哥林多後書 第 10 章

1

(THR) Góa Pó-lô, saⁿ kìⁿ-bīn ê sî chiū tī lín tiong-kan chòe pi-bî, saⁿ lī-khui ê sî chiū ǹg lín chòe hó-táⁿ ê, taⁿ ēng Ki-tok ê un-jiû sûn-liông ka-kī khǹg lín;

(BCL) 我保羅，相見面的時就佇恁中間做卑微，相離開的時就向恁做好膽的，今用基督的溫柔、純良家己勸恁。

2

(THR) ū lâng phah-sǹg góan sī chiàu jio̍k-thé lâi kiâⁿ, góa phah-sǹg koat-ì tio̍h ēng hó-táⁿ lâi pān in; kiû lín bo̍h-tit hō͘ góa tī saⁿ tùi-bīn ê sî ū chit hō koat-ì ê hó-táⁿ.

(BCL) 有人拍算阮是照肉體來行，我拍算決意著用好膽來辦；求恁莫得互我佇相對面的時有此號決意的好膽。

3

(THR) In-ūi góan sui-jiân tī jio̍k-thé lâi kiâⁿ, m̄ sī chiàu jio̍k-thé lâi kau-chiàn,

(BCL) 因為阮雖然佇肉體來行，呣是照肉體來交戰。

4

(THR) (in-ūi góan kau-chiàn ê khì-kū m̄ sī sio̍k tī jio̍k-thé, sī tī Siōng-tè ê bīn-chêng ū khùi-la̍t kàu-gia̍h thang lâi kong-phòa chiah ê kian-kò͘ ê iâⁿ-chē),

(BCL) 因為阮交戰的器具呣是屬佇肉體，是佇上帝的面前有氣力夠額，通來攻破諸個堅固的營寨，

5

(THR) hōan-nā chiah ê kè-bô͘, í-kı̍p lóng-chóng kôaiⁿ-kôaiⁿ ê mı̍h, só͘ kú-khí lâi chó͘-tòng lâng bat Siōng-tè ê, góan lóng húi-hōai i, chiong lóng-chóng ê liām-thâu lia̍h lâi hō͘ i sūn-ho̍k Ki-tok;

(BCL) 凡若諸個計謀，以及攏總高高的物，所舉起來阻擋人識上帝的，阮攏毀壞伊，將攏總的念頭掠來，互伊順服基督。

6

(THR) koh í-keng pī-pān piān, thèng-hāu lín ôan-chôan sūn-ho̍k, chiah lâi chek-ho̍at lóng-chóng ê bô sūn-ho̍k ê.

(BCL) 閣已經備辦便，聽候恁完全順服，才來責罰攏總的無順服的。

7

(THR) Lín khòaⁿ ba̍k-chêng ah. Nā ū lâng khò ka-kī sī sio̍k Ki-tok ê, i tio̍h koh ka-kī siūⁿ, khòaⁿ i cháiⁿ-iūⁿ sio̍k Ki-tok, góan iā sī án-ni.

(BCL) 恁看目前啊！若有人靠家己是屬基督的，伊著閣家己想，看伊怎樣屬基督，阮也是按呢。

8

(THR) Chú só͘ siúⁿ-sù góan ê kôan sī beh kiàn-lı̍p lín, m̄ sī beh pāi-hōai lín, góan chiū nā ūi-tio̍h chit ê kôan lio̍h-á kè-thâu khoa-kháu, iā put-tì kiàn-siàu;

(BCL) 主所賞賜阮的權，是欲建立恁，呣是欲敗壞恁；阮就若為著此個權略仔過頭誇口，也不致見誚。

9

(THR) bián-tit góa chhin-chhiūⁿ ēng phoe hō͘ lín kiaⁿ.

(BCL) 免得我親像用批互恁驚；

10

(THR) In-ūi ū lâng kóng, I ê phoe tēng-tiōng, koh ū la̍t; nā-sī saⁿ tùi-bīn ê sî, seng-khu nńg-chiáⁿ, kóng ōe sio̍h-sio̍h.

(BCL) 因為有人講：「伊的批　重閣有力，若是相對面的時，身軀軟茈，講話俗俗。」

11

(THR) Hit hō lâng tio̍h siūⁿ, góan saⁿ lī-khui ê sî, phoe-nı̍h kóng ōe sī sím-mı̍h khóan, saⁿ tùi-bīn ê sî chòe sū iā sī án-ni.

(BCL) 彼號人著想，阮相離開的時，批裡講話是甚麼款，相對面的時，做事也是按呢。

12

(THR) Ū lâng ka-kī o-ló, góan m̄ káⁿ kap in lia̍h pîⁿ, kap in pí-phēng; nā-sī in ēng ka-kī phoe-phêng ka-kī, iā ēng ka-kī pí-phēng ka-kī, sī bô tì-sek.

(BCL) 有人家己謳咾，阮呣敢及掠平及比並。若是用家己批評家己，也用家己比並家己，是無智識。

13

(THR) Nā-sī góan bô beh khoa-kháu kè-hūn ê sū, chiū-sī chiàu Siōng-tè só͘ phài hō͘ góan hān-tiāⁿ ê hūn-gia̍h; chit ê hūn-gia̍h lín iā chāi-lāi.

(BCL) 若是阮無欲誇口過份的事，就是照上帝所派互阮限定的份額，此個份額恁也在內。

14

(THR) In-ūi góan m̄ sī pôaⁿ-kè hūn, ná chhin-chhiūⁿ m̄ eng-kai kàu tī lín ê; sī góan thôan Ki-tok ê hok-im iā bat kàu tī lín.

(BCL) 因為阮呣是過份，那親像呣應該到佇恁的；是阮傳基督的福音也曾到佇恁。

15

(THR) Góan m̄ sī kè-hūn lâi khoa-kháu pa̍t lâng ê tio̍h-bôa; chiū-sī ǹg-bāng lín sìn ná chhim, chiū góan tī lín tiong-kan chiàu góa ê hūn-gia̍h, ōe khui-khoah kàu móa-chhut-khì,

(BCL) 阮呣是過份來誇口別人的著磨；就是向望恁信愈深，就阮佇恁中間照我的份額，會開闊到滿出去，

16

(THR) lâi thôan hok-im kàu tī lín kài-gōa ê tōe; bô ēng pa̍t lâng hūn-lāi í-keng chòe piān ê sū lâi khoa-kháu.

(BCL) 來傳福音到佇恁界外的地；無用別人份內已經做便的事來誇口。

17

(THR) Khoa-kháu ê lâng tio̍h ēng Chú lâi khoa-kháu.

(BCL) 誇口的人，著用主來誇口。

18

(THR) In-ūi m̄ sī ka-kī o-ló ê lâng chiūⁿ chhú, chiū-sī Chú só͘ o-ló ê chiūⁿ chhú.

(BCL) 因為呣是家己謳咾的人上取，就是主所謳咾的上取。

Bible Color Mark

• 台語漢字羅馬本
• 巴克禮全羅