詩篇 第 12 章 - 台語漢字羅馬本

1

〔大衛的詩，交互樂官。調用第八。〕耶和華啊，求你拯救，因為虔誠的人絕啦；世間人的中間忠信的人無啦。

2

人人及厝邊講白賊；用諂媚的嘴唇，及二樣的心來講話。

3

耶和華欲割斷，諂媚的嘴唇以及講大話的舌。

4

曾講：阮欲用舌來卡贏；阮的嘴唇是阮的，是誰會做阮的主啊？

5

耶和華講：因為困苦的人的冤枉及喪鄉人的吐氣，我今欲起來，安置伊佇伊所切切欣慕穩當的所在。

6

耶和華的話是純全清氣的話，親像銀佇土的爐鍛煉，鍛過七擺。

7

耶和華啊，你欲保護；欲庇佑永遠脫離此世代的人。

8

不中用人高升佇世間人的中間，就歹人逐所在行遊。