以賽亞書 第 25 章 - 台語漢字羅馬本

1

耶和華啊，你是我的上帝；我欲尊你做高，我欲謳咾你的名。因為你用忠信誠實行奇妙的事，就是你對古早所擬定的。

2

因為你互城變做土堆，互堅固的城變做瓦片坯，互外邦人的宮殿無閣做城，永遠無閣起造。

3

所以，勇猛的百姓欲榮光你；強暴的國的城欲驚畏你。

4

因為當強暴的人催迫人的時，親像大風直直吹牆壁，你就做喪鄉人的衛所，做困苦人急難中的衛所，做閃避大風的所在，做閃避炎熱的蔭影。

5

你欲阻止外邦人的喧嘩，親像乾地的熱氣回落去；禁止強暴的人唱贏的歌，親像熱氣受雲的影消無。

6

佇此個山，萬軍的耶和華欲為著萬百姓用好物排設筵桌，用舊酒及骨髓滿滿的好物，以及坐清的舊酒，排設筵桌。

7

閣佇此個山伊欲除去罩萬百姓的帕及遮蓋萬國的布篷。

8

伊有吞滅死無到永遠。主耶和華欲拭去眾人面裡的目屎，閣對普天下除去伊的百姓的見誚，因為這是耶和華講的。

9

到彼日，人欲講：「看啊，這是阮的上帝；阮平素聽候伊，伊欲拯救阮。這是耶和華，阮平素聽候伊，阮欲因為伊的救恩來歡喜快樂。」

10

耶和華的手欲按佇此個山；摩押人佇所徛起的地欲受　踏，親像乾草受　踏佇糞埽池的水內。

11

伊欲佇彼中間展開手，親像泅水者展開手泅；總是伊欲互伊的驕傲及伊的手所行的詭計做一下敗落去。

12

你城牆堅固的高台，伊欲捙倒伊毀滅伊，拆到平地，低到塵埃。