kan, tī Iû-tāi ê kài kap Piān-ngá-bín ê kài ê tiong-kan, lóng kui jîn-kun ê.

(BCL) 閣對利未人的業，對屬佇城的業（是屬人君的的中間），佇猶大的界及便雅憫的界的中間，攏歸人君的。

23

(THR) Lūn-kàu kî-û ê chi-phài; tùi-tang kàu-sai; Piān-ngá-bín, chı̍t-hūn.

(BCL) 論到其餘的支派，對東到西，便雅憫一份。

24

(THR) Óa-kūn Piān-ngá-bín ê tōe-kài tùi-tang kàu-sai; Se-biān chı̍t-hūn.

(BCL) 倚近便雅憫的地界對東到西，西緬一份。

25

(THR) Óa-kūn Se-biān ê tōe-kài tùi-tang kàu-sai; Í-sat-ka, chı̍t-hūn.

(BCL) 倚近西緬的地界對東到西，以薩迦一份。

26

(THR) Óa-kūn Í-sat-ka ê tōe-kài tùi-tang kàu-sai; Se-pò͘-lûn, chı̍t-hūn.

(BCL) 倚近以薩迦的地界對東到西，西布倫一份。

27

(THR) Óa-kūn Se-pò͘-lûn ê tōe-kài tùi-tang kàu-sai; Ka-tek, chı̍t-hūn.

(BCL) 倚近西布倫的地界對東到西，迦得一份。

28

(THR) Óa-kūn Ka-tek ê tōe-kài, lâm-pêng ǹg-lâm, hit ê tōe-kài tùi Tha-má kàu Bí-lī-pa Ka-tē-su ê chúi, kàu Ai-kı̍p ê khoe thàng-kàu tōa-hái.

(BCL) 倚近迦得的地界南旁向南彼個地界對他瑪到米利巴加低斯的水，到埃及的溪到大海。

29

(THR) Che sī lín tio̍h liam-khau pun hō͘ Í-sek-lia̍t ê chi-phài chòe-gia̍p ê tōe, in ta̍k-ê só͘ tit-tio̍h ê gia̍p chiū-sī án-ni; che sī Chú Iâ-hô-hoa só͘ kóng--ê.

(BCL) 這是恁著拈鬮分互以色列的支派做業的地，逐個所得著的業就是按呢。這是主耶和華所講的。

30

(THR) Tùi siâⁿ chhut--khì ê lō͘ sī chiàu ē-bīn só͘ kì ê; tī pak-bīn chiàu só͘ niû--ê, sì-chheng gō͘-pah ko-chhioh.

(BCL) 對城出去的路是照下面所記的：佇北面照所量的四千五百竿尺。

31

(THR) Siâⁿ hiah ê mn̂g tio̍h chiàu Í-sek-lia̍t chi-phài ê miâ; pak-bīn ū saⁿ ê mn̂g; Liû-piān ê mn̂g, chı̍t-ê; Iû-tāi ê mn̂g, chı̍t-ê; Lī-bī ê mn̂g, chı̍t-ê.

(BCL) 城許個門著照以色列支派的名。北面有三個門，流便的門一個，猶大的門一個，利未的門一個；

32

(THR) Tang-bīn sì-chheng gō͘-pah, ū saⁿ ê mn̂g; Iok-sek ê mn̂g, chı̍t-ê; Piān-ngá-bín ê mn̂g, chı̍t-ê; Tàn ê mn̂g, chı̍t-ê.

(BCL) 東面四千五百，有三個門，約瑟的門一個，便雅憫的門一個，但的門一個；

33

(THR) Lâm-bīn sì-chheng gō͘-pah, ū saⁿ ê mn̂g; Se-biān ê mn̂g, chı̍t-ê; Í-sat-ka ê mn̂g, chı̍t-ê; Se-pò͘-lûn ê mn̂g, chı̍t-ê.

(BCL) 南面四千五百，有三個門，西緬的門一個，以薩迦的門一個，西布倫的門一個；

34

(THR) Sai-bīn sì-chheng gō͘-pah, ū saⁿ ê mn̂g; Ka-tek ê mn̂g, chı̍t-ê; A-siat ê mn̂g, chı̍t-ê; Nà-hut-tha-lī ê mn̂g, chı̍t-ê.

(BCL) 西面四千五百，有三個門，迦得的門一個，亞設的門一個，拿弗他利的門一個。

35

(THR) Siâⁿ sì-ûi kiōng chı̍t-bān poeh-chheng; tùi hit-jı̍t í-āu siâⁿ ê miâ kiò-chòe, Iâ-hô-hoa tī-hia.

(BCL) 城四圍共一萬八千。對彼日以後，城的名叫做「耶和華佇遐。」

Bible Color Mark

• 台語漢字羅馬本
• 巴克禮全羅