約書亞記 第 7 章 - 台語漢字羅馬本

1

總是以色列人佇應該獻的物有犯罪；因為猶大的支派中，謝拉的曾孫，撒底的孫，迦米的子亞干提應該獻的物；耶和華就受氣以色列人。

2

約書亞對耶利哥差人去伯特利東勢、倚近伯亞文的艾城，吩咐講：「恁上去偷看彼個地。」就上去偷看艾的城。

3

倒來到約書亞遐，給伊講：「呣免互眾百姓上去，大約二三千人上去拍艾城就好；呣免勞動眾百姓去到遐，因為遐的人少少。」

4

對按呢百姓中約略三千人上去遐，竟然佇艾城的人的面前逃走。

5

艾城的人死約略三十六人，對城門前追趕，到示巴琳，佇落低的所在拍死；眾百姓就失膽，軟弱親像水。

6

約書亞就拆裂衫；伊及以色列的長老佇耶和華的櫃前仆佇土腳，到下昏，也用塵埃摻佇頭殼。

7

約書亞講：「唉啊！主耶和華啊，你啥事導諸個百姓過此個約但，將阮交佇亞摩利人的手，互阮滅無啊？可惜阮無掠踮佇約但彼旁做夠額。

8

主啊，以色列人已經佇對敵的面前越轉身走，我猶有甚麼通講啊？

9

因為迦南人及此所在一切徛起的百姓聽見就欲圍困阮，除滅阮的名佇地上。彼時你為著你的大名欲怎樣啊？」

10

耶和華給約書亞講：「起來！你啥事按呢仆佇地裡啊？

11

以色列犯罪，違背我所命令的約，取應該獻的物；也偷提，也行詭詐，囥佇的家器中。

12

因為按呢，以色列人佇對敵的面前徛住。佇對敵的面前越轉身走，是因為成做受咒詛；恁若無將應該獻的物對恁中間除去，我就無閣及恁相及佇。

13

你起來，互百姓清氣，給講：『恁著家己清氣，備辦明仔日，因為耶和華──以色列的上帝按呢講：以色列啊，恁猶未交出彼個物，就佇對敵的面前恁欲徛住！』

14

明仔早起，恁著照恁的支派近前來；耶和華所取的支派，著照宗族近前來；耶和華所取的宗族，著照家眷近前來；耶和華所取的家眷，著照人丁，一個一個近前來。

15

受取著的人有應該獻的物佇伊遐，伊及伊所有的著受火燒；因為伊有背耶和華的約，閣因為伊佇以色列中有行戇戇的事。」

16

天光約書亞早早起來，互以色列人照支派近前來，取著的是猶大支派；

17

互猶大的宗族近前來，就取著謝拉的宗族；互謝拉宗族的人丁，一個一個近前來，就取著撒底；

18

互伊的家照人丁，一個一個近前來，就取著猶大支派的人謝拉的曾孫，撒底的孫，迦米的子亞干。

19

約書亞對亞干講：「我的子，我勸你著歸榮光耶和華──以色列的上帝，佇伊的面前認罪，將你所做的事給我講，呣通對我隱瞞。」

20

亞干應約書亞講：「我實在得罪耶和華──以色列的上帝。我所做的事是按呢按呢：

21

我佇所搶的財物中看見一領示拿的娞衫，銀二百舍客勒，金一錠重五十舍客勒，我貪諸個物，就提伊。今埋佇我的布棚內的土腳下，銀佇伊的下底。」

22

約書亞就差人去，就去到伊的布棚。看啊，彼個物果然囥佇伊的布棚內，銀佇下底。

23

就對布棚內提出來，帶到約書亞及以色列眾人遐，下佇耶和華的面前。

24

約書亞及以色列眾人將謝拉的曾孫亞干及彼個銀、彼件衫、彼錠金，及伊的子查某子、牛、驢、羊、布棚，以及伊一切所有的，攏帶到亞割的山谷。

25

約書亞講：「你啥事害阮？今仔日耶和華也欲害你。」對按呢以色列眾人用石頭擲死伊，用火燒，將石頭擲。

26

眾人佇伊的頂面疊一大堆的石，到佇今仔日。對按呢耶和華收回伊的大受氣。所以彼所在名叫亞割的山谷，到今仔日。