詩篇 第 121 章

1

(THR) Chiūⁿ kiā-á ê si.1) Góa beh kia̍h-ba̍k ǹg soaⁿ; Góa ê pang-chān tùi toh-lo̍h lâi?

(BCL) 〔上崎仔的詩。〕我欲抬目向山；我的幫助對叨落來？

2

(THR) Góa ê pang-chān tùi Iâ-hô-hoa lâi; I sī chhòng-chō thiⁿ tōe ê.

(BCL) 我的幫助對耶和華來，伊是創造天地的。

3

(THR) I bô beh hō͘ lí ê kha iô-choah; Pó-siú Lí-ê tek-khak bô tuh-bîn.

(BCL) 伊無欲互你的腳搖泏；保守你者的確無盹眠！

4

(THR) Khòaⁿ ah, pó-siú Í-sek-lia̍t ê, Iā bô tuh-bîn, iā bô khùn--khì.

(BCL) 看啊，保守以色列的，也無盹眠也無睏去。

5

(THR) Pó-siú lí--ê sī Iâ-hô-hoa; Iâ-hô-hoa tī lí ê chiàⁿ-pêng chòe lí ê ìm-ńg.

(BCL) 保守你者是耶和華；耶和華佇你的正旁做你的蔭影。

6

(THR) Jı̍t--sî thài-iông bô siong lí, Mî--sî ge̍h ia̍h bōe hāi lí.

(BCL) 日時，太陽無傷你；暝時，月亦害你。

7

(THR) Iâ-hô-hoa beh pó-siú lí, bián siū it-chhè ê chai-hāi; I beh pó-siú lí ê sìⁿ-miā.

(BCL) 耶和華欲保守你，免受一切的災害；伊欲保守你的生命。

8

(THR) Lí chhut, lí jı̍p, Iâ-hô-hoa beh pó-siú lí, Tùi chit-sî tı̍t-kàu éng-óan.

(BCL) 你出你入，耶和華欲保守你，對此時直到永遠。

Bible Color Mark

• 台語漢字羅馬本
• 巴克禮全羅