馬太福音 第 2 章

1

(THR) Tng Hi-lu̍t ông ê sî, Iâ-so͘ í-keng chhut-sì tī Iû-thài ê Pek-lī-hêng, ū kúi-nā ê phok-sū tùi tang-hng lâi kàu Iâ-lō͘-sat-léng,

(BCL) 當希律王的時，耶穌已經出世佇猶太的伯利恆。有幾若個博士對東方來到耶路撒冷，講：

2

(THR) kóng, Chhut-sì chòe Iû-thài lâng ê ông ê tī tá-lo̍h? in-ūi góan tī tang-hng ū khòaⁿ-kìⁿ I ê chhiⁿ, chiah lâi beh pài I.

(BCL) 「出世做猶太人的王的佇叨落？因為阮佇東方有看見伊的星，才來欲拜伊。」

3

(THR) Hi-lu̍t ông thiaⁿ-kìⁿ chiū peh-pak, thong Iâ-lō͘-sat-léng ia̍h sī án-ni.

(BCL) 希律王聽見，就迫腹；通耶路撒冷亦是按呢。

4

(THR) Chiū chū-chı̍p chèng chè-si-thâu, kap peh-sìⁿ-kan ê keng-ha̍k-sū, mn̄g in Ki-tok tio̍h tī sím-mı̍h só͘-chāi chhut-sì.

(BCL) 就聚集眾祭司頭及百姓間的經學士，問：「基督著佇甚麼所在出世？」

5

(THR) In kā i kóng, Tī Iû-thài ê Pek-lī-hêng; in-ūi sian-ti ū kì-chài kóng,

(BCL) 給伊講：「佇猶太的伯利恆。因為先知有記載，講：

6

(THR) Iû-thài tōe, Pek-lī-hêng ah, Tī Iû-thài chiah ê thâu-lâng tiong, lí lóng m̄ sī tē it sòe ê; In-ūi beh ū chı̍t ê jîn-kun tùi lí chhut, lâi chiàu-kò͘ góa ê peh-sìⁿ Í-sek-lia̍t.

(BCL) 猶太地伯利恆啊，佇猶太諸個頭人中你攏呣是第一細的；因為欲有一個人君對你出，來照顧我的百姓以色列。」

7

(THR) Tùi án-ni, Hi-lu̍t àm-chīⁿ tiàu phok-sū, tùi in siông-sè chhâ hit ê chhiⁿ chhut-hiān ê sî.

(BCL) 對按呢，希律暗靜召博士，對詳細查彼個星出現的時，

8

(THR) Chiū chhe in khì Pek-lī-hêng kóng, Lín khì siông-sè thàm-thiaⁿ hit ê eⁿ-á ê sū; chhē-tio̍h chiū lâi kā góa kóng, hō͘ góa iā thang khì pài I.

(BCL) 就差去伯利恆，講：「恁去詳細探聽彼個嬰仔的事，尋著就來給我講，互我也通去拜伊。」

9

(THR) In thiaⁿ ông ê ōe chiū khì; hut-jiân tang-hng só͘ khòaⁿ-kìⁿ ê chhiⁿ chòe thâu chhōa in, kàu eⁿ-á ê só͘-chāi, chiū hioh tī hit téng-bīn.

(BCL) 聽王的話就去。忽然東方所看見的星做頭導，到嬰仔的所在，就歇佇彼頂面。

10

(THR) In khòaⁿ-kìⁿ hit ê chhiⁿ, hoaⁿ-hí kàu bōe kò͘-tit.

(BCL) 看見彼個星，歡喜到顧得；

11

(THR) Jı̍p chhù, khòaⁿ-kìⁿ eⁿ-á kap I ê lāu-bú Má-lī-a; chiū phak-lo̍h pài eⁿ-á; khui in ê pó-a̍h, hiàn lé-mı̍h hō͘ I, chiū-sī n̂g-kim, jú-hiuⁿ, bu̍t-io̍h.

(BCL) 入厝，看見嬰仔及伊的老母馬利亞，就仆落拜嬰仔，開的寶盒，獻禮物互伊，就是黃金、乳香、沒藥。

12

(THR) Koh tī bîn-bāng-tiong tit-tio̍h chí-tiám, kah in m̄-thang tò-tńg khì chiū-kūn Hi-lu̍t, chiū tùi pa̍t tiâu lō͘ tò-khì pún só͘-chāi.

(BCL) 閣佇眠夢中得著指點，教呣通倒轉去就近希律，就對別條路倒去本所在。

13

(THR) In tò-khì liáu, ū Chú ê thiⁿ-sài tī Iok-sek bîn-bāng-tiong chhut-hiān kóng, Khí-lâi, chhōa eⁿ-á kap I ê lāu-bú, cháu khì Ai-kı̍p, tòa hia kàu góa kā lí kóng; in-ūi Hi-lu̍t beh chhē eⁿ-á lâi bia̍t I.

(BCL) 倒去了，有主的天使佇約瑟眠夢中出現，講：「起來！導嬰仔及伊的老母走去埃及，住遐，到我給你講；因為希律欲尋嬰仔來滅伊。」

14

(THR) I chiū khí-lâi, thàu-mî chhōa eⁿ-á kap I ê lāu-bú khì Ai-kı̍p.; tòa hia kàu Hi-lu̍t sí;

(BCL) 伊就起來，透暝導嬰仔及伊的老母去埃及，

15

(THR) sī beh èng-giām Chú thok sian-ti só͘ kóng ê, kóng, Góa bat tiàu góa ê kiáⁿ chhut Ai-kı̍p.

(BCL) 住遐到希律死。是欲應驗主託先知所講的，講：「我曾召我的子出埃及。」

16

(THR) Hit sî Hi-lu̍t chai hō͘ phok-sū siat-khì, chiū tōa siū-khì, chhe lâng chiong Pek-lī-hêng kap chiu-ûi só͘ ū ê ta-po͘ gín-ná, chiàu i tùi phok-sū siông-sè chhâ ê sî, hōan-nā nn̄g hè í-hā ê it-chīn thâi.

(BCL) 彼時希律知互博士設去，就大受氣，差人將伯利恆及周圍所有的查甫囝仔，照伊對博士詳細查的時，凡若二歲以下的一盡。

17

(THR) Án-ni èng-giām chá thok sian-ti Iâ-lī-bí só͘ kóng ê, kóng,

(BCL) 按呢應驗早託先知耶利米所講的，講：

18

(THR) Tī Lia̍p-má thiaⁿ-kìⁿ siaⁿ, Thî-khàu koh tōa siong-pi, Lia̍p-kiat khàu i ê kiáⁿ-jî; M̄ gōan siū an-ùi, in-ūi in bô--khì.

(BCL) 佇拉瑪聽見聲，啼哭閣大傷悲，拉結哭伊的子兒，呣願受安慰，因為無去。

19

(THR) Hi-lu̍t í-keng sí, Chú ê thiⁿ-sài tī Ai-kı̍p, tī Iok-sek bîn-bāng-tiong chhut-hiān kóng,

(BCL) 希律已經死，主的天使佇埃及佇約瑟眠夢中出現講：

20

(THR) Khí-lâi, chhōa eⁿ-á kap I ê lāu-bú khì Í-sek-lia̍t tōe; in-ūi hiah-ê ài hāi eⁿ-á ê sìⁿ-miā ê í-keng sí lah.

(BCL) 「起來！導嬰仔及伊的老母去以色列地；因為許個愛害嬰仔的生命者已經死啦！」

21

(THR) I chiū khí-lâi, chhōa eⁿ-á kap I ê lāu-bú kàu Í-sek-lia̍t tōe.

(BCL) 伊就起來，導嬰仔及伊的老母到以色列地；

22

(THR) Chóng-sī thiaⁿ-kìⁿ A-ki-ló sòa-chiap i ê lāu-pē Hi-lu̍t tī Iû-thài chòe ông, chiū m̄ káⁿ khì hia; kì-jiân tī bîn-bāng-tiong tit-tio̍h chí-tiám, chiū thè-khì Ka-lī-lī ê kéng-lāi.

(BCL) 總是聽見亞基老續接伊的老父希律佇猶太做王，就呣敢去遐，既然佇眠夢中得著指點，就退去加利利的境內，

23

(THR) Kàu chı̍t ê siâⁿ, miâ Ná-sat-le̍k, tiàm hia khiā-khí; sī beh èng-giām chá thok chiah ê sian-ti só͘ kóng ê kóng, I beh kiò chòe Ná-sat-le̍k lâng.

(BCL) 到一個城，名拿撒勒，遐徛起。是欲應驗早託諸個先知所講的講，伊欲叫做拿撒勒人。

Bible Color Mark

• 台語漢字羅馬本
• 巴克禮全羅