馬可福音 第 7 章 - 台語漢字羅馬本

1

有法利賽人及幾若個經學士聚集就近耶穌，是對耶路撒冷來。

2

也曾看見伊的學生中有的用俗手食，就是未有洗的手。（

3

因為法利賽人及眾猶太人攏是拘執古早人的流傳，若無出力洗伊的手就無食；

4

對街市倒來，若無洗也無食；所受來執守的猶有多多項，親像洗杯、罐、銅器許個。）

5

法利賽人及經學士問伊講：「你的學生無照古早人的流傳來行，用俗手來食是怎樣？」

6

伊給講：「以賽亞所讖語指恁假好的人真正著。照所記載講：此個百姓用嘴唇尊敬我，若是的心離開我遠遠。

7

敬拜我是空空，因為用人所命令做教示，來教示人。

8

按呢恁是放拺上帝的誡命，拘執人的流傳」；

9

閣給講：「恁實在是棄拺上帝的誡命，欲守恁的流傳。

10

因為摩西曾講：『著尊敬你的老父及你的老母』；閣講：『罵父罵母的人，的確著互伊死。』

11

若是恁講：『人若對伊的父抑是伊的母講：你本所會通對我得著的利益，已經做各板』（就是講禮物），

12

以後恁就呣准伊用甚麼服事伊的父抑是伊的母。

13

是將恁所傳授的流傳，廢無上帝的道理。閣恁所做的多多親像此號款。」

14

就閣叫眾人就近伊，給講：「恁攏著聽我，來曉悟。

15

見若對人的外面入的會染垃墋人，獨獨對人的內面出的諸個就是染垃墋人。」

16

｛有耳孔通聽的，著聽！〔台語羅馬譯本無此節！〕｝

17

耶穌離開眾人，入厝，伊的學生將此個譬喻問伊。

18

伊就給講：「恁也按呢曉悟嗎？豈呣知見若對外面入佇人的，會染垃墋人，

19

因為呣是入伊的心，就是入伊的腹肚，來放佇廁池（伊講按呢，是互逐項的食物攏清氣）」；

20

閣講：「對人的內面出的，就是染垃墋人；

21

因為對內面，就是對人的心，出諸個歹念頭、私通、

22

偷提、人、姦淫、貪心、邪惡、奸詐、好色、歹目、誹謗、驕傲猖狂。

23

凡若諸個歹攏是對內面出，也染垃墋人。」

24

耶穌對遐起身，去到推羅、西頓的交界，入一間厝，呣愛人知，若是囥密。

25

連鞭有一個婦仁人，伊的細漢查某子互邪神附身，聽見耶穌的事，就來仆佇伊的腳下。

26

此個婦仁人是希利尼人，屬敘利非尼基的族。伊求耶穌趕鬼離開伊的查某子。

27

耶穌給伊講：「著互囝仔代先食飽，因為提囝仔的餅互狗是呣好。」

28

婦仁人應伊講：「主啊，是啦；總是桌腳的狗也食細子的餅碎。」

29

耶穌給伊講：「因為此句話，你通倒去；鬼已經離開你的查某子出去。」

30

婦仁人倒去兜，看見查某子倒佇眠床，鬼已經出去。

31

耶穌閣對推羅的境界，經過西頓，對低加波利境的中央，到加利利海。

32

有人導一個臭耳聾掛舌根者的就近伊，求伊給伊按手。

33

耶穌導彼人離開眾人，到邊頭，就用指頭仔探伊雙旁的耳孔，閣呸涎來摸伊的舌，

34

向天吐氣，給伊講；「以法大！」就是講：「開！」

35

伊雙邊的耳孔就開，舌根也解，講話明明。

36

耶穌警戒莫得給人講；總是愈警戒，愈報揚。

37

也不止奇怪，講：「伊所做攏是好，互臭耳聾者聽見，啞口者講話。」