出埃及記 第 28 章 - 台語漢字羅馬本

1

「你著對以色列人的中間，互你的兄亞倫及伊許個子來你遮，通做祭司服事我，就是亞倫及亞倫的子拿答、亞比戶、以利亞撒、以他瑪。

2

你著給你的兄亞倫做聖的衫，互伊榮光閣娞。

3

閣著吩咐一切心有智慧者，就是我用智慧的神所充滿的人，給亞倫做衫，分別伊做聖，通做祭司服事我。

4

所著做的衫就是補、以弗得、外袍、有花的內衫、帽、腰帶，著給你的兄亞倫及伊的子做聖的衫，互伊做祭司來服事我。

5

著用金及藍色、紫色、朱紅色的料，及幼苧做伊。

6

「著用金及藍色、紫色、朱紅色的料，及過紡的幼苧，用奇巧的工做以弗得。

7

著有披肩二塊，連佇雙旁，互伊相連。

8

以弗得頂面奇巧的工所織的帶，著及伊同一樣的做法，互伊相連做一個，用金及藍色、紫色、朱紅色的料，以及過紡的幼苧做的。

9

著提二塊紅瑪瑙，佇頂面刻以色列諸個子的名：

10

六個名佇此塊寶石，其餘六個名佇彼塊寶石，攏照出世的次序。

11

著用刻寶石的手工，親像刻印，照以色列諸個子的名，刻此二塊寶石，入佇金槽裡。

12

著將此二塊寶石安佇以弗得的披肩頂，為以色列人做紀念石。亞倫著佇二個肩頭背的名，佇耶和華的面前做紀念。

13

著用金做二塊槽，

14

閣用好金，親像拍索仔，來做二條鍊仔，將諸個拍成的鍊仔，安佇許個槽裡。」

15

「你著用奇巧的工做一個判斷的補。著及以弗得同一樣的做法：用金及藍色、紫色、朱紅色的料，以及過紡的幼苧做伊。

16

補著四方，拗雙重，長一　，闊一　。

17

你著入諸個寶石佇伊的頂面，有寶石四鑆：一鑆是紅寶石、黃玉、赤玉，這是第一　；

18

第二　是綠寶石、藍玉、金鋼石；

19

第三　是紫色的瑪瑙、白瑪瑙、紫色水晶；

20

第四　是青玉、紅瑪瑙、碧玉。這攏著入佇金槽內。

21

諸個寶石照以色列的子的名共十二塊，親像刻印，每塊刻一個名為著十二支派來做伊。

22

著用好金拍鍊仔親像索仔安佇補。

23

佇補著做二個金環，將此二個環安佇補的雙頭。

24

著將所拍彼二條金鍊仔，連佇補雙頭二個環。

25

用所拍二條鍊仔的雙頭連佇二個槽，安佇以弗得披肩的頭前。

26

你著做二個金環，下佇補雙頭的墘，近以弗得向內彼旁。

27

閣著做二個金環，安佇以弗得披肩下面的頭前，倚近相連的所在，佇以弗得奇巧的工所織的帶的頂面。

28

著用藍色的幼帶將補的環及以弗得的環縛相連，互伊粘佇以弗得奇巧的工所織的帶，互補及以弗得無離縫。

29

亞倫入聖所的時，著將判斷的補，所刻以色列的子的名，帶佇伊的胸前，佇耶和華的面前常常做紀念。

30

你著將烏陵及土明下佇判斷的補內；亞倫到耶和華面前的時，許個著佇伊的胸前，亞倫著佇耶和華的面前常常將以色列的判斷掛佇胸前。」

31

「你著做以弗得內面的外袍，歸領是藍色的。

32

袍頂面的對中，著為著頭殼留一個領孔，孔的周圍織領緣，親像戰甲的領孔，免得破裂。

33

袍周圍的下腳裒著用藍色、紫色、朱紅色的料做石榴。佇袍周圍，石榴的中間著有金瑊鈴：

34

一粒金瑊鈴一粒石榴，佇袍周圍的下腳裒。

35

亞倫服事的時著穿伊。伊入聖所到耶和華面前，以及出來的時，有聲通聽見，互伊免死。

36

「著用好金做一個牌，照刻印的法度刻佇伊的頂面講『做聖歸耶和華』。

37

著用一條藍色的幼帶，將伊縛佇帽頂就是佇帽的頭前。

38

此個牌著佇亞倫的頭額，互亞倫擔當聖物的罪；就是以色列人佇一切聖的禮物所分別做聖者。此個牌著常常佇伊的頭額，互佇耶和華面前得著接納。

39

著用幼苧織有　的內衫，著用幼苧布做帽，閣用　花的工做腰帶。

40

「你著給亞倫諸個子做內衫、做腰帶、做包頭殼的巾，互榮光閣娞。

41

著將諸個給你的兄亞倫及伊的子穿，閣用油抹，行設立的禮，分別做聖，互做祭司來服事我。

42

著給做幼苧布的褲，遮的下體；褲著對腰到大腿。

43

亞倫及伊的子入會幕，抑是就近壇，欲佇聖所服事的時著穿伊，免得擔當罪來死。這是欲給亞倫及伊的後裔做永遠的例。」