羅馬書 第 5 章

1

(THR) Só͘-í lán í-keng tùi sìn chheng-chòe-gī, chiū tùi lán ê Chú Iâ-so͘ Ki-tok ū kap Siōng-tè hô;

(BCL) 所以咱已經對信稱做義，就對咱的主耶穌基督有及上帝和。

2

(THR) iā óa-khò I, tùi sìn lâi jı̍p tī hiān-kim só͘ tòa ê un-tián, koh ǹg-bāng Siōng-tè ê êng-kng lâi hoaⁿ-hoaⁿ hí-hí.

(BCL) 也倚靠伊，對信來入佇現今所帶的恩典，閣向望上帝的榮光來歡歡喜喜。

3

(THR) M̄ nā án-ni, chiū tī hōan-lān iā hoaⁿ-hoaⁿ hí-hí, in-ūi chai hōan-lān siⁿ-chhut thun-lún; thun-lún siⁿ-chhut láu-liān;

(BCL) 呣若按呢，就佇患難也歡歡喜喜；因為知患難生出吞　，

4

(THR) láu-liān siⁿ-chhut ǹg-bāng; iā ǹg-bāng bô tì-kàu kiàn-siàu;

(BCL) 吞　生出老練，老練生出向望；

5

(THR) in-ūi Siōng-tè ê thiàⁿ tùi só͘ siúⁿ-sù lán ê Sèng Sîn lâi kòan-ak lán ê sim.

(BCL) 也向望無致到見誚，因為上帝的疼對所賞賜咱的聖神來灌沃咱的心。

6

(THR) In-ūi lán iáu-kú lóan-jio̍k ê sî, Ki-tok kàu-kî thòe ū chōe ê lâng sí.

(BCL) 因為咱猶久軟弱的時，基督到期替有罪的人死。

7

(THR) In-ūi thòe gī-lâng sí ê, oh-tit ū; thòe hó-lâng sí ê, kiám-chhái ū lâng káⁿ.

(BCL) 因為替義人死的，oh得有；替好人死的，豈採有人敢。

8

(THR) Nā-sī Siōng-tè hián-bêng I pún-sin thiàⁿ lán ê thiàⁿ-thàng, in-ūi lán iáu-kú chòe chōe-jîn ê sî, Ki-tok thòe lán sí;

(BCL) 若是上帝顯明伊本身疼咱的疼痛，因為咱猶久做罪人的時，基督替咱死。

9

(THR) hô-hòng lán í-keng tī I ê huih tit-tio̍h chheng-chòe-gī beh tùi I tit-tio̍h kiù, bián-tit hit ê siū-khì ah.

(BCL) 何況咱已經佇伊的血得著稱做義欲對伊得著救，免得彼個受氣啊。

10

(THR) Nā lán iáu-kú chòe tùi-te̍k ê sî, tùi I ê Kiáⁿ ê sí tit-tio̍h kap Siōng-tè koh hô, hô-hòng í-keng koh hô, beh tī I ê o̍ah tit-tio̍h kiù ah.

(BCL) 若咱猶久做對敵的時，對伊的子的死，得著及上帝復和；何況已經復和，欲佇伊的活得著救啊！

11

(THR) M̄ nā án-ni, lán hiān-kim í-keng tùi lán ê Chú Iâ-so͘ Ki-tok tit-tio̍h koh hô, chiū tùi I iā lia̍h Siōng-tè chòe thang khoa-kháu.

(BCL) 呣若按呢，咱現今已經對咱的主耶穌基督得著復和，就對伊也掠上帝做通誇口。

12

(THR) Só͘-í chhin-chhiūⁿ chōe tùi chı̍t lâng jı̍p sè-kan, sí iā tùi chōe jı̍p, án-ni sí piàn-piàn kàu tī chèng lâng, in-ūi chèng lâng bat hōan-chōe;

(BCL) 所以親像罪對一人入世間，死也對罪入；按呢死遍遍到佇眾人，因為眾人曾犯罪。

13

(THR) in-ūi lu̍t-hoat bē kàu ê sî, chōe í-keng tī sè-kan; to̍k-to̍k bô lu̍t-hoat tī-teh, chōe chiū bô sǹg-siàu;

(BCL) 因為律法未到的時，罪已經佇世間；獨獨無律法佇，罪就無算數。

14

(THR) chóng-sī tùi A-tong kàu Mô͘-se, liân hiah ê bô hōan-chōe chhin-chhiūⁿ A-tong hōan-tio̍h kìm-lēng ê khóan ê, sí iā lóng kóan-hat in; A-tong sī tè-āu kàu ê ê saⁿ-tùi.

(BCL) 總是對亞當到摩西，連許個無犯罪親像亞當犯著禁令的款的，死也攏管轄。亞當是隨後到者的相對。

15

(THR) Nā-sī chōe-kòa put-pí un-sù. In-ūi nā tùi chı̍t lâng ê chōe-kòa chèng lâng sí, hô-hòng Siōng-tè ê un-tián, kap tī Iâ-so͘ Ki-tok chı̍t lâng un-tián tiong ê siúⁿ-sù, chhiong-móa tī chèng lâng ah.

(BCL) 若是罪過不比恩賜，因為若對一人的罪過，眾人死，何況上帝的恩典，及佇耶穌基督一人恩典中的賞賜，充滿佇眾人啊？

16

(THR) Koh tùi chı̍t lâng ê hōan-chōe, iā put-pí un-sù; in-ūi sím-phòaⁿ sī tùi chı̍t lâng, tì-kàu tēng chōe, nā-sī un-sù sī tùi chōe-chōe chōe-kòa, tì-kàu tòan chòe gī.

(BCL) 閣對一人的犯罪，也不比恩賜，因為審判是對一人致到定罪，若是恩賜是對多多罪過致到斷做義。

17

(THR) In-ūi nā ūi-tio̍h chı̍t lâng ê chōe-kòa, sí chiū tùi chı̍t lâng chòe ông, hô-hòng hiah ê siū un-tián kap gī ê siúⁿ-sù ê chhiong-móa ê, beh tùi Iâ-so͘ Ki-tok chı̍t-ê, tī o̍ah ê tiong-kan, chòe ông ah.

(BCL) 因為若為著一人的罪過，死就對一人做王，何況許個受恩典及義的賞賜的充滿的，欲對耶穌基督一個佇活的中間做王啊？

18

(THR) Án-ni chhin-chhiūⁿ tùi chı̍t pái ê chōe-kòa ū tì-kàu chèng lâng siū tēng chōe, chiū tùi chı̍t pái gī ê só͘ kiâⁿ iā tì-kàu chèng lâng siū gí-tòan tit-tio̍h o̍ah.

(BCL) 按呢，親像對一擺的罪過，有致到眾人受定罪；就對一擺義的所行，也致到眾人受擬斷得著活。

19

(THR) In-ūi chhin-chhiūⁿ tùi chı̍t lâng ê ûi-ke̍h hō͘ chèng lâng chòe ū chōe ê, chiū tùi chı̍t lâng ê sūn-thàn hō͘ chèng lâng chòe ū gī ê, iā sī án-ni.

(BCL) 因為親像對一人的違逆，互眾人做有罪的；就對一人的順趁，互眾人做有義的，也是按呢。

20

(THR) Koh ke-chham lu̍t-hoat lo̍h-khì, beh hō͘ chōe-kòa ke-thiⁿ chōe-chōe. Chóng-sī chōe-kòa chōe-chōe, chiū un-tián tī hia it-hoat chhiong-móa;

(BCL) 閣加參律法落去，欲互罪過加添多多；總是罪過多多，就恩典佇遐益發充滿。

21

(THR) chiū-sī chhin-chhiūⁿ chōe bat chòe ông tī sí ê tiong-kan, iā beh hō͘ un-tián chhin-chhiūⁿ án-ni tùi gī lâi chòe ông tì-kàu éng-o̍ah, sī tùi lán ê Chú Iâ-so͘ Ki-tok.

(BCL) 就是親像罪曾做王佇死的中間；也欲互恩典親像按呢對義來做王，致到永活，是對咱的主耶穌基督。

Bible Color Mark

• 台語漢字羅馬本
• 巴克禮全羅