出埃及記 第 16 章 - 台語漢字羅馬本

1

對以琳起身，佇出埃及地以後第二月十五日，以色列人全會到以琳及西奈的中間、汛的曠野。

2

以色列人全會佇曠野哀怨摩西、亞倫，

3

以色列人對講：「呣值著阮佇埃及地、死佇耶和華的手；彼時阮有肉滿鼎，有餅通食夠飽。恁導阮出來，到此個曠野，是欲互此個全會攏餓死！」

4

耶和華對摩西講：「看啊！我欲對天落米糧互恁。百姓著出去，逐日拾逐日的額，我通試驗，看欲趁我的法度抑呣。

5

到第六日，著將所拾入來的備辦好勢，比逐日所拾的重倍多。」

6

摩西、亞倫對以色列眾人講：「到下昏，恁欲知導恁出埃及地的是耶和華。

7

明仔早起，恁欲看見耶和華的榮光，因為耶和華聽見恁哀怨伊。阮算甚麼，恁竟然哀怨阮？」

8

摩西閣講：「耶和華下昏時欲互恁食肉，早起時欲互恁食餅到飽；因為恁哀怨耶和華，伊攏聽見。阮算甚麼，恁呣是哀怨阮，是哀怨耶和華。」

9

摩西對亞倫講：「你著給以色列人全會講：『恁著就近耶和華的面前，因為伊已經聽見恁的哀怨啦。』」

10

亞倫抵抵對以色列人全會講話的時，向曠野看，看啊，耶和華的榮光佇雲中顯現。

11

耶和華對摩西講：

12

「我已經聽見以色列人的哀怨。你著給講：『到黃昏的時，恁欲食肉，早起欲有餅通食飽，恁就知我是耶和華──恁的上帝。』」

13

到下昏，有鵪鶉飛來，遮蓋營盤；天光早佇營盤四圍的地面，有一重的露水。

14

露水乾的時，看啊，曠野的地面有細細圓圓的物，細到親像霜。

15

以色列人看見，呣知是甚麼，大家相及講：「這是甚麼啊？」摩西給講：「這就是耶和華互恁食的餅。

16

耶和華所吩咐的是按呢：恁著照逐人所會食的量來拾，逐人為伊布棚內的人，照伊的人額來拾，一人一俄梅珥。」

17

以色列人照按呢行；有的拾多，有的拾少。

18

到用俄梅珥量伊，拾多的無剩，拾少的也無欠；逐人照會食的量來拾伊。

19

摩西給講：「人呣通將所剩的，留到過早起。」

20

總是無聽摩西的話，有人留到過早起，就生蟲臭味；摩西受氣。

21

逐早起，照逐人會食的量拾伊，日頭一下曝，就溶去。

22

到第六日，拾重倍的額，逐人二俄梅珥。全會許個頭人來給摩西講；

23

摩西給講：「耶和華按呢講：『明仔日是重要的安息，就是服事耶和華聖的安息日。恁愛的就伊，愛煮的就煮伊，所剩的著家己收留到過早起。』」

24

就照摩西所吩咐收留到過早起，也無臭味，內面也無蟲。

25

摩西講：：「恁今仔日食此個！因為今仔日是服事耶和華的安息日；恁佇田野今仔日的確尋無。

26

六日間通拾，第七日是安息日，彼日就無。」

27

第七日，百姓中有人出去拾，也尋無。

28

耶和華對摩西講：「恁呣肯守我的命令、我的律法，欲到底時啊？

29

恁著看！耶和華已經將安息日賞賜恁，所以第六日伊互恁二日的米糧，第七日逐人著踮家己的所在，攏呣通出去。」

30

對按呢百姓就佇第七日安息。

31

此個物，以色列家叫伊做嗎哪；款式親像芫荽仁，色緻是白的，滋味親像參蜜的餅。

32

摩西講：「耶和華按呢吩咐：『著將一俄梅珥淀淀的嗎哪留到恁的後代，互看我當日導恁出埃及地，佇曠野所互恁食的餅。』」

33

摩西給亞倫講：「你提一個器具，貯一俄梅珥淀淀的嗎哪，囥佇耶和華的面前，留到恁的後代。」

34

亞倫照耶和華所吩咐摩西的，將嗎哪下佇干證的約櫃前留。

35

以色列人食嗎哪共四十年久，直到到佇有人徛起的地，食嗎哪直到到迦南的境界。

36

一俄梅珥就是伊法的十份一。