以賽亞書 第 2 章 - 台語漢字羅馬本

1

亞摩斯的子以賽亞，所得著論猶大及耶路撒冷的默示。

2

到許個日的了後，耶和華殿的山欲建立佇諸個山的頂面，過攏總的山嶺；萬國攏欲來歸伊。

3

有多多國的百姓欲去，講：來啊，咱上耶和華的山，到雅各的上帝的殿。伊欲用伊的道路教示咱；咱亦欲行伊的路。因為律法欲對錫安出；耶和華的話欲對耶路撒冷傳播。

4

伊欲佇列國中來審判，為著多多百姓來解決。欲將的刀拍做犁頭，將的槍拍做鐮仔。此國無抬刀攻擊彼國；亦無閣學習交戰。

5

雅各的家啊，著來！咱著佇耶和華的光明中來行。

6

耶和華，你有放拺你的百姓雅各的家，因為充滿東方的風俗，行邪術的，親像非利士人，也及外邦人結約。

7

伊的地有金銀滿滿，伊的財寶算得；伊的地有馬滿滿，伊的車也算得。

8

伊的地有偶像滿滿；跪拜家己手所造的，就是家己的指頭仔所做的。

9

卑賤者屈落；尊貴者降低；你莫得赦免伊。

10

你著入石洞，匿佇土裡，閃避耶和華的顯赫及伊威嚴的榮光。

11

到彼日，目頭高的人欲降做低；驕傲的人欲受屈落；獨獨耶和華至尊無對。

12

因為萬軍的耶和華有一日，欲攻擊一切驕傲自高者，及一切升高者攏降做低；

13

閣攻擊黎巴嫩一切高大的柏香樹及巴珊一切的橡樹；

14

閣攻擊一切的高山及一切大的山嶺；

15

閣攻擊一切的高台及一切堅固的城牆；

16

閣攻擊他施一切的船隻及一切通意愛娞的物。

17

驕傲的人欲受屈落；自高的人欲降做低。佇彼日，獨獨耶和華至尊無對；

18

偶像欲做一下無去。

19

耶和華起來，互地大振動的時，人就入石洞，入土孔，閃避耶和華的顯赫及伊威嚴的榮光。

20

到彼日，人欲將所造來拜銀的偶像、金的偶像互田鼠及蜜婆。

21

到耶和華起來，互地大振動的時，人欲入石磐縫及山洞，閃避耶和華的顯赫及伊威嚴的榮光。

22

恁莫得倚靠世間人。不過有一條氣佇鼻孔；通算做甚麼啊？