列王紀上 第 12 章

1

(THR) Lô-phò-àm khì Sī-kiàm, in-ūi Í-sek-lia̍t chèng-lâng kàu Sī-kiàm, beh siat-lı̍p i chòe-ông.

(BCL) 羅波安去示劍；因為以色列眾人到示劍欲設立伊做王。

2

(THR) Chêng Nî-pat ê kiáⁿ Iâ-lô-phò-àm siám-pī Só͘-lô-bûn ông ê bīn, cháu-khì Ai-kı̍p, tiàm tī-hia. Iâ-lô-phò-àm iáu tī Ai-kı̍p ê sî, thiaⁿ-kìⁿ chit ê sū.

(BCL) 前尼八的子耶羅波安閃避所羅門王的面，走去埃及，踮佇遐（耶羅波安猶佇埃及的時聽見此個事。）

3

(THR) In chhe lâng khì kiò i lâi; Iâ-lô-phò-àm chiū kap Í-sek-lia̍t chôan-hōe lâi kìⁿ Lô-phò-àm, kā i kóng,

(BCL) 差人去叫伊來，耶羅波安就及以色列全會來見羅波安，給伊講：

4

(THR) Lí ê lāu-pē hō͘ góan pē kan-khó͘ ê taⁿ; lí ê lāu-pē só͘ hē tī góan ê khó͘-kang, kap tāng ê taⁿ, kiû lí kiám-khin, góan chiū ho̍k-sāi lí.

(BCL) 「你的老父互阮背艱苦的軛，你的老父所下佇阮的苦工，及重的軛求你減輕，阮就服事你。」

5

(THR) Lô-phò-àm kā in kóng, Lín tò-khì, kàu tē-saⁿ jı̍t koh lâi kìⁿ góa; peh-sìⁿ chiū khì.

(BCL) 羅波安給講：「恁倒去，到第三日閣來見我。」百姓就去。

6

(THR) Lô-phò-am ê lāu-pē Só͘-lô-bûn o̍ah-teh ê sî, ū kun-sûi tī i bīn-chêng ê lāu-lâng. Lô-phò-àm ông kap in gī-lūn, kóng, Lín ū sím-mı̍h kè-chhek, góa thang hê-hok chit ê peh-sìⁿ?

(BCL) 羅波安的老父所羅門活的時，有跟隨佇伊面前的老人，羅波安王及議論，講：「恁有甚麼計策，我通回覆此個百姓。」

7

(THR) In ìn i kóng, Kin-á-jı̍t lí nā gōan chòe chiah ê peh-sìⁿ ê lô͘-po̍k, lâi ho̍k-sāi in, ēng hó-ōe lâi ìn in, in chiū éng-óan chòe lí ê lô͘-po̍k.

(BCL) 應伊講：「今仔日你若願做諸個百姓的奴僕來服事，用好話來應，就永遠做你的奴僕。」

8

(THR) Chóng-sī i kū-cho̍at lāu-lâng só͘ hō͘ i ê kè-chhek, kap hiah-ê khiā tī i bīn-chêng, kap i pîⁿ-ûn ê siàu-liân lâng, chham-siông;

(BCL) 總是伊拒絕老人所互伊的計策，及許個徛佇伊面前及伊平勻的少年人參詳，

9

(THR) kā in kóng, Chit ê peh-sìⁿ ū tùi góa kóng, Lí ê lāu-pē hē tī góan ê taⁿ, kiû lí hō͘ góan khah-khin; taⁿ lín ū sím-mı̍h kè-chhek hō͘ lán thang hê-hok in?

(BCL) 給講：「此個百姓有對我講：『你的老父下佇阮的軛，求你互阮卡輕。』今恁有甚麼計策，互咱通回覆。」

10

(THR) Hiah ê kap i pîⁿ-ûn ê siàu-liân lâng kóng, Chit ê peh-sìⁿ tùi lí kóng, Lí ê lāu-pē hō͘ góan pē tāng ê taⁿ, kiû lí kā góan kiám-khin; lí tio̍h án-ni ìn in kóng, Góa ê bé-cháiⁿ khah-tōa góa ê lāu-pē ê io.

(BCL) 許個及伊平勻的少年人講：「此個百姓對你講：『你的老父互阮背重的軛，求你給阮減輕。』你著按呢應講：『我的尾指卡大我的老父的腰。

11

(THR) Góa ê lāu-pē hō͘ lín pē tāng ê taⁿ, góa beh ke-thiⁿ lín ê taⁿ; góa ê lāu-pē ēng piⁿ kéng-kài lín, góa beh ēng giat-á-thâng kéng-kài lín.

(BCL) 我的老父互恁背重的軛，我欲加添恁的軛！我的老父用鞭警戒恁，我欲用蠍仔蟲警戒恁！』」

12

(THR) Tē-saⁿ jı̍t Iâ-lô-phò-àm kap chèng peh-sìⁿ kàu Lô-phò-àm hia. chiàu ông só͘ bēng-lēng kóng, Tē-saⁿ jı̍t koh lâi góa chia.

(BCL) 第三日耶羅波安及眾百姓到羅波安遐，照王所命令講「第三日閣來我遮」。

13

(THR) Ông ēng pháiⁿ siaⁿ-sàu ìn peh-sìⁿ, pàng-sak lāu-lâng só͘ hiàn ê kè-chhek;

(BCL) 王用歹聲嗽應百姓，放拺老人所獻的計策，

14

(THR) chiàu siàu-liân lâng ê kè-chhek tùi peh-sìⁿ kóng, Góa ê pē hō͘ lín pē tāng ê taⁿ, góa beh ke-thiⁿ lín ê taⁿ; góa ê pē ēng piⁿ kéng-kài lín, góa beh ēng giat-á-thâng kéng-kài lín.

(BCL) 照少年人的計策對百姓講：「我的父互恁背重的軛，我欲加添恁的軛！我的父用鞭警戒恁，我欲用蠍仔蟲警戒恁！」

15

(THR) Ông bô thiaⁿ-thàn peh-sìⁿ; in-ūi chit ê tāi-chì sī chhut tī Iâ-hô-hoa, sī beh èng-giām Iâ-hô-hoa thok Sī-lô lâng A-hi-ngá tùi Nî-pat ê kiáⁿ Iâ-lô-phò-àm só͘ kóng ê ōe.

(BCL) 王無聽趁百姓，因為此個代誌是出佇耶和華，是欲應驗耶和華託示羅人亞希雅對尼八的子耶羅波安所講的話。

16

(THR) Í-sek-lia̍t chèng peh-sìⁿ khòaⁿ-kìⁿ ông bô thiaⁿ-thàn in, peh-sìⁿ chiū tùi ông kóng, Góan tī Tāi-pı̍t ū sím-mı̍h hūn-gia̍h ah? góan kap Iâ-se ê kiáⁿ bô kan-sia̍p; Í-sek-lia̍t ah, tò-khì lín ê pò͘-pîⁿ; Tāi-pı̍t ah, tio̍h kò͘ lí ka-kī ê chhù. Tùi án-ni Í-sek-lia̍t tò-khì in ê pò͘-pîⁿ.

(BCL) 以色列眾百姓看見王無聽趁，百姓就對王講：阮佇大衛有甚麼份額啊！阮及耶西的子無干涉。以色列啊，倒去恁的布棚！大衛啊，著顧你家己的厝！對按呢，以色列倒去的布棚，

17

(THR) Chóng-sī khiā-khí Iû-tāi chiah ê siâⁿ ê Í-sek-lia̍t lâng, Lô-phò-àm iû-gôan chòe in ê ông.

(BCL) 總是徛起猶大諸個城的以色列人，羅波安猶原做的王。

18

(THR) Lô-phò-àm ông chhe kóan-lí chòe-khó͘-kang ê lâng A-to-lân khì; Í-sek-lia̍t chèng-lâng chiū ēng chio̍h-thâu tìm-sí i. Lô-phò-àm ông chiū kóaⁿ-kín chiūⁿ chhia, beh cháu-khì Iâ-lō͘-sat-léng.

(BCL) 羅波安王差管理做苦工的人亞多蘭去，以色列眾人就用石頭擲死伊。羅波安王就趕緊上車，欲走去耶路撒冷。

19

(THR) Tùi án-ni Í-sek-lia̍t hóan-pōan Tāi-pı̍t ke, kàu kin-á-jı̍t.

(BCL) 對按呢，以色列反叛大衛家，到今仔日。

20

(THR) Í-sek-lia̍t chèng-lâng thiaⁿ-kìⁿ Iâ-lô-phò-àm tò-lâi, chiū chhe lâng chhiáⁿ i kàu hōe-chiòng ê bīn-chêng, siat-lı̍p i chòe Í-sek-lia̍t chèng-lâng ê ông. Iû-tāi chi-phài í-gōa, bô lâng tè Tāi-pı̍t ê ke.

(BCL) 以色列眾人聽見耶羅波安倒來，就差人請伊到會眾的面前，設立伊做以色列眾人的王。猶大支派以外，無人隨大衛的家。

21

(THR) Lô-phò-àm kàu Iâ-lō͘-sat-léng ê sî, chiū chū-chı̍p Iû-tāi chôan-ke, kap Piān-ngá-bín chi-phài ê lâng, kiōng cha̍p-poeh-bān lâng, lóng sī kè-kéng ê chiàn-sū, beh kap Í-sek-lia̍t ke kau-chiàn, hō͘ kok-ūi koh kui tī Só͘-lô-bûn ê kiáⁿ Lô-phò-àm.

(BCL) 羅波安到耶路撒冷的時，就聚集猶大全家及便雅憫支派的人共十八萬人，攏是過揀的戰士，欲及以色列家交戰，互國位閣歸佇所羅門的子羅波安。

22

(THR) Chóng-sī Siōng-tè ê ōe lîm-kàu Siōng-tè ê lô͘-po̍k Sī-má-ngá, kóng,

(BCL) 總是上帝的話臨到上帝的奴僕示瑪雅，講：

23

(THR) Lí khì kā Só͘-lô-bûn ê kiáⁿ, Iû-tāi ông Lô-phò-àm, kap Iû-tāi Piān-ngá-bín chôan-ke, í-kı̍p kî-û ê peh-sìⁿ kóng,

(BCL) 「你去給所羅門的子猶大王羅波安及猶大、便雅憫全家，以及其餘的百姓講：

24

(THR) Iâ-hô-hoa án-ni kóng, Lín bo̍h-tit chiūⁿ--khì, bo̍h-tit kap lín ê hiaⁿ-tī Í-sek-lia̍t lâng kau-chiàn; ta̍k-lâng tò-khì i ê ke; in-ūi chit ê tāi-chì chhut tī Góa. In thiaⁿ Iâ-hô-hoa ê ōe, chiū tò-tńg-khì, chiàu Iâ-hô-hoa ê ōe.

(BCL) 『耶和華按呢講：恁莫得上去莫得及恁的兄弟以色列人交戰。逐人倒去伊的家！因為此個代誌出佇我。』」聽耶和華的話，就倒轉去，照耶和華的話。

25

(THR) Iâ-lô-phò-àm tī Í-hoat-liân soaⁿ-tōe khí-chō Sī-kiàm, chiū tiàm tī hit tiong-kan; koh tùi hia chhut-khì, khí Pí-lô͘-i-le̍k.

(BCL) 耶羅波安佇以法蓮山地起造示劍，就踮佇彼中間；閣對遐出去，起毗努伊勒。

26

(THR) Iâ-lô-phò-àm sim-lāi kóng, Taⁿ chit ê kok beh kui Tāi-pı̍t ê ke; chit ê peh-sìⁿ nā chiūⁿ-khì Iâ-lō͘-sat-léng, tī Iâ-hô-hoa ê tiān hiàn-chè, chit ê peh-sìⁿ ê sim beh kui in ê chú Iû-tāi ông Lô-phò-àm; in beh thâi-sí góa, iû-gôan kui Iû-tāi ông Lô-phò-àm.

(BCL) 耶羅波安心內講：「今此個國欲歸大衛的家；

27

(THR)

(BCL) 此個百姓若上去耶路撒冷，佇耶和華的殿獻祭，此個百姓的心欲歸的主──猶大王羅波安，欲死我，猶原歸猶大王羅波安。」

28

(THR) Ông chiū kè-e̍k, chù-chō nn̄g chiah kim ê gû-á, tùi chèng peh-sìⁿ kóng, Lín chiūⁿ-khì Iâ-lō͘-sat-léng, sı̍t-chāi ûi-lân; Í-sek-lia̍t ah, khòaⁿ ah, chiah-ê sī lín ê Siōng-tè, chhōa lín tùi Ai-kı̍p tōe chiūⁿ-lâi-ê.

(BCL) 王就計劃，鑄造二隻金的牛仔，對眾百姓講：「恁上去耶路撒冷實在為難；以色列啊，看啊，諸個是恁的上帝，導恁對埃及地上來的。」

29

(THR) I hē chı̍t-chiah tī Pek-te̍k-lī, hē chı̍t-chiah tī Tàn.

(BCL) 伊下一隻佇伯特利，下一隻佇但。

30

(THR) Chit ê tāi-chì chiâⁿ-chòe chōe; in-ūi peh-sìⁿ khì Tàn, tī hit-chiah ê thâu-chêng pài.

(BCL) 此個代誌成做罪，因為百姓去但佇彼隻的頭前拜。

31

(THR) Ông tī soaⁿ-thâu khí biō; tùi peh-sìⁿ tiong bô sio̍k Lī-bī cho̍k-ê, siat-lı̍p i chòe chè-si.

(BCL) 王佇山頭起廟，對百姓中無屬利未族的，設立伊做祭司。

32

(THR) Iâ-lô-phò-àm tiāⁿ-tio̍h poeh-ge̍h, hit-ge̍h ê cha̍p-gō͘, siat choeh-kî, chhin-chhiūⁿ Iû-tāi ê choeh-kî chı̍t-iūⁿ; tī tôaⁿ-téng hiàn-chè; tī Pek-te̍k-lī iā sī án-ni chòe, hiàn-chè tī i só͘ chù ê gû-á; koh chiong i só͘ khí-chō soaⁿ-thâu-tôaⁿ ê chè-si, an-tì tī Pek-te̍k-lī.

(BCL) 耶羅波安定著八月彼月的十五設節期，親像猶大的節期一樣，佇壇頂獻祭。佇伯特利也是按呢做，獻祭佇伊所鑄的牛仔，閣將伊所起造山頭壇的祭司安置佇伯特利。

33

(THR) I tī poeh-ge̍h cha̍p-gō͘ jı̍t, chiū-sī i ê sim su-khia só͘ tiāⁿ-tio̍h ê ge̍h, hiàn-chè tī i tī Pek-te̍k-lī só͘ khí ê tôaⁿ; kā Í-sek-lia̍t lâng siat choeh-kî, hiàn-chè tī tôaⁿ--nih, koh sio-hiuⁿ.

(BCL) 伊佇八月十五日，就是伊的心私奇所定著的月，獻祭佇伊佇伯特利所起的壇，給以色列人設節期，獻祭佇壇裡閣燒香。

Bible Color Mark

• 台語漢字羅馬本
• 巴克禮全羅