撒母耳記下 第 6 章 - 台語漢字羅馬本

1

大衛閣聚集以色列中所揀的三萬人。

2

大衛起身，導隨伊的眾百姓，對巴拉猶大去欲對遐扛上帝的櫃來；此個櫃的名是用坐佇二個兵的中間萬軍的耶和華的名來稱者。

3

下上帝的櫃佇新的車，對山頂亞比拿達的家載出來；亞比拿達二個子烏撒及亞希約趕彼個新車。

4

將伊及上帝的約櫃對山頂亞比拿達的家載出來，亞希約行佇櫃的頭前。

5

大衛及以色列的全家佇耶和華的面前，用松柴所造逐號的樂器及琴、瑟、鈴瓏鼓、大鼓、鈸，來作樂跳舞。

6

到拿艮的五榖場，烏撒伸手扶上帝的約櫃，因為牛著觸。

7

耶和華受氣烏撒，上帝佇遐因為伊的錯誤來拍伊，伊就死佇遐，佇上帝的櫃邊。

8

因為耶和華忽然拍死烏撒，大衛無歡喜，就稱彼所在做毗列斯烏撒，到今仔日。

9

當彼日，大衛驚耶和華，講：「耶和華的櫃豈可通到我的所在？」

10

對按呢大衛呣肯將耶和華的櫃扛入大衛的城，到家己的所在，大衛就扛伊越入迦特人俄別以東的家。

11

耶和華的櫃踮佇迦特人俄別以東的厝三月日；耶和華賜福氣互俄別以東及伊的全家。

12

有人給大衛王講：「耶和華因為上帝的櫃賜福佇俄別以東的家及見若屬佇伊的。」大衛就去，歡喜扛上帝的櫃對俄別以東的厝到大衛的城。

13

扛耶和華約櫃的人行六步，大衛就獻一隻牛及一隻肥的精牲做祭祀。

14

大衛佇耶和華的面前盡力跳舞，大衛縖幼苧布的以弗得。

15

按呢，大衛及以色列全家扛耶和華的櫃上來，出歡喜的聲歕哨角。

16

耶和華的櫃入大衛城的時，掃羅的查某子米甲對窗仔門看，看見大衛起來跳舞佇耶和華的面前，心就看輕伊。

17

扛耶和華的櫃入去，下佇伊的所在，就是大衛所為伊搭的布棚。大衛佇耶和華的面前獻燒祭及謝恩祭。

18

大衛獻燒祭及謝恩祭明白，就用萬軍耶和華的名給百姓祝福，

19

閣佇許個眾百姓，就是以色列眾人，無論男女，每人分互一個餅，一塊肉，一個葡萄干餅；眾百姓就去，逐人倒去的厝。

20

大衛倒去欲給伊的家眷祝福；掃羅的查某子米甲出來迎接大衛，講：「以色列王今仔日有偌大榮光啊！今仔日露體佇人臣的女婢目睭前，親像一個無下落人無畏見誚露體一樣。」

21

大衛給米甲講：「這是佇耶和華的面前；伊揀我過你的老父及伊的全家，設立我做耶和華的百姓以色列的君王，所以我欲佇耶和華的面前跳舞。

22

我欲比此個閣卡粗俗，家己看做卑賤。你所講許個女婢，我欲受尊重。」

23

對按呢掃羅的查某子米甲，到死的日，無生子兒。