馬太福音 第 11 章 - 台語漢字羅馬本

1

耶穌吩咐伊十二個學生明白，就離開遐，欲佇許個城教示人及傳道。

2

約翰佇監裡聽見基督所行的事，就差學生問伊講：

3

「所欲來的是你嗎？抑是阮著向望別人啊？」

4

耶穌應講：「恁著去，將恁所聽見所看見的、給約翰講。

5

就是睛暝者看見，跛腳者行，癩者清氣，臭耳聾者聽見，死的人復活，喪鄉人得著聽福音。

6

見若無佇我來著觸的有福氣！」

7

去的時，耶穌才提起約翰給眾人講：「恁前出去曠野欲看甚麼？是蘆竹互風吹振動嗎？

8

恁出去愛看甚麼？是人穿幼軟的衣裳嗎？你看，穿幼軟的是佇王宮。

9

若是按呢恁出去欲啥事？是欲看先知嗎？是啦。我給恁講，伊是猶卡贏過先知。

10

此人就是經裡所指的講：『我差我的使者佇你的面前，伊欲佇你的頭前備辦你的路』。

11

我實在給恁講，婦仁人所生的，從中未有興起卡大佇行洗禮的約翰；總是佇天國的微細的，猶卡大伊。

12

對行洗禮約翰的時日到今，天國互人強強取，強的人用力取伊。

13

因為眾先知及律法有讖語到約翰的時。

14

恁若甘願承受，此人就是欲來的以利亞。

15

有耳孔通聽的，著聽！

16

此世代我欲用甚麼來比並伊？是親像囝仔坐佇街市裡，來叫的同伴，講：

17

阮對恁歕笛仔，恁無跳舞；阮曾悲哀，恁無搥胸。

18

因為約翰來，無食無飲，人就講伊患著鬼；

19

人子來，亦食亦飲，人就講伊是貪食好酒的人，抽餉及歹人的朋友。若是智慧對伊的所行顯明伊是著。」

20

耶穌曾佇許個城行多多權能，因為攏無反悔，彼時才責備，講：

21

「哥拉汛啊，你有災禍！伯賽大啊，你有災禍！因為佇恁中間所行諸個權能，若有行佇推羅及西頓，就早早穿麻衫摻火灰來反悔。

22

若是我給恁講，當審判的日，推羅及西頓比恁猶卡快擔當！

23

迦百農啊，你豈會得著舉起到天嗎？你欲墜落陰府；因為佇你的中間所行諸個權能，若有行佇所多瑪，就到今仔日伊猶佇。

24

若是我給恁講，當審判的日，所多瑪的地方比你卡快擔當！」

25

當彼時，耶穌應講：「父啊，天地的主，我謳咾你！因為你將諸個事對智慧聰明的有隱密伊，對細子有顯明伊。

26

父啊，是啦，因為你看按呢做歡喜。

27

萬項有，對我的父交付我；父以外，無一個識子；子及子所愛欲指示的以外，無一個識父。

28

恁見若著磨擔重擔的著就近我，我欲互恁安息。

29

我心內溫柔謙遜，恁背我的軛，來對我學；就恁的心神會得著安息。

30

因為我的軛是快，我的擔是輕。」