詩篇 第 31 章 - 台語漢字羅馬本

1

〔大衛的詩，交互樂官。〕耶和華啊，我倚靠你；求你互我永永無見誚；照你的公義拯救我！

2

求你俯耳孔聽我，緊緊來救我！做我堅固的石磐，做拯救我的衛所！

3

因為你是我的山巖，我的山寨；所以，求你因為你的名來引導我，指點我。

4

人暗靜張羅網欲網我，求你救我脫離，因為你是我的衛所。

5

我將我的靈魂交佇你的手；耶和華真實的上帝啊，你有救贖我。

6

我怨恨許個信奉虛假的人；獨獨我倚靠耶和華。

7

我因為你的慈愛欲歡喜快樂；因為你有看見我的艱苦，知我心神的艱難。

8

你未曾將我交佇對敵的手；你互我的腳徛佇開闊的所在。

9

耶和華啊，我佇患難中，求你憐憫我；我的目睭因為憂悶拍歹，我的心神我的身體亦是按呢。

10

我的生命因為憂苦來消無；我的年歲為著吐氣亦按呢。我的氣力因為我的罪惡來衰膦；我的骨頭亦枯焦。

11

我因為我一切的對敵成做凌辱，佇我的厝邊兜閣卡傷重；許個識我的人攏驚我，佇外面看見我的人走閃離開我。

12

我親像死人，互人記得，無人數念；我親像破碎的器具。

13

因為我聽見多多人的誹謗，四圍攏是驚惶；相及參詳攻擊我的時，就計謀欲害我的生命。

14

耶和華啊，我猶原倚靠你；我講：你是我的上帝。

15

我的遭遇佇你的手；求你救我脫離我的對敵的手以及窘迫我的人。

16

求你互你的面照光你的奴僕，照你的慈愛拯救我。

17

耶和華啊，求你互我無見誚，因為我有求叫你；求你互歹人見誚；互佇陰間靜寂寂。

18

願你互許個白賊的嘴變啞口；就是驕傲看輕，濫糝侮慢義人的。

19

敬畏你的人，你為著所積聚的恩惠，為著倚靠你的人，佇世間人的面前所施行的恩惠怎樣許大！

20

你欲將囥佇你的面前隱密的所在，免致抵著人的計謀；你欲暗靜保守佇帳帷內，免受嘴舌的爭辯。

21

耶和華是應該謳咾者，因為伊佇堅固的城對我施出伊奇妙的慈愛。

22

論到我，我曾著急講：對你的目睭前，我受隔斷。總是，我求叫你的時，你猶原聽我懇求的聲。

23

耶和華聖的百姓啊，恁攏著疼伊！耶和華保守誠實的人，重重報應行驕傲的人。

24

見若向望耶和華的人，恁著壯膽，恁的心著堅固！