啟示錄 第 15 章 - 台語漢字羅馬本

1

我閣看見別個兆頭佇天裡，大閣奇怪，就是七個天使有掌七項災禍，就是路尾的，因為上帝的大受氣對諸個來盡。

2

我閣看見玻璃，及火相參的海。閣看見許個得勝來脫離獸及伊的相以及伊的名的數額者，徛佇玻璃海，攏提上帝的琴，

3

吟上帝奴僕摩西的詩及羊羔的詩，講：主上帝──全能者啊，你的所做大閣奇怪！歷世代的王啊，你的道路義閣真實！

4

主啊，是誰呣敬畏歸榮光你的名啊？因為獨獨你是聖。列邦欲攏來敬拜佇你的面前，因為你公義的所行已經顯明。

5

諸個代誌了後，我看見佇天裡彼個做證據的會幕的殿已經開。

6

許個七個天使有掌七項災禍的，對殿出來，身軀穿寶石清亮閣光明，胸坎縖金帶。

7

四個活物的一個將七個金碗互彼七個天使，內面貯滿彼個活到代代無盡的上帝的大受氣。

8

對上帝的榮光及伊的權能，就殿裡有煙滿滿。閣無人會入殿，聽候到七個天使七項的災禍行盡。