羅馬書 第 13 章 - 台語漢字羅馬本

1

逐人著降服佇做序大有權柄的，因為見有權柄無呣是對上帝出；所有的權柄攏是上帝所定著。

2

所以抗拒權柄者是逆上帝的命令；逆的人家己取罪。

3

因為有司呣是互好品行的驚，是互歹人驚。你愛免驚彼個權柄嗎？著行好，就得著伊的謳咾；

4

因為伊是上帝差用，欲利益你。若是你行歹，就著驚；因為伊呣是空空掛劍，伊是上帝的差用，是伸冤的，欲互歹人抵著刑罰。

5

所以的確著順服，呣若為著受氣，也是為著良心。

6

因為按呢恁也納稅；因為是上帝的執事，常常專務此個事。

7

所應該互眾人的，著互。應該納伊，著納伊；應該抽互伊，著抽互伊；應該驚畏伊，著驚畏伊；應該尊敬伊，著尊敬伊。

8

莫得欠人甚麼，只有相疼猶是欠人；因為疼人的，有盡律法。

9

因為所講，呣通行淫，呣通人，呣通偷提，呣通貪心，抑是別條誡，攏包含佇此句，著疼厝邊，親像家己。

10

仁愛無害著厝邊；所以仁愛是盡律法。

11

按呢生知此個時候就是恁已經著睏醒的時；因為咱得著救，比起頭信的時卡近。

12

暝欲過，日時近啦；所以咱著褪去黑暗的所行，來穿光明的戰甲。

13

所行著端正，親像佇日時。莫得放縱酒醉，莫得好色邪淫，莫得相爭怨妒；

14

著穿主耶穌基督，莫得為著肉體圖謀，致到趁私慾。