以賽亞書 第 9 章 - 台語漢字羅馬本

1

總是彼個曾受痛苦的地無閣踮佇黑暗。前上帝互西布倫及拿弗他利的地受看輕，後來就互沿海的路，約但的河外，外邦的加利利得著榮光。

2

行佇黑暗中的百姓看見大光；徛起佇死蔭的地的有光照。

3

你互此個國民多多，亦加添的歡喜；佇你的面前歡喜，親像收割的歡喜，親像人分所搶的物彼號的快樂。

4

因為伊所背重的軛，及肩頭頂的枴，以及壓制伊者的槌，你攏給伊遏折，親像佇米甸的日一樣。

5

因為交戰中穿甲的人的軍裝，及翱佇血內的衫，攏欲受燒，做燃火的柴。

6

因為有一個嬰仔為咱來出世；有一個子賞賜咱。伊欲負擔國政；伊的名稱做「奇妙謀士、全能的上帝、永遠佇的父、和平的人君」。

7

伊的國政及平安欲加添無窮盡。就是佇大衛的寶座及伊的國，欲用審判公義來建立伊保護伊，對今到永遠。萬軍的耶和華的熱心欲成此個事。

8

主發出一句話互雅各家，彼個話亦臨到以色列族。

9

此個眾百姓，就是以法蓮及徛起佇撒瑪利亞者，攏欲知；照驕傲自大的心講：

10

磚甓已經倒，阮欲拍石來起；桑材樹已經剉，阮欲用柏香樹來替換。

11

所以，耶和華欲起利汛的對敵來攻擊伊，亦欲激動伊的對敵。

12

東有亞蘭人，西有非利士人；開嘴吞食以色列。雖然按呢，耶和華的受氣猶未消；伊的手猶久伸。

13

此個百姓猶原無歸向拍的主，亦無尋萬軍的耶和華。

14

所以，耶和華佇一日的中間，欲對以色列斬斷頭及尾，棕樹枝及蘆葦──

15

老大及尊貴的人就是頭，用白賊話教示人的先知就是尾。

16

因為，引導此個百姓者互行差路；互引導者攏受吞滅。

17

所以，主無歡喜的少年人，亦無欲憐憫的孤兒寡婦；因為，逐人是褻瀆者，是行歹者，閣逐人的嘴攏是講戇話。雖然按呢，耶和華的受氣猶未消；伊的手猶原伸。

18

因為邪惡親像火，燒滅莿帕及蒺藜，閣佇艷艷的樹林，成做煙柱，轉踅淐上高。

19

因為萬軍的耶和華的大受氣，地遍遍受燒，百姓成做火的柴；兄弟無相可憐。

20

人正旁搶提，猶原是枵，倒旁吞咬，猶原飽；逐人咬伊家己手骨的肉。

21

瑪拿西攻以法蓮；以法蓮攻瑪拿西，二族合攻猶大。雖然按呢，耶和華的受氣猶未消；伊的手猶久伸。