詩篇 第 30 章 - 台語漢字羅馬本

1

〔此個詩是獻宮殿的歌，大衛做的。〕耶和華啊，我欲尊重你做至高，因為你曾提拔我，無互我的仇讎對我誇口。

2

耶和華──我的上帝啊，我曾求叫你，你就醫好我。

3

耶和華啊，你曾救我的靈魂對陰間起來，你互我活，免致入墓。

4

耶和華聖的百姓啊，恁著唱歌嘔咾伊，記念伊的聖名來感謝伊。

5

因為，伊的受氣不過目久；伊的恩典是一生的久，歸暝雖然有啼哭，早起時就有歡喜。

6

論到我，我佇亨通的時，就講：我永搖泏。

7

耶和華啊，你曾施恩，互我的山豎在堅固；你掩你的面，我就迫腹。

8

耶和華啊，我求叫你；我對耶和華求恩，講：

9

我流血，我入墓，有啥利益？塵埃豈會謳咾你，豈會報揚你的真實嗎？

10

耶和華啊，求你聽我，憐憫我！耶和華啊，求你幫助我！

11

你已經將我的啼哭變做跳舞，你將我的麻衫褪去，用歡喜給我縖，

12

通互我的心神唱歌謳咾你，亦無靜靜。耶和華──我的上帝啊，我欲感謝你，到永遠！