啟示錄 第 12 章 - 台語漢字羅馬本

1

閣有大兆頭出現佇天裡：一個婦仁人身軀穿日頭，伊的腳下有月，頭殼戴十二粒星的冕旒。

2

亦有懷孕，因為欲生子的艱苦，痛疼就喉叫。

3

閣有別個兆頭出現佇天裡：有大尾赤色的龍，七個頭十支角；頭殼戴七頂王帽。

4

伊的尾拖天頂的星三份的一份，墜落地。龍徛佇欲生子的婦仁人的面前，聽候伊生了，就欲吞伊的子。

5

婦仁人生查甫子，就是欲用鐵枴治理萬邦的；伊的子受帶到佇上帝以及伊的座位。

6

婦仁人就走去曠野，佇遐有上帝所備辦的所在，互伊佇遐得著養飼一千二百六十日。

7

佇天裡就有交戰。米迦勒導伊的差使去及龍交戰，龍亦導伊的差使去交戰，

8

會贏，佇天裡就無閣有所在。

9

彼尾大龍就受落，就是老蛇，稱做魔鬼，亦稱做撒但，迷惑普天下的。伊受落佇地裡，伊的差使亦及伊受落。

10

我就聽見佇天裡有大聲講：「咱的上帝的拯救、及權能、及國，以及伊的基督的權，今攏到啦！因為控告咱的兄弟的，就是暝日佇咱的上帝的面前控告的，今已經受落啦。

11

因為羊羔的血及所干證的道理，來卡贏伊。雖然到死，亦無疼惜的生命。

12

所以，諸個天及徛起佇彼中間的，恁著歡喜！若是地及海有災禍！因為魔鬼已經落到恁遐，有大受氣，因為知伊的時無偌久。」

13

龍看見本身受佇地裡，就窘逐彼個生查甫子的婦仁人。

14

就有大鷹的二支翅互婦仁人，互伊飛去曠野，到伊的所在，離開蛇的面前；佇遐得著養飼一期候閣二期候閣半期候。

15

蛇佇婦仁人的後面，對伊的嘴吐出水，親像河，欲給伊流去。

16

地幫助婦仁人，就開嘴吞龍所吐出的河水。

17

龍受氣婦仁人，就去及婦仁人其餘的後裔交戰，就是守上帝的誡、有耶穌的干證的。彼時龍就徛佇海邊的沙頂。