撒母耳記上 第 11 章 - 台語漢字羅馬本

1

亞捫人拿轄上到基列的雅比，紮營欲攻擊伊。雅比的眾人給拿轄講：「你及阮立約，阮就欲服事你。」

2

亞捫人拿轄應講：「我及恁立約，著按呢就是挖恁眾人的正目，我通用此個來凌辱以色列人。」

3

雅比的長老給伊講：「求你寬容阮七日，互阮差人去以色列的全境；若無人救阮，阮就出來就你。」

4

所差的人到掃羅的基比亞，將諸個話講互百姓聽，百姓就攏開聲哮。

5

掃羅抵當對田裡趕牛倒來，掃羅講：「百姓為啥事啼哭？」就將雅比人的話給伊講。

6

掃羅聽見諸個話，上帝的神大大感動伊，伊大受氣。

7

伊就將一對牛切一塊一塊，交代使者送到以色列的全境，講：「見若無出來跟隨掃羅及撒母耳的，也欲按呢款待伊的牛。」耶和華互百姓驚，就攏出來，親像一人。

8

佇比色點算許個人：以色列人有三十萬，猶大人有三萬。

9

給所差的人講：「恁著按呢回覆基列的雅比人講，明仔日將近中晝的時，恁欲得著拯救。」所差的人倒去給雅比人講，就歡喜。

10

雅比人就給亞捫人講：「明仔日阮欲出來就恁，恁通出在意思款待阮。」

11

隔日，掃羅分百姓做三隊，佇五更早的時入亞捫人的軍營，拍死到日欲晝，所剩的人攏走四散，無二人相及住一位。

12

百姓給撒母耳講：「彼個講『掃羅豈會管轄咱』的是是誰啊？著掠許個人出來，阮欲死伊。」

13

掃羅講：「今仔日一人也呣通死，因為今仔日耶和華拯救以色列。」

14

撒母耳給百姓講：「來啊，咱來去吉甲，佇遐重再建立國。」

15

眾百姓就去吉甲，佇吉甲當耶和華的面前設立掃羅做王，佇遐獻謝恩祭佇耶和華的面前。掃羅及以色列眾人大大歡喜。