撒母耳記下 第 8 章 - 台語漢字羅馬本

1

此霎了後，大衛拍非利士人，互降服，大衛閣對非利士人的手取米得安瑪；

2

閣拍摩押，互倒佇地裡，用索量伊：量二條索的互伊死，量滿一條索的互伊活。摩押人就歸服大衛，來進貢。

3

大衛拍瑣巴王利合的子哈大底謝佇伊去大河，欲恢復伊的權的時。

4

大衛掠伊的馬兵一千七百，步兵二萬，大衛將伊戰車的馬割斷伊的腳筋，只有留一百張車的馬。

5

大馬色的亞蘭人來幫助瑣巴王哈大底謝，大衛就死亞蘭人二萬二千。

6

對按呢大衛佇大馬色的亞蘭設立軍營，亞蘭人就歸服大衛，來進貢。大衛無論去叨落，耶和華攏互伊卡贏。

7

大衛取哈大底謝許個人臣所涫金的屏牌，帶到耶路撒冷。

8

大衛王閣對屬哈大底謝的比他及比羅他的城得著多多銅。

9

哈拿王陀以聽見大衛拍贏哈大底謝的全軍，

10

陀以就差伊的子約蘭去見大衛王，請安伊，給伊祝福，因為伊拍贏哈大底謝（因為哈大底謝及陀以常常交戰）。約蘭的手也帶銀器金器銅器，

11

大衛王就用諸個物做聖，獻互耶和華，親像前用伊所卡贏列國的金銀做聖來獻一樣，

12

就是對亞蘭、摩押、亞捫人、非利士人、亞瑪力所得著的，以及對瑣巴王利合的子哈大底謝所搶的。

13

大衛佇鹽的山谷拍死亞蘭一萬八千人倒來的時，就得著大名聲；

14

閣伊佇以東設軍營，就是佇以東全地設軍營，以東人就攏歸服大衛。大衛無論去叨落，耶和華攏互伊卡贏。

15

大衛做以色列眾人的王，大衛秉公行義佇伊的眾百姓。

16

洗魯雅的子約押做軍長；亞希律的子約沙法做史官；

17

亞希突的子撒督及亞比亞他的子亞希米勒做祭司；西萊雅做書記；

18

耶何耶大的子比拿雅統轄基利提人及比利提人。大衛許個子做領袖。