傳道書 第 11 章

1

(THR) Tio̍h chiong lí ê bí-niû iā tī chúi-bīn; in-ūi kè chōe-chōe jı̍t, chiū beh tit-tio̍h.

(BCL) 著將你的米糧撒佇水面，因為過多多日就欲得著。

2

(THR) Hūn-gia̍h tio̍h pun chòe chhit á poeh; in-ūi lí m̄-chai chiong-lâi ū sím-mı̍h chai-ē kàu tōe-chiūⁿ.

(BCL) 份額著分做七抑八，因為你呣知將來有甚麼災禍到地上。

3

(THR) Hûn nā ū hō͘ móa-móa, chiū piàⁿ-lo̍h tī tōe-chiūⁿ; chhiū nā tó ǹg lâm á-sī ǹg pak, chhiū tó tī sím-mı̍h só͘-chāi, chiū tiāⁿ-tiāⁿ tī-hia.

(BCL) 雲若有雨滿滿，就傾落佇地上。樹若倒向南，抑是向北，樹倒佇甚麼所在，就定定佇遐。

4

(THR) Khòaⁿ hong-sè--ê, bô beh iā-chéng; khòaⁿ hûn-sek-ê, bô beh siu-koah.

(BCL) 看風勢的，無欲撒種；看雲色的，無欲收割。

5

(THR) Hong só͘ chhe ê lō͘, lí m̄-chai, kut-hâi tī īn-hū ê thai cháiⁿ-iūⁿ seng-tióng, lí iā m̄-chai; án-ni, kiâⁿ bān-sū ê Siōng-tè só͘-chòe-ê, lí iû-gôan bōe tit-tio̍h chai.

(BCL) 風所吹的路，你呣知，骨骸佇孕婦的胎怎樣生長，你也呣知；按呢，行萬事的上帝所做的，你猶原得著知。

6

(THR) Chá-khí-sî tio̍h iā lí ê chéng-chí, ê-hng-sî iā m̄-thang thêng lí ê chhiú; in-ūi lí m̄-chai chit-ê hit-ê toh-lo̍h chı̍t-ê beh bō͘-sēng; á-sī nn̄g-ê beh pîⁿ-pîⁿ hó.

(BCL) 早起時著撒你的種子，下昏時也呣通停你的手，因為你呣知此個彼個叨落一個欲茂盛；抑是二個欲平平好。

7

(THR) Kng chin-chiàⁿ sī hó, ba̍k-chiu khòaⁿ-kìⁿ kng iā sī thang hoaⁿ-hí.

(BCL) 光真正是好，目睭看見光也是通歡喜。

8

(THR) Lâng o̍ah chōe-chōe nî, chiū tio̍h khòai-lo̍k chōe-chōe nî; chóng-sī iā tio̍h siūⁿ kàu o͘-àm ê jı̍t-chí, in-ūi jı̍t-chí beh chōe-chōe; só͘ beh lâi-ê lóng sī khang-hu.

(BCL) 人活多多年，就著快樂多多年；總是也著想到黑暗的日子。因為日子欲多多，所欲來的攏是空虛。

9

(THR) Siàu-liân lâng ah, lí tī siàu-liân ê sî tio̍h khòai-lo̍k; tī siàu-liân ê jı̍t-chí hō͘ lí ê sim an-ùi lí, iā tio̍h chiàu lí ê sim só͘ ài-ê, kap ba̍k-chiu só͘ khòaⁿ-kìⁿ-ê lâi kiâⁿ, chóng-sī tio̍h chai, ūi-tio̍h che it-chhè ê sū, Siōng-tè beh sím-phòaⁿ lí.

(BCL) 少年人啊，你佇少年的時著快樂。佇少年的日子，互你的心安慰你，也著照你的心所愛的，及目睭所看見的來行；總是著知，為著這一切的事，上帝欲審判你。

10

(THR) Só͘-í tio̍h hō͘ iu-būn lī-khui lí ê sim, iā tùi lí ê seng-khu tû-khì pháiⁿ-tāi; in-ūi siàu-liân kap chòng-liân, lóng sī khang-hu.

(BCL) 所以，著互憂悶離開你的心，也對你的身軀除去歹代；因為少年及壯年，攏是空虛。

Bible Color Mark

• 台語漢字羅馬本
• 巴克禮全羅