以西結書 第 41 章 - 台語漢字羅馬本

1

伊閣導我到殿遐量許個柱；此面闊六肘，彼面闊六肘，闊狹及布棚相同。

2

門口闊十肘。門的雙旁邊，此旁五肘，彼旁五肘。伊量伊的長四十肘，闊二十肘。

3

伊到內面量門口的柱，二肘。門口六肘，門口的闊七肘。

4

伊量伊的長二十肘，闊二十肘，佇殿的前面；伊對我講：「這是至聖所。」

5

伊量厝的牆，六肘；厝四周圍的邊房，各闊四肘。

6

邊旁有三層，此層疊佇彼層的頂面，逐層有三十間。此個厝另外有一片牆做四圍邊房的路用，互伊的楹仔通靠佇遐，免得靠佇厝的牆。

7

諸個四圍的邊房愈高愈闊；因為厝的圍佇厝的四面愈高，所以厝的闊直直到頂面，對下層到頂層，著對中層上去。

8

我閣看見厝的四圍有高的坅。邊房的地基，高足足一竿尺，就是六大肘。

9

邊房外面的牆厚五肘。所剩的地就是厝的邊房的所在。

10

四面圍厝許個房間，相離二十肘的闊。

11

邊房的門攏向所剩的地：一個門向北，一個門向南。四圍所剩的地攏闊五肘。

12

佇西旁另外隔開的地頭前的厝宅，闊七十肘，伊的牆四圍厚五肘，長九十肘。

13

按呢，伊量厝，長一百肘，也量隔開的所在及所起造的及伊的牆，共長一百肘。

14

厝的前面及向東隔開的地，闊一百肘。

15

伊量後面隔開的地頭前的厝宅，以及此旁彼旁樓的廊，長一百肘，閣量內殿及院的廊。

16

伊的戶椗，伊的關密的窗仔，伊的四圍三層的樓的廊，佇戶椗的對面，四圍的牆攏攬柴板，對土腳到窗仔（窗仔攏有遮蓋），

17

直到門的頂面，就是到內面的厝及外面，內外四圍的牆壁，攏照寸尺。

18

有刻兵及棕樹。二個兵的中間有一欉的棕樹，兵逐個有二個面。

19

此旁有人的面向棕樹，彼旁有獅的面向棕樹，厝內四圍攏是按呢。

20

對土腳到門頂，攏有刻兵及棕樹。殿的牆攏是按呢。

21

殿的門豎是四方的。至聖所的前面，款式親像殿的款式。

22

壇是柴做的，高三肘，長二肘。伊的角伊的座，及伊的四邊，攏是柴做的。伊對我講：「這是耶和華面前的桌」。

23

殿及至聖所有二個門，逐個門有二扇。

24

此個二扇是會拗得的。此個門二扇，彼個門也二扇。

25

殿的門頂有刻兵及棕樹，及刻佇牆頂的一樣。佇外面廊的頭前有厚的柴板。

26

廊的邊頭此旁彼旁攏有關密的窗仔及棕樹；厝的邊房及厚的柴板攏是按呢。