以西結書 第 42 章 - 台語漢字羅馬本

1

伊導我出來到外院，閣導我入另外隔開的地相對面的房；彼間房向北佇厝宅的對面。

2

佇一百肘長，五十肘闊的頭前，有北門。

3

屬內院二十肘的對面，閣屬外院舖石地的對面，有樓的廊對樓的廊三層。

4

佇許個房的頭前有一條路，闊十肘，向內面一百肘的路。的門攏向北。

5

頂層的房卡狹，因為互樓的廊佔伊的地，比中層下層佔卡多。

6

因為伊有三層，總是無柱，親像許個院的柱；所以伊的頂層比地平的下層中層卡狹。

7

閣佇外面的房的邊頭，向彼個房的頭前的外院，長五十肘。

8

因為外院諸個房長五十肘。看啊，殿的頭前有一百肘。

9

佇房的下面，對東旁有入去的所在，就是人對外院會入去遐。

10

向南佇院的牆的闊，佇隔開的所在對面，也佇厝宅的對面有許個房。

11

伊的頭前有路，親像向北的房的款式，長闊攏相同；出入的所在攏照的款式，也照的門。

12

照向南許個房的門，佇路的頭有門，就是東勢的牆面前的路，佇入去的所在。

13

伊給我講：「隔開的所在的頭前諸個北勢的房，南勢的房，攏是聖的房；親近耶和華的祭司欲佇遐食至聖的物，也用至聖的物，就是素祭、贖罪祭、補過失的祭，下佇彼所在，因為此所在是聖。

14

祭司入去的時，就呣通對聖所出來到外院，著佇遐放下行職份的時所穿的衫，因為彼是聖；著換的衫才通到屬佇百姓的。」

15

伊量內厝明白，就導我出向東的門，量伊的四圍。

16

伊用竿尺量東方就是用竿尺量伊的四圍，五百竿尺，

17

伊用竿尺量北方，量伊的四圍五百竿尺，

18

伊用竿尺量南方五百竿尺，

19

伊越到西方，用竿尺量伊五百竿尺。

20

伊量伊的四方，四圍有牆，長五百，闊五百，來分別聖者及平常者。