以賽亞書 第 52 章

1

(THR) Sek-an ah, khí-lâi, khí-lâi, chhēng lí ê tōa khùi-la̍t; sèng-siâⁿ Iâ-lō͘-sat-léng ah, chhēng lí súi ê i-ho̍k; in-ūi tùi-taⁿ í-āu, bô siū kat-lé, bô chheng-khì-ê, tek-khak bô koh jı̍p lí ê tiong-kan.

(BCL) 錫安啊，起來！起來！穿你的大氣力！聖城耶路撒冷啊，穿你娞的衣服！因為對今以後，無受割禮、無清氣的，的確無閣入你的中間。

2

(THR) Iâ-lō͘-sat-léng ah, tio̍h pōaⁿ--khì tîn-ai; khí-lâi chē; Sek-an siū-lia̍h ê peh-sìⁿ ah, tio̍h tháu-khui lí ām-kún ê só-liān.

(BCL) 耶路撒冷啊，著拂去塵埃！起來坐！錫安受掠的百姓啊，著解開你頷頸的鎖鍊！

3

(THR) Iâ-hô-hoa án-ni kóng, Lín siū-bōe bô the̍h lâng chîⁿ, tit-tio̍h sio̍k-hôe ia̍h bô ēng gûn.

(BCL) 耶和華按呢講：「恁受賣無提人錢，得著贖回亦無用銀。

4

(THR) Chú Iâ-hô-hoa án-ni kóng, Khí-thâu Góa ê peh-sìⁿ lo̍h-khì Ai-kı̍p, tī-hia kià-kha; koh ū A-su̍t lâng bô iân-kò͘ ap-chè in.

(BCL) 主耶和華按呢講：起頭我的百姓落去埃及，佇遐寄腳，閣有亞述人無緣故壓制。

5

(THR) Iâ-hô-hoa kóng, Góa ê peh-sìⁿ kì-jiân bô in-toaⁿ hō͘ lâng lia̍h--khì, taⁿ Góa tī-chia chòe sím-mı̍h ah? Iâ-hô-hoa kóng, Kóan-hat in ê lâng hōa-hōa-háu teh kiò, Góa ê miâ thong-jı̍t siū siat-to̍k.

(BCL) 耶和華講：我的百姓既然無因端互人掠去，今我佇遮做甚麼啊？耶和華講：管轄的人嘩嘩哮叫，我的名通日受褻瀆。

6

(THR) Só͘-í Góa ê peh-sìⁿ beh chai Góa ê miâ; kàu hit-jı̍t in beh chai teh-kóng-ê chiū-sī Góa; khòaⁿ ah, sī Góa.

(BCL) 所以，我的百姓欲知我的名；到彼日欲知講的就是我。看啊，是我！」

7

(THR) Pò hó siau-sit, thôan hô-pêng, pò hok-khì ê hó siau-sit, thôan kiù-un-ê, tùi Sek-an kóng, Lí ê Siōng-tè chòe-ông lah, chit-lâng ê kha chiūⁿ soaⁿ-téng, kàu chiah súi!

(BCL) 報好消息，傳和平，報福氣的好消息，傳救恩的，對錫安講：你的上帝做王啦！此人的腳上山頂到即娞！

8

(THR) Thiaⁿ ah, lí siú-bāng ê lâng ê siaⁿ! in chhut tōa-siaⁿ, saⁿ-kap chhiùⁿ-koa; in-ūi Iâ-hô-hoa tò--lâi Sek-an ê sî, in beh tng-thâu tùi-bīn khòaⁿ-kìⁿ.

(BCL) 聽啊，你守望的人的聲，出大聲，相及唱歌；因為耶和華倒來錫安的時，欲當頭對面看見。

9

(THR) Iâ-lō͘-sat-léng pha-hng ê só͘-chāi ah, tio̍h chhut hoaⁿ-hí ê siaⁿ, saⁿ-kap chhiùⁿ-koa; in-ūi Iâ-hô-hoa an-ùi I ê peh-sìⁿ, kiù-sio̍k Iâ-lō͘-sat-léng.

(BCL) 耶路撒冷拋荒的所在啊，著出歡喜的聲，相及唱歌；因為耶和華安慰伊的百姓，救贖耶路撒冷。

10

(THR) Iâ-hô-hoa tī bān-kok ê ba̍k-chiu-chêng lu̍t I ê sèng-chhiú; tōe-ke̍k ê lâng lóng khòaⁿ-kìⁿ lán ê Siōng-tè ê chín-kiù.

(BCL) 耶和華佇萬國的目睭前伊的聖手；地極的人攏看見咱的上帝的拯救。

11

(THR) Lín tio̍h lī-khui i, lī-khui i, tùi-hia chhut-lâi, bo̍h-tit bong bô chheng-khì ê mı̍h; tùi in tiong-kan chhut-lâi; lín kng Iâ-hô-hoa khì-kū ê lâng ah, tio̍h ka-kī chheng-khì.

(BCL) 恁著離開伊！離開伊！對遐出來。莫得摸無清氣的物；對中間出來。恁扛耶和華器具的人啊，著家己清氣。

12

(THR) Lín chhut-lâi m̄-bián tio̍h-kip, iā m̄-bián tô-cháu; in-ūi Iâ-hô-hoa tek-khak tī lín ê thâu-chêng kiâⁿ, Í-sek-lia̍t ê Siōng-tè tek-khak chòe lín āu-bīn ê pó-hō͘.

(BCL) 恁出來呣免著急，也呣免逃走。因為耶和華的確佇恁的頭前行；以色列的上帝的確做恁後面的保護。

13

(THR) Khòaⁿ ah, góa ê lô͘-po̍k beh ēng tì-hūi kiâⁿ tāi-chì, beh siū kú-khí seng-kôaiⁿ, koh beh chiâⁿ-chòe chin kôaiⁿ.

(BCL) 看啊，我的奴僕欲用智慧行代誌，欲受舉起升高，閣欲成做真高。

14

(THR) Chōe-chōe lâng ūi lí gông-ngia̍h, ( i ê bīn-māu pí pa̍t-lâng khah ū sún-siong, i ê hêng-chōng pí sè-kan lâng khah ū sún-hāi;)

(BCL) 多多人為你卬愕；伊的面貌比別人卡有損傷；伊的形狀比世間人卡有損害。

15

(THR) chhin-chhiūⁿ án-ni i iā beh kek-tōng chōe-chōe kok ê peh-sìⁿ; lia̍t-ông beh tùi i lâi ng in ê chhùi; in-ūi só͘ bē-bat tùi in kóng--ê, in beh khòaⁿ-kìⁿ; bē-bat thiaⁿ-kìⁿ--ê, in beh bêng-pe̍k.

(BCL) 親像按呢，伊也欲激動多多國的百姓；列王欲對伊來掩的嘴。因為所未曾對講的，欲看見；未曾聽見的，欲明白。

Bible Color Mark

• 台語漢字羅馬本
• 巴克禮全羅