撒母耳記下 第 9 章 - 台語漢字羅馬本

1

大衛問講：「掃羅的家猶有剩人無？我通因為約拿單的緣故來施恩互伊。」

2

掃羅的家有一個奴僕，名叫洗巴，人叫伊去大衛遐，王就給伊講：「你是洗巴嗎？」應講：「你的奴僕就是伊。」

3

王講：「掃羅的家猶有人無？我通將上帝的恩施互伊。」洗巴對王講：「約拿單猶有一個子，是跛腳的。」

4

王給伊講：「伊佇叨落？」洗巴應王講：「伊佇羅底巴，亞米利的子瑪吉的家。」

5

大衛王就差人去，對羅底巴亞米利的子瑪吉的家帶伊來。

6

掃羅的孫、約拿單的子米非波設來見大衛，仆落去拜。大衛講：「米非波設啊！」伊應講：「你的奴僕佇遮。」

7

大衛講：「你莫得驚，我欲因為你的父約拿單的緣故施恩互你，我欲將你的公掃羅一切的田園攏還你；你也欲常常佇我的桌相及食。

8

伊閣仆拜伊，講：「你的奴僕是甚麼啊，是親像一隻死狗，你竟然看顧我啊！」

9

王叫掃羅的奴僕洗巴來，給伊講：「我已經將屬掃羅及伊全家的攏互你的主人的子。

10

你及你許個的子、你許個奴僕著給伊種作田園，帶所出產的互你的主的子有物通食；總是你的主人的子米非波設欲常常佇我的桌相及食。」洗巴有十五個子，二十個奴僕。

11

洗巴對王講：「見我的主我的王所吩咐奴僕的，你的奴僕攏欲照按呢行。」王閣講：「米非波設欲佇我的桌相及食，親像王的子一樣。」

12

米非波設有一個子猶細漢，名叫米迦。見若住佇洗巴的家的人攏做米非波設的奴僕。

13

對按呢米非波設踮佇耶路撒冷，因為伊常常佇王的桌相及食。閣伊二腳攏跛。