出埃及記 第 33 章 - 台語漢字羅馬本

1

耶和華對摩西講：「我曾咒誓應允亞伯拉罕、以撒、雅各，講：『欲將土地賞賜你的後裔。』今你去啊，你及你對埃及地所導出來的百姓，著對遮上去彼個地。

2

我欲差使者佇你的頭前，我欲趕出迦南、亞摩利、赫、比利洗、希未、耶布斯許個族，

3

導你到流奶及蜜的地。因為我呣及你上去；為著你是頷頸硬的百姓，驚了我佇路裡滅無你。」

4

百姓聽見此個歹消息就憂悶，無人妝飾。

5

耶和華對摩西講：「你著給以色列人講：『恁是頷頸硬的百姓，我若一目　久到恁中間，我的確剿滅恁。今著將恁身軀的妝飾剝起來，我就知我欲怎樣款待恁。』」

6

以色列人對佇何烈山以後，就將身軀的妝飾褪起來。

7

摩西將布棚搭佇營外，離開營有許遠，伊稱此個布棚做會幕。凡若尋求耶和華的人，就到營外的會幕遐。

8

當摩西出去到布棚的時，眾百姓就攏起來，逐人徛佇的布棚口，看摩西，到伊入布棚。

9

摩西入布棚的時，雲柱就落來，　佇布棚的門前，耶和華就及摩西講話。

10

眾百姓看見雲柱徛佇布棚的門前，百姓就攏起來，逐人佇的布棚門口跪拜。

11

耶和華及摩西面對面講話，親像人及朋友講話一般樣。摩西倒轉來營內，獨獨跟隨伊的少年人嫩的子約書亞無離開布棚。

12

摩西對耶和華講：「看啊，你對我講：『將此個百姓導上去』，總是無互我知你欲差是誰及我相及去，只有講：『我用名揀召你，你佇我的面前也得著恩典。』

13

我今若佇你的面前得著恩典，求你將你的路指示我，互我識你，通佇你的面前得著恩典。你著數念此族是你的百姓。」

14

耶和華講：「我欲親身及你去，互你平安。」

15

摩西對伊講：「你若無親身及我去，就呣通導阮對遮上去。

16

對怎樣會知我及你的百姓佇你的面前得著恩典？豈呣是對你及阮相及去、互我及你的百姓佇地上萬百姓有分別嗎？」

17

耶和華對摩西講：「你所講此個事我也欲做伊；因為你佇我的面前得著恩典，閣我用名揀召你。」

18

伊講：「求你互我看見你的榮光。」

19

伊講：「我欲互我一切的恩惠，經過你的面前，也宣佈耶和華的名，佇你的面前。我欲施恩佇我所施恩者；我欲憐憫佇我所憐憫者。」

20

閣講：「你會看我的面，因為無人會看見我也會活。」

21

耶和華講：「看啊，近我遮有所在，你著徛佇石磐頂。

22

當我的榮光經過的時，我欲給你下佇石磐縫內，用我的手遮你，聽候我過去，

23

然後我欲勼我的手倒轉，你就會看見我的尻脊後，總是得通看見我的面。」