以賽亞書 第 17 章 - 台語漢字羅馬本

1

論大馬色的默示：看啊，大馬色已經受廢棄，無閣做城，的確變做瓦片坯的堆。

2

亞羅珥的城已經受放拺，的確成做飼羊的所在；羊倒佇遐，無人拍驚。

3

以法蓮的山寨；大馬色的國權；亞蘭所剩的百姓，攏欲親像以色列的榮光無去。這是萬軍的耶和華講的。

4

到彼日，雅各的榮光欲衰薄；伊的肥的身體欲消瘦。

5

就欲親像收割的人收五穀，用手割許個穗，閣親像人佇利乏音的山谷拾麥屑。

6

中間所剩的無偌多，親像人摃橄欖樹──佇第一高的枝尾只有二三粒；佇果子樹伸遠的枝尾只有四五粒。這是耶和華──以色列的上帝講的。

7

當彼日，人欲仰望造化伊的主，目睭欲觀看以色列的聖者。

8

無閣仰望家己的手所起的祭壇，無閣觀看家己的指頭仔所做的柴柱，抑是日的像。

9

佇彼日，堅固的城欲親像樹林內及山尾溜所棄拺的所在，就是早前佇以色列人的面前所棄拺的。按呢，地就拋荒。

10

因為你記得救你的上帝，無記念做你的氣力的石磐；所以，你栽真心適的樹仔栽，亦種別樣的種。

11

栽種的日，你給伊圍籬笆，到早起時互你所種的開花；總是佇憂苦絕望痛疼的日，所收割的攏飛咧去。

12

聽啊！有多多百姓的聲，嘩嘩哮親像海的嘩嘩哮；有列國的走，走親像大水的走；

13

列邦走，親像多多水的走；總是上帝喝，就走去遠遠，閣受追趕，親像山頂風前的粗糠，閣親像大風頭前捲的物。

14

下昏時有驚惶，天猶未光就無去。這是搶阮的人所得著的份，是劫阮的人的報應。