傳道書 第 12 章

1

(THR) Lí tio̍h tī siàu-liân ê jı̍t, kì-liām chhòng-chō lí ê Chú, chiū-sī hōan-lān ê jı̍t iáu-bē kàu, iā lí só͘ kóng, Góa bô thang tī i khòai-lo̍k, hiah ê nî iáu-bē kūn ê sî.

(BCL) 你著佇少年的日，記念創造你的主，就是患難的日猶未到，也你所講，我無通佇伊快樂，許個年猶未近的時。

2

(THR) tī jı̍t kap kng kap ge̍h kap chhiⁿ bē piàn-chòe o͘-àm, í-kı̍p hō͘ kè-sin, hûn bē koh lâi ê tāi-seng.

(BCL) 佇日、及光、及月、及星未變做黑暗，以及雨過身雲未閣來的代先，

3

(THR) Tng hit-jı̍t, kò͘-chhù--ê ngia̍uh-ngia̍uh-chhoah; ū la̍t ê lâng so͘-io, oe-bō--ê, in-ūi in chió, chiū soah; tùi thang-á khòaⁿ--chhut-khì--ê lóng o͘-àm;

(BCL) 當彼日顧厝的愕愕惙，有力的人酥腰，挨磨者因為少就息，對窗仔看出去的攏黑暗；

4

(THR) thàng koe-lō͘ ê mn̂g koaiⁿ--teh, oe-bō ê siaⁿ sòe-sòe; chiáu-á chı̍t-ē háu, lâng chiū khí-lâi; chhiùⁿ-koa ê cha-bó͘-gín-ná iā lóng kàng-kē;

(BCL) 街路的門關，挨磨的聲細細，鳥仔一下哮，人就起來，唱歌的查某囝仔也攏降低。

5

(THR) kìⁿ-tio̍h kôaiⁿ chiū kiaⁿ, tī lō͘-tiong iā ū só͘ kiaⁿ-ùi; hēng-chhiū khui hoe, chháu-meh chòe tāng-tàⁿ, io̍k-sim lóng bô--khì; in-ūi lâng kui tī i éng-óan ê chhù, ai-khàu ê lâng óng-lâi tī koe-lō͘;

(BCL) 見著高就驚，佇路中也有所驚畏，杏樹開花，草蜢做重擔，慾心攏無去；因為人歸佇伊永遠的厝，哀哭的人往來佇街路。

6

(THR) tng gûn-liān-á bē tn̄g, kim-óaⁿ bē phòa, tī chúi-chôaⁿ-piⁿ ê chúi-pân bē sún-hōai, ka-lak bē pháiⁿ tī chíⁿ-téng;

(BCL) 當銀鍊仔會斷，金碗會破，佇水泉邊的水瓶會損害，枷轆會歹佇井頂，

7

(THR) tîn-ai kui thô͘ lâi hóan-pún, lêng-hûn kui tī hō͘ i lâi ê Siōng-tè ê tāi-seng, tio̍h kì-liām chhòng-chō lí ê Chú.

(BCL) 塵埃歸土來返本，靈魂歸佇互伊來的上帝的代先，著紀念創造你的主。

8

(THR) Thôan-tō--ê kóng, Khang-hu ê khang-hu, hôan-sū lóng sī khang-hu.

(BCL) 傳道者講：「空虛的空虛，凡事攏是空虛。」

9

(THR) Koh in-ūi Thôan-tō--ê ū tì-hūi, i iû-gôan kà-sī peh-sìⁿ chai-bat; iā chēng-chēng siūⁿ, chhâ-khó, koh chiàu chhù-sū pâi-lia̍t chōe-chōe chim-giân.

(BCL) 閣因為傳道者有智慧，伊猶原教示百姓知識；也靜靜想，查考，閣照次序排列多多箴言。

10

(THR) Thôan-tō--ê choan-sim chhē thang hoaⁿ-hí ê ōe, sī chiàu chèng-tı̍t siá ê sêng-sı̍t ōe.

(BCL) 傳道者專心尋通歡喜的話，是照正直寫的誠實話。

11

(THR) Tì-hūi ê lâng ê ōe chhin-chhiūⁿ chhì; hōe-tiúⁿ ê ōe chhin-chhiūⁿ tèng-tiâu ê teng, lóng sī tùi chı̍t ê bo̍k-chiá só͘ sù ê.

(BCL) 智慧的人的話親像茦；會長的話親像釘住的釘，攏是對一個牧者所賜的。

12

(THR) Góa ê kiáⁿ ah, iáu ū chı̍t-chân, lí tio̍h siū khòan-kài; tù chheh chōe, bô kiông-chīn; tha̍k-chheh chōe, seng-khu ōe ià-siān.

(BCL) 我的子啊，猶有一層，你著受勸戒；著冊多，無窮盡；讀冊多，身軀會厭倦。

13

(THR) Chiah ê sū lóng í-keng thiaⁿ-liáu lah; kiat-bé chiū-sī kèng-ùi Siōng-tè, kín-sīn siú I ê kài-bēng; che chiū-sī lâng chiâu-pī ê pún-hūn.

(BCL) 諸個事攏已經聽了啦，結尾就是：敬畏上帝，謹慎守伊的誡命，這就是人齊備的本分。

14

(THR) In-ūi kìⁿ só͘-chòe-ê kap it-chhè ún-ba̍t ê sū, bô-lūn sī hó sī pháiⁿ, Siōng-tè lóng beh sím-phòaⁿ.

(BCL) 因為見所做的，及一切隱密的事，無論是好是歹，上帝攏欲審判。

Bible Color Mark

• 台語漢字羅馬本
• 巴克禮全羅