歷代志下 第 2 章 - 台語漢字羅馬本

1

所羅門定著意思欲為耶和華的名起殿堂，也為家己的國起皇宮。

2

所羅門就揀挑夫七萬，上山拍石的八萬，督工的三千六百。

3

所羅門差人去見推羅王戶蘭，講：「你曾運柏香柴互我的老父大衛起厝來徛起，求你也照按呢款待我。

4

看啊，我欲為著耶和華──我的上帝的名起殿，分別做聖獻互伊，通佇伊的面前燒芳料的香，常常供給排列的餅，逐早暗、安息日、月的初一，及耶和華──阮的上帝所定著的節期獻燒祭。這是以色列人永遠的例。

5

我所欲起的殿真大；因為阮的上帝真大，贏過攏總的上帝。

6

天及天頂的天，尚且無夠額通互伊徛起，是誰會為著伊起殿啊？我是甚麼號人？通給伊起殿嗎？不過佇伊的面前燒香若定。

7

今求你差一人到我遮，就是做金、銀、銅、鐵、及紫色、朱紅色、藍色的料的，也精工佇逐項雕刻的工，通及許個及我佇猶大耶路撒冷的師傅相及做工，就是我的老父大衛所備辦的；

8

閣求你對黎巴嫩運柏香樹、松樹、檀香樹到我遮，因為我知你的奴僕剉黎巴嫩的樹。看啊，我的奴僕欲及你的奴僕相及做。

9

按呢，通給我備辦多多柴料，因為我所欲起的殿是大閣奇妙。

10

你的奴僕剉樹，看啊，我欲互好的小麥二萬歌珥，大麥二萬歌珥，酒二萬罷特，油二萬罷特。」

11

推羅王希蘭回批應所羅門講：「因為耶和華疼伊的百姓，就設立你做的王」；

12

希蘭閣講：「創造天地的耶和華──以色列的上帝是應該謳咾的！伊賞賜大衛王一個智慧的子，互伊有聰明計謀，通為著耶和華起殿，閣為伊的國起皇宮。

13

「今我差一個精工聰明的人去，是我的老父希蘭所用的，

14

伊是但的支派一個婦仁人的子。伊的老父是推羅人，伊做金、銀、銅、鐵、石、柴、及紫色、藍色，幼苧布、朱紅色，也會曉得逐等號的雕刻，也會想出逐等號的工。互伊及你的師傅以及你的老父──我的主大衛的師傅相及做。

15

今我的主所講的小麥、大麥、油、酒，願運來互諸個奴僕。

16

阮欲照你所欠用的，對黎巴嫩剉樹，絞歸排，浮佇海裡運到約帕；你就通運到耶路撒冷。」

17

所羅門算徛起佇以色列地的出外人，照伊的老父大衛所算的，計共有十五萬三千六百名；

18

伊互七萬人做挑夫，八萬人佇山裡拍石，三千六百人監督做工的。