約書亞記 第 1 章 - 台語漢字羅馬本

1

耶和華的奴僕摩西死了後，耶和華吩咐嫩的子約書亞，就是跟隨摩西的，講：

2

「我的奴僕摩西死了啦。今你著起來，及眾百姓過此個約但，去我所賞賜以色列人的地。

3

見若恁的腳掌所踏的地，我攏賞賜恁照我對摩西所講的。

4

對曠野及此個黎巴嫩，到大河就是伯拉河，赫人的全地，閣到大海向日落的所在，攏欲做恁的境界。

5

你一世人，的確無一人會徛住佇你的面前。我怎樣及摩西佇teh，也欲按呢及你佇teh；我的確無離開你，也無放拺你。

6

你著勇敢壯膽！因為你欲互此個百姓得著彼個地做業，就是我對in的列祖所咒誓欲互in的。

7

獨獨你著勇敢，大大壯膽，執守我的奴僕摩西所命令你一切的律法來行伊，呣通離開來偏左偏右，互你無論叨落去，攏得著亨通。

8

此個律法的冊呣通離開你的嘴，的確著暝日想伊，互你執守來行此個冊內所記載一切的話。按呢，就會互你的路平坦，你也得著大亨通。

9

我豈無命令你嗎？你著勇敢壯膽！莫得驚，也莫得lun；因為你無論叨落去，耶和華──你的上帝及你佇teh。」

10

對按呢，約書亞命令百姓的官長講：

11

「恁著遍行營中，命令百姓講：『恁著備辦食物；因為三日內恁欲過此個約但，入去得著耶和華──恁上帝所欲互恁得著的地。』」

12

約書亞吩咐流便人、迦得人，及瑪拿西半支派講：

13

「恁著記得耶和華的奴僕摩西所命令恁的話講：『耶和華──恁上帝已經互恁平安，也欲將此個地賞賜恁。』

14

恁的某，恁的囝仔，恁的精牲攏著住佇約但此旁、摩西所互恁的地；獨獨恁中間一切大氣力的勇士攏著帶軍器佇恁兄弟的頭前過去，幫助，

15

到耶和華互恁的兄弟得著平安親像恁一樣，到也得著耶和華──恁上帝所賞賜的地，彼時恁才通倒去恁所得著的地，承接伊來做業，就是耶和華的奴僕摩西佇約但此旁、向日出的所在所互恁的。」

16

應約書亞講：「見你所命令阮的，阮欲行；你所差阮的，阮攏欲去。

17

阮前佇一切的事怎樣聽趁摩西，今也欲按呢聽趁你；獨獨願耶和華──你的上帝及你佇，親像伊前及摩西佇一樣。

18

無論甚麼人違背你的命令，呣聽你的話照你一切所命令的，就欲互伊死。獨獨你著勇敢壯膽！」