約書亞記 第 6 章 - 台語漢字羅馬本

1

耶利哥的城門因為以色列人的緣故就關住住，無人出也無人入。

2

耶和華給約書亞講：「看啊，我有將耶利哥及伊的王，及伊大力的勇士，攏交佇你的手。

3

恁一切的戰士著圍踅此個城，一擺，六日攏著按呢行。

4

七個祭司著抬七支羊角的號筒行佇約櫃的頭前。到第七日，恁著踅城七擺，祭司也著歕號筒。

5

歕角的聲拖長，恁聽見號筒的聲，眾百姓著大聲喝，城牆就欲倒平平，逐人攏著直直進前去。」

6

嫩的子約書亞叫祭司來，給講：「恁著扛約櫃，祭司七人抬七支羊角的號筒佇耶和華的櫃前」；

7

閣給百姓講：「恁著進前去踅城，帶軍器的著行佇耶和華的櫃前。」

8

約書亞對百姓講息，七個祭司抬七支羊角的號筒行佇耶和華的面前歕號筒；耶和華的約櫃隨佇的後面。

9

帶軍器的行佇歕號筒的祭司的頭前，後隊隨約櫃行。祭司愈行愈歕號筒。

10

約書亞命令百姓講：「恁呣通喝，呣通互人聽見恁的聲，連一句也呣通出嘴，聽候我吩咐恁喝的日，彼時才通喝。」

11

對按呢，伊互耶和華的約櫃圍城，踅一擺；就倒來營盤，歇佇營內。

12

天光約書亞早早起來，祭司也扛耶和華的約櫃。

13

抬七支羊角的號筒的七個祭司佇耶和華的櫃前，直直行歕號筒；帶軍器的佇的頭前行，後隊隨耶和華的約櫃行。祭司愈行愈歕號筒。

14

第二日，踅城一擺，就倒來營盤。六日攏是按呢行。

15

第七日拍昲光的時，早早起來，照按呢踅城七擺；只有此日踅城七擺。

16

到第七擺，祭司歕號筒的時，約書亞給百姓講：「著喝啊，因為耶和華用城交互恁啦！

17

此個城及其中一切所有的攏著分別歸互耶和華；只有娼妓喇合以及一切及伊佇厝內的通活，因為伊有囥密咱所差的使者。

18

恁佇應該滅的物著家己謹慎，驚了恁提應該滅的物，致到家己也做應該滅的，閣連累以色列全營也做應該滅的，來害著伊。

19

只有金、銀及銅鐵的器具攏著分別歸互耶和華，收入耶和華的府庫。」

20

百姓就喝，祭司也歕號筒。百姓聽見號筒的聲，就大聲喝，城牆就倒到平平，百姓就進前入城，逐人直直去，對按呢取彼個城；

21

閣將城內所有的，無論男女老幼，牛、羊及驢，攏用刀一盡滅伊。

22

約書亞給偵探彼個地彼二人講：「恁入去彼個娼妓的厝，照恁對伊所咒誓的，導彼個婦仁人及一切屬佇伊的攏對遐出來。」

23

許個做偵探的少年人就入去，導喇合及伊的老父老母、兄弟，以及一切屬佇伊的出來，也導伊的親戚出來，互住佇以色列的營外。

24

就用火燒彼個城及其中一切所有的；獨獨金、銀及銅鐵的器具攏下佇耶和華厝內的府庫。

25

約書亞就保全娼妓喇合及伊老父的家眷，及一切屬佇伊的的活命；因為伊有囥密約書亞所差偷看耶利哥的使者，伊就踮佇以色列中，到今仔日。

26

當時，約書亞對眾人咒誓講：「見若起來起造此個耶利哥城的，著佇耶和華的面前受咒詛。伊下地基的時，欲死大子，下門的時，欲死煞尾子。」

27

耶和華及約書亞相及佇，伊的名聲滿滿佇彼所在。