馬可福音 第 15 章 - 台語漢字羅馬本

1

到天光，許個祭司頭、長老、經學士及全公會相及議論，縛耶穌，帶伊去交互彼拉多。

2

彼拉多問伊講：「你是猶太人的王嗎？」伊應講：「你講就是。」

3

祭司頭用多多項告伊。

4

彼拉多閣問伊講：「你攏無應嗎？你看，告你許多項。」

5

若是耶穌猶久無應，致到彼拉多奇怪。

6

到節期，總督應有放一個犯人互，照所求的。

7

有一人名巴拉巴，及許個作亂的人同受縛。佇作亂的時，曾死人。

8

眾人就起，去求彼拉多照常來行。

9

彼拉多應講：「恁愛我放猶太人的王互恁嗎？」

10

因為知，許個祭司頭是為著怨妒才解送伊。

11

若是許個祭司頭使唆眾人，寧可求放巴拉巴互。

12

彼拉多閣應講：「按呢，就恁所叫做猶太人的王的，我著怎樣辦伊？」

13

閣喉叫講：「釘伊佇十字架！」

14

彼拉多給講：「怎樣啊？伊做甚麼歹？」總是愈大聲喉叫講：「釘伊佇十字架！」

15

彼拉多因為愛互眾人歡喜，就放巴拉巴互，已經鞭拍耶穌，就發交去釘十字架。

16

兵丁拖伊入院內，就是公堂就會齊通營。

17

用紫色的袍互伊穿，閣編莿仔的冕旒給伊戴，

18

就給伊請安講：「猶太人的王，平安！」

19

閣用蘆竹捽伊的頭殼，給伊呸涎，跪落拜伊。

20

戲弄息，彼領紫色的袍就給伊褪起來，將伊家己的衫給伊穿落去，帶伊出，欲釘伊十字架。

21

有古利奈人西門，就是亞力山大及魯孚的老父，對山場來，按遐過，勉強伊相及去，來夯耶穌的十字架。

22

帶耶穌到各各他的所在（翻譯就是頭殼碗的所在），

23

用攪沒藥的酒互伊，耶穌呣受。

24

就釘伊佇十字架，分伊的衣服，拈鬮看甚麼人得著甚麼。

25

彼時九點鐘就釘伊佇十字架。

26

用斬條寫伊的罪狀，講：「猶太人的王。」

27

也有二個賊及伊同釘十字架，一個佇正旁，一個佇倒旁。

28

｛這應驗經上的話說：『算伊及不法的人同列。』〔台語羅馬譯本無此節！〕｝

29

經過的人褻瀆伊，搖頭講：「唉啊！你毀壞殿，三日起伊的，

30

今著救家己，對十字架落來！」

31

許個祭司頭及經學士也是按呢恥笑伊，相及講：「伊曾救別人，也會救家己。

32

以色列的王基督，今著對十字架落來，互阮看，來信伊。」同釘佇十字架者也罵伊。

33

日中晝，全地黑暗，到三點鐘的時。

34

三點鐘的時耶穌大聲叫講：「以羅伊！以羅伊！拉馬撒巴大尼？」（翻譯就是：我的上帝！我的上帝！你啥事放離我？）

35

邊頭徛者，有人聽見就講：「你看，伊叫以利亞！」

36

有一人走去，用海絨浸醋，縖佇蘆竹仔尾，互伊吸，講：「且慢，試看以利亞來救伊落來抑無。」

37

耶穌大聲叫，氣就斷。

38

殿內的帳簾對頂到下裂做二旁。

39

百總徛佇耶穌的對面看見伊按呢氣斷，就講：「此人真正是上帝的子！」

40

閣有幾若個婦仁人對遠遠看；從中有抹大拉的馬利亞，及小雅各、約西的老母馬利亞，以及撒羅米，

41

就是耶穌佇加利利的時，跟隨來服事伊者，也有多多婦仁人及耶穌同上耶路撒冷的，攏遠遠看。

42

已經暗，因為彼日是備辦節的日，就是安息日前的一日，

43

有亞利馬太的約瑟來，伊是尊貴的議員，本身也是欣慕上帝的國的。好膽入去見彼拉多，求耶穌的身屍；

44

彼拉多奇怪伊已經死，叫百總來問，看伊死久未。

45

已經對百總得著知，就用身屍互約瑟。

46

約瑟買幼苧布，收耶穌落來，用幼苧布包伊，下佇石磐所拍的墓，也翱一塊石佇墓門。

47

抹大拉的馬利亞，及約西的老母馬利亞，看見伊所埋葬的所在。