出埃及記 第 8 章 - 台語漢字羅馬本

1

耶和華給摩西講：「你入去見法老，給伊講：『耶和華按呢講：准我的百姓去，通服事我。

2

你若呣准去，看啊，我欲互田蛤仔拍歹你的境內。

3

河欲生湠田蛤仔；欲上來入你的宮殿、你的睏房，上你的眠床，入你的人臣的厝，上你的百姓的身軀，入你的灶孔及你摶麵的器具，

4

閣欲上你及你的百姓以及你眾人臣的身軀。』」

5

耶和華對摩西講：「你給亞倫講：『你的手抬枴仔伸佇江、河、池的頂面，互田蛤仔上來埃及地。』」

6

亞倫就伸伊的手佇埃及諸個水的頂面，田蛤仔就上來，遮蓋通埃及地。

7

博士用的邪術也按呢行，互田蛤仔上來埃及地。

8

法老叫摩西、亞倫講：「請恁求耶和華互諸個田蛤仔離開我及我的百姓，我就准此個百姓去通祭祀耶和華。」

9

摩西對法老講：「我遵存你的意思，我著為你及你的人臣以及你的百姓祈求，佇甚麼時通除滅田蛤仔離開你及你許個厝，只有留佇河裡啊？」

10

伊講：「明仔日。」講：「通照你的話，互你知阮的上帝──耶和華無一個會比並得。

11

田蛤仔欲離開你及你許個厝，及你的人臣以及你的百姓，只有留佇河裡。」

12

摩西、亞倫離開法老出去。摩西為著伊所差來害法老的田蛤仔求叫耶和華。

13

耶和華就照摩西的話來行。見若佇厝內、院中、田裡的田蛤仔攏死。

14

人拾歸堆，遍地攏臭味。

15

法老看見代誌有卡寬，就硬伊的心，呣聽，抵抵照耶和華所講的。

16

耶和華對摩西講：「你給亞倫講：『伸出你的枴仔拍地裡的土粉，互伊佇埃及遍地變做虱母。』」

17

就按呢行。亞倫抬枴仔伸手拍地裡的土粉，就佇人及精牲的身軀攏有虱母；地裡的土粉佇埃及遍地攏變做虱母。

18

博士也用的邪術照按呢做，愛生出虱母，總是會。按呢佇人及精牲的身軀攏有虱母。

19

博士對法老講：「這是上帝的手段。」法老的心硬，呣聽，抵抵照耶和華所講的。

20

耶和華給摩西講：「你清早起來，看啊，法老欲到水邊，你徛佇伊的面頭前，給伊講：『耶和華按呢講：准我的百姓去，通服事我。

21

你若呣准我的百姓去，我欲差歸陣的蝴蠅到佇你及你的人臣以及你的百姓，也欲入你許個厝，閣埃及人的厝及所徛起的所在攏欲有歸陣的蝴蠅滿滿。

22

當彼日，我欲分別我的百姓所徛起的歌珊地，佇遐無欲有歸陣的蝴蠅，通互你知我佇天下中做耶和華。

23

我欲分別我的百姓及你的百姓。明仔再欲有此個神蹟。』」。

24

耶和華按呢行。就有蝴蠅歸大陣，來入法老的宮殿，及伊的人臣的厝及埃及全地；地因為此個歸陣的蝴蠅受敗壞。

25

法老叫摩西、亞倫來，講：「恁去，佇此個地祭祀恁的上帝！」

26

摩西講：「按呢行無合宜，因為阮欲用埃及人所厭惡的物祭祀耶和華──阮的上帝；阮若佇埃及人的目睭前用所厭惡的物來獻祭，豈無欲用石頭擲阮嗎？

27

阮欲去曠野，行三日的路站，祭祀阮的上帝──耶和華；照伊所欲吩咐阮。」

28

法老講：「我欲准恁去，佇曠野祭祀耶和華──恁的上帝，獨獨呣通去遠。恁著替我祈禱。」

29

摩西講：「我欲對你遮出去，也欲求耶和華互歸陣的蝴蠅明仔日離開法老及伊的人臣以及伊的百姓；總是法老呣通閣詭詐，呣准百姓去祭祀耶和華。」

30

摩西就對法老遐出去祈禱耶和華。

31

耶和華就照摩西的話行，互歸陣的蝴蠅離開法老及伊的人臣以及伊的百姓，無留一隻。

32

此擺法老閣硬伊的心，呣准百姓去。