以賽亞書 第 39 章 - 台語漢字羅馬本

1

當時，巴比倫王巴拉但的子米羅達．巴拉但聽見希西家曾破病，就送批信及禮物互希西家。

2

希西家因為使者來歡喜，就將伊囥寶物的厝，金、銀、香料、貴氣的油，及伊的軍藏局，及府庫內一切所有的攏互看；伊的家中及全國的內面，希西家無一項無互看。

3

對按呢先知以賽亞來見希西家王，問伊講：諸個人講甚麼？對叨落來見你？」希西家講：「對遠遠的所在就是對巴比倫來見我。」

4

以賽亞講：「佇你的家看見甚麼？」希西家講：「凡若我家中所有的，攏有看見；我的財寶的中間無一項無互看見。」

5

以賽亞對希西家講：「你著聽萬軍的耶和華的話：

6

看啊，日子欲到，凡若你家內所有的，及你的列祖積聚到現今的攏欲受搶到巴比倫，無留一項；這是耶和華講的。

7

閣對你本身生的子孫，其中有的欲受掠去，佇巴比倫的王宮當太監。」

8

希西家對以賽亞講：「你所傳耶和華的話是好。」閣講：「因為佇我年日的中間欲有太平及堅固。」